Mantaletik sventa xijtojob lek ta cholmantal
1. ¿Kʼusi sventa li mantal ti «Chloʼilaj xchiʼuk slakʼna jun stestigo Jeova» sbie?
1 Li ta revista sventa skotol krixchanoetik Li Jkʼel osil ta toyole oy bakʼintik chlokʼ mantaletik ti «Chloʼilaj xchiʼuk slakʼna jun stestigo Jeova» sbie. Taje oy chaʼtos sbalil, june jaʼ ti kʼupiluk sba xilik chanubtasel ta Vivlia li krixchanoetike, yane jaʼ ti chakʼ kiltik kʼuxi xuʼ ta slekiluk koʼontontik xkalbetik smelolal li jeltos mantaletike (1 Ped. 3:15, 16). ¿Kʼuxi xuʼ lek jtunestik li mantaletik taje?
2. ¿Kʼuxi xuʼ jtunestik ta cholmantal li mantal ti «Chloʼilaj xchiʼuk slakʼna jun stestigo Jeova» sbie?
2 Jtunel ta cholmantal. Lek me ti xakʼej jaylikuk revistaetik ti yichʼoj li mantaletik taje. Yuʼun mi oy junuk yajval na, buchʼu oy ta yoʼonton mantal o kajchanuntik ta Vivlia ti oy kʼusi tsjakʼbutik o ti oy kʼusi chalbutik ti tsmak ta be jloʼiltike, pe ti oy lokʼem ta jlikuk revistae xuʼ jtunestik xchiʼuk xuʼ xkakʼbetik jlikuk sventa skʼel stuk o ti koʼol jchantik xchiʼuke. Mi muʼyuk avuʼun li revistaetik ti bu yichʼoj li mantaletik taje xuʼ xayales ta Internet ta jw.org.
3. ¿Kʼuxi xuʼ jchantik xchiʼuk yajval na li mantal ti «Chloʼilaj xchiʼuk slakʼna jun stestigo Jeova» sbie?
3 ¿Kʼuxi xuʼ jchantik xchiʼuk junuk krixchano li mantal taje? Oy jcholmantaletike chalbeik yajval na ti jaʼ akʼo yapta li bu jaʼ sventa onoʼox yajval nae, vaʼun jaʼ tskʼel jcholmantal li bu chkʼopoj li stestigo Jeovae. Jech xtok, kʼalal jaʼ jech ta xkakʼbetik yil yajval na li kʼusi jchʼunojtike jaʼ chkoltavan sventa mu chopoluk xaʼi sba kʼalal jaʼ noʼox chchan ta jlik vune (Deut. 32:2).
4. ¿Kʼusi xuʼ jchantik yuʼun li jvokʼ mantal taje?
4 Jtunel sventa xchanubtasutik xchiʼuk chijchanubtasvan-o. Kʼalal ta jchantik batel li mantale jkʼeltik kʼusitik tekstoal tstunes, kʼusi skʼelobiltak, kʼu yelan chrasonaj xchiʼuk yajval na li jcholmantale xchiʼuk ti kʼu yelan chchiʼin ta loʼile. Vaʼun kakʼtik persa ti jechuk jpastik ek kʼalal ta jcholtik mantale (Prov. 1:5; 9:9). Xi laj yal jun ermanae: «Kʼalal ta jkʼel li mantaletik taje xkoʼolaj te jkʼeloj yaʼel jun prekursor ti xtojob leke, ti xtakʼ yuʼun skotol li kʼusitik chjakʼbate».
5. ¿Kʼusi xuʼ jpastik sventa jchanubtastik ta cholmantal li kajchanuntik ta Vivliae?
5 Li mantal ti «Chloʼilaj xchiʼuk slakʼna jun stestigo Jeova» sbie, tskoltautik xtok sventa jchanubtastik ta cholmantal li kajchanuntik ta Vivliae. Kʼalal jmoj ta jkʼeltike jaʼuk xkom ta jcholmantal li kajchanuntike. Mi jech ta jpastike chchan kʼuxi ta slekiluk yoʼonton xchapbe skʼoplal li kʼusitik xchʼunoje (Col. 4:6). Ta melel, li mantaletik chlokʼilan taje jaʼ yakʼojbutik Jeova sventa tskoltautik ta spasel li mantal liʼe: «Acʼo me vuʼuc avuʼun li avabtel avichʼoje» (2 Tim. 4:5).