Lekubuk batel mas ti kʼu yelan xijtojob ta cholmantale: jchapantik ta cholmantal li buchʼu chichʼik estudioe

Kʼu yuʼun tsots skʼoplal. Li buchʼutik jaʼ to ch-ochik ta yajchankʼop Jesuse skʼan me xchʼunik «skotol li kʼusitik» laj yal komele, taje te tsakal skʼoplal ti skʼan xakʼik ta chanel li kʼusi melele (Mat. 28:19, 20). Ep li buchʼutik chichʼik estudioe tsjelubtas sparteik li ta Chanob vun sventa Kabteltik yuʼun Diose xchiʼuk xuʼ van chcholbeik mantal yutsʼ yalalik xchiʼuk yamigotakik. Ta kʼunkʼun chlik chʼiuk batel ta yoʼontonik li kʼusi yakal chchanike. Vaʼun kʼalal mi laj yaʼibeik smelolal ti tskʼan Jeova ti akʼo yaʼiik skotol krixchanoetik li lekil aʼyeje, yikʼaluk van chalik ti tskʼan chlokʼik ta cholmantale, taje jaʼ me svinajeb ti yakal xa chchʼiik ta mantale (Rom. 10:13, 14). Mi sta-o xa ti xlokʼ ta cholmantal xchiʼuk li tsobobbaile, tskʼanik me lek chapanel sventa junuk yoʼonton xaʼi sbaik (Luk. 6:40).

Kʼuxi ta pasel:

Koltao li achʼ jcholmantal sventa oyuk yuʼun li vunetik ti chtun ta cholmantale xchiʼuk li kʼusi chakʼ-o chanubtasel ta Vivliae. Akʼbo yil kʼu yelan lek xcholet alatsoj ta amoral o ta aportafolio li vunetike xchiʼuk albo kʼusi xtun-o li vunetik te avichʼoj batele.
Jmoj xasaʼik ta Kabteltik sventa Dios junuk slikeb loʼil o tunesik li livro Benefíciese ta pajina 82 ti kʼusitik mas chtun ti bu chacholik mantale, vaʼun chanik kʼuxi ta pasel. Koltao li avaj-estudio sventa mu persauk skʼel ta vun li kʼusi chale. Vulesbo ta sjol ti tsots skʼoplal ti skʼan lek smeltsan sba batele, pe ti oyuk noʼox smelolal xtoke (2 Kor. 6:3, 4).
Pe oy to me kʼusi yan smakoj ti chichʼik chapanele. Akʼbo yil li tarjeta sventa yosilal cholmantale, chanubtaso kʼuxi ta nojesel li svunal bu xkom jujupʼej na[e] xchiʼuk chanubtaso kʼusitik xuʼ jtsaktik ta vun mi oy bu la jtatik junuk krixchano ti lek chaʼi mantale. Tijbo yoʼonton ti akʼo sut skʼel li krixchanoe (1 Kor. 3:6). Akʼbo yil kʼuxi ta tunesel li jpajinatik jw.org xchiʼuk li foyeto Buenas nuevas para gente de todas las naciones.
Oyuk smalael avuʼun xchiʼuk kʼupil kʼoptao ta skoj ti yakal chchʼi ta mantale (Prov. 25:11). Akʼbo me yil ti baxbolot ta cholmantale. Mi ta slekil avoʼonton chakolta xchiʼuk mi xamuyubaj noʼox li ta cholmantale, muʼyuk me chchʼay ta sjol.

Paso jech sjunul u liʼe:

Chiʼino ta cholmantal li avaj-estudioe xchiʼuk ikʼo batel ta spasel revisita o ta yakʼel estudio. Mi chʼabal avaj-estudio sventa xbat xchiʼinote, xuʼ xavikʼ batel junuk jcholmantal ti mu to masuk xtojobe.