LI JKUXLEJALTIKE
Li Jeovae tskoltautik kʼalal oy kʼusi tsots ta jnuptantike
Ta skoj ti kuxulutik ta slajebal kʼakʼale, ep kʼusitik ta jnuptantik. Bakʼintike, mu xa xkuch kuʼuntik chkaʼitik. Pe mi jech-o ta jkʼanbetik koltael li Jeovae ta me xkuch kuʼuntik li kʼusitik tsotsik ta jnuptantike (Is 43:2, 4). ¿Kʼusi xuʼ skoltaot sventa xanopaj ta stojolal Jeova mi oy kʼusi yakal chanuptane?
Li orasione. Mi chkalbetik jvokoltik li Jeovae, ta me xakʼbutik jun oʼontonal xchiʼuk kipaltik sventa xkuch kuʼuntik (Flp 4:6, 7; 1Te 5:17).
Li tsobajeletike. Li avie mas to me chtun kuʼuntik li kʼusitik ta mantale xchiʼuk ti jmojuk jpatbe jba koʼontontik kʼalal chijbat ta tsobajeletike (Ebr 10:24, 25). Kʼalal ta jchapan jbatik lek sventa li tsobajeletike, kʼalal chijbatutike xchiʼuk chkakʼ jloʼiltike, ta me jtabetik lek sbalil ti kʼu yelan chkoltavan li xchʼul espiritu Jeovae (Ap 2:29).
Li cholmantale. Mi jech-o chkakʼ kipaltik ta xcholel mantale, mas me mu vokoluk chkaʼitik ta snopbel skʼoplal li kʼusitik lekike. Jech xtok, mas to me lek chkil jbatik xchiʼuk Jeova xchiʼuk kermanotaktik kʼalal ta jcholtik mantale, yuʼun jaʼ jchiʼiltaktik ta abtel (1Ko 3:5-10).
MI LA AKʼELIK LI VIDEO JAʼ CHCHABIOT LI JEOVAE, TAKʼIK LI SJAKʼOBILTAK LIʼE:
¿Kʼusitik koltaat-o Malu sventa nopol oy-o ta stojolal Jeova?
Jech kʼuchaʼal patbat yoʼonton li Malue, ¿kʼuxi tskoltautik li Salmo 34:18?
¿Kʼuxi chakʼ ta ilel li kʼusi kʼot ta stojolal Malu ti chakʼbutik Jeova li juʼelal ti mu kʼusi xkoʼolaj-o kʼalal oy kʼusi tsots ta jnuptantike? (2Ko 4:7).