Xuʼ jta jkolebaltik koliyal li Jeova xchiʼuk Jesuse

¿Kʼusi chanuptan jujun kʼakʼal? ¿Mi jolilot ta avutsʼ avalal xchiʼuk mi chavakʼ persa pasel li kʼusi abainoje? ¿Mi atuk chatsʼites avalab o anichʼnab xchiʼuk mi vokol chavaʼi chata li kʼusitik chtun avuʼunik jujun ue? ¿Mi chavichʼ ilbajinel o utilanel yuʼun achiʼiltak li ta a-eskuelae? ¿Mi ip noʼox chavaʼi aba o vokol xa chavaʼi ta skoj ti oy xa ajabilale? Jkotoltik oy jvokoltik, jaʼ noʼoxe oy junantik ti mas to tsots svokolike. Li kʼusi tspat koʼontontike jaʼ ti jutuk xa skʼan xijkol lokʼel li ta vokoliletik taje (2Ko 4:16-18).

Yoʼ to mu xtal li achʼ balumile, tspat koʼontontik ti xaʼibe smelolal Jeova ti kʼu yelan chkaʼi jbatike, ep sbalil chil ti tukʼ chkakʼ jbatike xchiʼuk ti xkuch kuʼuntike. Jech xtok, chalbutik ti chakʼbutik bendision ta jelavele (Jer 29:11, 12). Xaʼibe smelolal kʼu yelan chkaʼi jbatik li Jesus eke. Li avi ti kakʼojtik persa spasel li kʼusi jbainojtike, xi chalbutike: «Te ta jchiʼinoxuk-o» (Mt 28:20). Mi ta jnopbetik skʼoplal li kolebal chichʼ tal li Ajvalilal yuʼun Diose, mas kuxul chkiltik li spatobil koʼontontike xchiʼuk ta jta kipaltik sventa xkuch kuʼuntik li kʼusi ta jnuptantike (Ro 8:19-21).

MI LA AKʼELIK LI VIDEO JKʼELTIK-O BATEL LI KRISTO, KʼALAL CHNOPAJ TALEL JUNUK TSATSAL VOKOLILE, TAKʼIK LI SJAKʼOBILTAK LIʼE:

• ¿Kʼuxi xchʼakoj sbaik ta stojolal Dios li krixchanoetike xchiʼuk kʼusi kʼot ta pasel?

• ¿Kʼusi smalaoj tstaik li buchʼutik tukʼ yakʼoj sbaik ta stojolal Jeovae?

• ¿Kʼu yuʼun ti xuʼ jtatik li kʼupil sba kuxlejal ta jelavele?

• ¿Kʼusi ti oy xa ta avoʼonton mas chakʼupin li ta achʼ balumile?