Ti bu laj yichʼ lokʼesel li stakʼobiltak li ta Jkuxlejaltik xchiʼuk Kabteltik sventa Dios, programa xchiʼuk bu chijtsʼibaj
6-12 YUʼUN ENERO
KʼUSITIK KʼUPIL SBA TA VIVLIA | SALMOS 127-134
Totil meʼiletik, jechuk-o me xachabi li avalab anichʼnabike
Epuk sbalil xkiltik ti jaʼutik yutsʼ yalal Jeovae
9 Li Jeovae yakʼoj ti akʼo xkil kalab jnichʼnabtike xchiʼuk ti jkoltatik sventa skʼanik xchiʼuk ti xtunik ta stojolale. Mi oy avalab anichʼnabe, ¿mi chakʼuxubin li kʼupil sba matanal taje? Li Jeovae laj yakʼbe sjuʼel li anjeletik sventa oyuk kʼusi labal sba spasike, pe muʼyuk laj yakʼ ti akʼo xil xnichʼnabike. Jaʼ yuʼun, li totil meʼiletike skʼan stojik ta vokol ti oy yalab xnichʼnabike. Jaʼ oy ta sbaik stukʼibtasel xchiʼuk ti xalbeik mantal jech kʼuchaʼal tskʼan Jeovae (Dt 6:5-7; Sl 127:3; Ef 6:4). Sventa xichʼik koltael li totil meʼiletike, oy kʼusitik slokʼesoj li s-organisasion Jeova ti lokʼemik ta Vivliae, jech kʼuchaʼal vunetik, videoetik, kʼejojetik xchiʼuk mantaletik ta Internet. Jamal xvinaj ti skʼanoj kalab jnichʼnabtik li Jeova xchiʼuk Xnichʼone (Lu 18:15-17). Lek tajek chil Jeova kʼalal chakʼ venta ti spatoj yoʼontonik ta stojolal li totil meʼiletike xchiʼuk ti chakʼik persa sventa xkʼuxubin li yalab xnichʼnabike. Kʼalal jech tspas li totil meʼiletike, tskolta yalab xnichʼnabik sventa xkʼotik ta yutsʼ yalal Jeova ta sbatel osil.
Chanubtaso avalab anichʼnabik sventa skʼanik li Jeovae
20 Ojtikinik lek li avalab anichʼnabike. Li ta Salmo 127, chal ti xkoʼolaj ta flechaetik li alab nichʼnabiletike (kʼelo Salmo 127:4). ¿Kʼu yuʼun? Yuʼun li flechaetike xuʼ van jelajtik kʼuxi yichʼoj meltsanel xchiʼuk jelajtik smukʼul, jaʼ me jech ek li alab nichʼnabiletike, yuʼun jelajtik ta jujuntal. Jaʼ yuʼun chaʼa, toj tsots skʼoplal ti snopik lek totil meʼiletik kʼu yelan chchanubtasik ta jujuntal li yalab xnichʼnabike. Jaʼ jech la spas jun nupultsʼakal ta Israel ti lik tunikuk ta stojolal Jeova li yalab xnichʼnabik kʼalal la sta svaʼlejike. ¿Kʼusi koltaatik-o yoʼ jechuk spas yuʼunike? Xi chal kaʼitike: «Chʼakajtik laj kakʼbekutik estudio li kalab jnichʼnabkutike». Pe jaʼ tsnop stuk totiletik mi xuʼ van chʼakajtik chchanubtasik li yalab xnichʼnabike xchiʼuk mi persa skʼan jech spasike.
Jsaʼtik lek li kʼusitik kʼupil sba ta Vivliae
Muyubajkutik ta sventa li kʼusi xuʼ kuʼuntik spasele
6 Li totil meʼiletike oy kʼusi lek xuʼ xchanik ta sventa li kʼusi chal ta Salmo 131:1 xchiʼuk 2 (kʼelo). Xi laj yal li ajvalil Davide: «Mi jaʼuk bu oy ta koʼonton saʼel li kʼusitik toj mukʼtike o li kʼusitik mu xa noʼox jtae». Ta skoj ti bikʼit laj yakʼ sbae, jun noʼox yoʼonton laj yaʼi sba. ¿Kʼusi xuʼ xchanik li totil meʼiletike? Jaʼ ti chakʼik ta ilel ti bikʼit chakʼ sbaik mi muʼyuk tskʼan spasik ta persa li kʼusi mu xuʼ yuʼunik spasele xchiʼuk ti muʼyuk jech tskʼanbeik li yalab xnichʼnabik eke. Kʼalal chalbeik ti oyuk kʼusi spasik li yalab xnichʼnabike, skʼan stsakik ta venta li kʼusi xtojobik spasele xchiʼuk li kʼusi vokol chaʼiike, vaʼun jun yoʼonton chaʼi sbaik. Xi chvul ta sjol jun ermana ti Marina sbie: «Li jmeʼe muʼyuk onoʼox la skoʼoltajesun xchiʼuk li jchiʼiltak ta vokʼele mi jaʼuk xchiʼuk li yan ololetike. La xchanubtasun ti jelajtik kʼusitik xijtojob spasele xchiʼuk ti jkotoltik oy jbalil chilutik li Jeovae. Ta skoj ti jech la spase, muʼyuk ta jkoʼoltajes jba xchiʼuk li yantike».
13-19 YUʼUN ENERO
KʼUSITIK KʼUPIL SBA TA VIVLIA | SALMOS 135-137
«Toj echʼ noʼox mukʼ li Kajvaltike, jaʼ mu sta li yan diosetike»
«Jaʼ sjuʼel Dios» li Kristoe
15 Li Kristoe jaʼ akʼbat sjuʼel yuʼun Jeova sventa xuʼ spajesbe yip li kʼusitik ta Balumile. Jaʼ yuʼun xuʼ jchʼuntik ta melel ti xuʼ jech spas li Jeova eke. Jun skʼelobile jaʼ liʼe, kʼalal skʼan toʼox xtal li Nojelal ta voʼe, xi laj yale: «Ta vucub cʼacʼal ta xcacʼ taluc voʼ chaʼvinic (40) cʼacʼal xchiʼuc chaʼvinic (40) acʼubal» (Je 7:4). Jech xtok, li ta Éxodo 14:21 chal ti Diose laj yakʼ taluk «tsots icʼ ta sloqʼueb cʼacʼal» sventa xjam ta oʼlol li nabe. Ta Jonás 1:4 chal ti ta yan veltae laj yakʼ taluk «mucʼta icʼ te ta nab». Tspat tajek koʼontontik snaʼel ti tspajesbe yip kʼusitik ta Paraiso li Diose.
¿Kʼu yelan chkiltik li tukʼil kʼanelal yuʼun Jeovae?
16 Kʼalal ta jsaʼ jnakʼobbailtik ta stojolal Jeovae, jun noʼox koʼontontik. Akʼo mi jech, bakʼintike xuʼ van chkat tajek koʼontontik xchiʼuk chibajemutik tajek. ¿Kʼusi tspas Jeova ta jtojolaltik kʼalal jech chkaʼi jbatike? (Kʼelo Salmo 136:23). Tsnitutik likel xchiʼuk ta slekil yoʼonton tskoltautik (Sl 28:9; 94:18). ¿Kʼuxi ta jtabetik sbalil? Jaʼ ti jnaʼojtik ti tskoltautik li Diose, taje tskoltautik sventa teuk ta joltik li chaʼtos liʼe: baʼyel, mu ventauk bu nakalutik oy bu xuʼ jta jnakʼobbailtik; xchibal, skʼanojutik tajek li Jtotik ta vinajele.
Jsaʼtik lek li kʼusitik kʼupil sba ta Vivliae
¿Kʼu yelan chkiltik li tukʼil kʼanelal yuʼun Jeovae?
10 Li tukʼil kʼanelal yuʼun Diose te oy-o sbatel osil. Jaʼ jech chal 26 ta velta li ta Salmo 136. Xi chal li baʼyel versikuloe: «Albeik kolaval li Jeovae, yuʼun li stuke toj lek; te oy-o sbatel osil li tukʼil kʼanelal yuʼune» (Sl 136:1). Li ta versikulo 2 kʼalal ta 26, chchaʼal li jpʼelantik kʼop liʼe: «Yuʼun te oy-o sbatel osil li tukʼil kʼanelal avuʼune». Kʼalal ta jchantik li salmo liʼe, labal sba chkiltik ti jeltos kʼu yelan chakʼbutik ta ilel tukʼil kʼanelal li Jeovae. Li jpʼelantik kʼop «yuʼun te oy-o sbatel osil li tukʼil kʼanelal yuʼune» chakʼ ta ilel ti jech-o skʼanoj steklumal li Diose. ¡Tstsatsubtas tajek koʼontontik ti muʼyuk chikta yajtuneltak li Jeovae! Yuʼun chchabi li buchʼutik chtunik ta stojolale, mas to kʼalal chil tsots svokolike. ¿Kʼuxi ta jtabetik sbalil? Xijmuyubaj kʼalal jnaʼojtik ti chchabiutik li Jeovae, ti tskoltautik sventa xkuch kuʼuntik li jvokoltike xchiʼuk ti tskoltautik sventa jechuk-o xijtun ta stojolale (kʼelo Salmo 31:7).
20-26 YU’UN ENERO
KʼUSITIK KʼUPIL SBA TA VIVLIA | SALMOS 138, 139
Mu me smakot li xiʼele
Kichʼtik ta mukʼ Jeova li ta tsobobbaile
10 Kʼalal chakʼan chavakʼ aloʼile, ¿mi sik chexan chavaʼi aba o mi ch-alub akʼob chavaʼi? Mu atukuk ti jech chavaʼi abae. Jutuk mu jkotoltikuk chijxiʼ yakʼel li jloʼiltike. Pe mi jaʼ tsmakot-o yoʼ mu xavakʼ aloʼile, skʼan xakʼel ti kʼu yuʼun chaxiʼe. ¿Mi jaʼ ta skoj ti mu xa xanaʼ kʼusi chaval ta yoraile o ti maʼuk stakʼobil xavale? O ¿mi chakʼexav ta skoj ti oy buchʼu mas to lek chakʼ sloʼile? Lek ti jech chavaʼi abae, yuʼun chavakʼ ta ilel ti bikʼit chavakʼ abae xchiʼuk ti jaʼ mas toyol skʼoplal chavil li yantike. Li Jeovae lek chil li buchʼu bikʼit chakʼ sbaike (Sl 138:6; Flp. 2:3). Pe tskʼan xtok ti xavichʼ ta mukʼ ta aloʼil xchiʼuk ti xapatbe yoʼonton li ermanoetike (1Te 5:11). Teuk ta ajol ti skʼanojot li Jeovae xchiʼuk ti chakʼbot stsatsal avoʼonton yoʼ spas avuʼune.
Jpatbe jba koʼontontik li ta tsobajeletike
7 Li kʼusi xuʼ skoltaote jaʼ ti xachan li kʼusitik yaloj Li Jkʼel-osil ta toyole. Jtos li kʼusi yaloje jaʼ ti jchapan jbatik leke (Pr 21:5). Mi xkaʼibetik smelolal li kʼusi ta jchantike, mas jutuk chijxiʼ kʼalal ta jtoy jkʼobtike. Yan kʼusi xuʼ skoltautik xtoke jaʼ mi jpʼelchaʼpʼel noʼox chkakʼ jkomentariotike (Pr 15:23; 17:27). Mi jlikel noʼox chavakʼ akomentarioe, mu masuk chaxiʼ. Jech xtok, li ermanoetike mas chkom ta sjolik mi jpʼelchaʼpʼel noʼox chavakʼ akomentarioe, jaʼ mu jechuk mi jal chakʼopoje xchiʼuk mi ep kʼusitik chavale. Mi ta akʼop atuk chavale, jaʼ xkaltik, ti muʼyuk chakʼel yan velta li parafoe, jaʼ jech chilik yantik ti lek achapanoj abae xchiʼuk ti lek xavaʼibe smelolale.
Jsaʼtik lek li kʼusitik kʼupil sba ta Vivliae
it-2-S paj. 635 par. 7
Perton
Jech xtok, toj tsots skʼoplal ti jpasbe jbatik perton li yajtsʼaklomutik Kristo kʼalal oy bu ta jsaʼ jmultike, mu ventauk ti jaykoj jech skʼan jpastike (Lu 17:3, 4; Ef 4:32; Kol 3:13). Li Diose muʼyuk me bu chakʼ ta perton li buchʼu muʼyuk chakʼ ta perton yantik eke (Mt 6:14, 15) xchiʼuk li buchʼutik tstoy sbaik ta stojolale xchiʼuk li buchʼutik yolbaj mu xchʼunbeik smantaltake (Eks 34:6, 7). Kʼalal oy buchʼu tsots spas smul li ta tsobobbaile xchiʼuk ti persa skʼan lokʼesele xuʼ me sta perton ta tsʼakal mi ta melel la sutes yoʼontone; vaʼun xuʼ xa me lek xchʼamat yuʼun skotol li ermanoetike (1Ko 5:13; 2Ko 2:6-11). Akʼo mi jech, li yajtsʼaklomtak Kristoe mu persauk xakʼik ta perton li buchʼutik yolbaj xa tspas smulike, li buchʼutik ta xchopolil xa yoʼonton jech tspasike xchiʼuk li buchʼutik mu xa kʼusi sventaik-o jsetʼuke. Yuʼun jaʼik me yajkontra Dios (Ebr 10:26-31; Sl 139:21, 22).
27 YUʼUN ENERO–2 YUʼUN FEVRERO
KʼUSITIK KʼUPIL SBA TA VIVLIA | SALMOS 140-143
¿Kʼusi chapas mi laj xa ox apas orasione?
«Aʼio li kʼusitik chal li buchʼutik pʼijike»
13 Teuk ta joltik ti jaʼ svinajeb ti skʼanojutik Diose. Li Jeovae tskʼan ti lekuk xbat li jkuxlejaltike (Pr 4:20-22). Kʼalal tstojobtasutik ta Skʼop, ta jlikuk vun ti lokʼem ta Vivliae o ta stojolal junuk ermano ti lek yij ta mantale, jaʼ jech chakʼ ta ilel ti skʼanojutike. Jech kʼuchaʼal chal ta Ebreos 12:9 xchiʼuk 10, «jech tspas sventa jtabetik sbalil».
14 Jaʼ kakʼ ta koʼontontik li kʼusi chkichʼtik albele, maʼuk ti kʼu yelan chkichʼtik albele. Bakʼintike, muʼyuk lek chkaʼitik ti kʼu yelan tstojobtasutik jun krixchanoe. Li buchʼu chtojobtasvane skʼan xakʼ persa ti ta smeloluk noʼox xtojobtasvan sventa mu vokoluk xkaʼitik xchʼamele (Gal 6:1). Pe mi voʼotik chkichʼtik tojobtasele, skʼan jaʼ xkakʼ ta koʼontontik li kʼusi chij-albate akʼo mi laj kiltik ti muʼyuk lek ti kʼu yelan laj yalbutike. Xuʼ xi jnoptike: «Akʼo mi muʼyuk lek laj kaʼi ti kʼu yelan la stojobtasune, ¿mi oy van srason? ¿Mi xuʼ van mu jtsak ta venta ti kʼu yelan la spas stalelale xchiʼuk ti jaʼuk jtsak ta venta li kʼusi laj yalbune?». Toj lek ti jkʼeltik kʼuxi ta jtabetik sbalil kʼalal chkichʼtik tojobtasele (Pr 15:31).
Jechuk-o me tukʼ koʼontontik li avi ti toj tsots vokolile
Oy yajtsʼaklomtak Cristo ti chopol chaʼiik o ti chat yoʼontonik ta skoj ti tsujvanik ta spasel kʼusitik li yutsʼ yalalik ti muʼyuk ochemik mantale, li vokolil ta takʼine xchiʼuk li tsatsal chameletike. Li ajvalil Davide jech laj yil svokol kʼuchaʼal taje. Xi laj yale: «Chilaj xa ta at-oʼnton chcaʼay; xlaj xtuʼp xa li coʼntone» (Sl 143:4). ¿Kʼusi koltaat sventa stsal yuʼun li vokolil taje? Jaʼ ti la svules ta sjol ti kʼuyelan la skolta li tukʼil yajtuneltak Dios ta voʼnee xchiʼuk ti kʼuyelan koltabil eke. Li Davide la svules ta sjol li yabteltak Diose xchiʼuk li kʼusitik spasoj Jeova sventa xichʼ mukʼibtasbel li sbie (Sl 143:5). Jaʼ noʼox jech ek, mi la jnopbetik skʼoplal Dios, li kʼusitik spasoje xchiʼuk ti jech-o yakal tspas ta jtojolaltike, ta me jtsak kipaltik akʼo mi tsots vokol ta jnuptantik.
Jaʼ noʼox xuʼ xnupunik xchiʼuk li buchʼu «xchʼunoj Cajvaltique» ¿mi kʼun van ta chʼunel li mantal taje?
Xuʼ van jech chavaʼi aba kʼuchaʼal li Davide. Li jun veltae la skʼanbe tsots vokol li Jeovae yuʼun chat tajek yoʼonton, laj yalbe ti akʼo xa xkoltaat ta orae ‹yuʼun ch-alub xa li yoʼonton chaʼie› (Sl 143:5-7, 10). Pe mu xalubtsaj. Malao akʼo stakʼbot aorasion li Jeovae. Kʼelo li Vivliae xchiʼuk nopbo skʼoplal li kʼusi chale. Mi jech chapase chavaʼibe smelol li kʼusi tskʼan Jeova ta atojolale xchiʼuk te chavakʼ venta ti kʼu yelan la skolta li yajtuneltak ta voʼnee. Taje jaʼ tskoltaot sventa xapat avoʼonton ta stojolal xchiʼuk ti xachʼunbe li smantale.
Jsaʼtik lek li kʼusitik kʼupil sba ta Vivliae
Epuk sbalil xavil ti xuʼ xakʼopon li Jeovae
2 Li ajvalil Davide jaʼ jun matanal laj yil li orasione. Jun veltae, xi laj yalbe ta jun kʼejoj li Jeovae: «Jechuk kʼuchaʼal pom ti lek chapanbil ta aventa li j-orasione» (Sl 141:1, 2). Li ta skʼakʼalil Davide, tstunesik toʼox chikʼbil pom sventa xichʼik ta mukʼ li Jeovae, ti jaʼ tsmeltsanik lek li paleetike (Eks 30:34, 35). Yileluke, kʼalal laj yalbe skʼoplal chikʼbil pom li Davide, jaʼ la skʼan laj yal ti tsnop lek li kʼusi chalbe Jeova li ta s-orasione. Li voʼotik eke ta jkʼan ti lekuk xaʼi Jeova li j-orasiontike, jaʼ yuʼun skʼan jnoptik lek li kʼusi chkalbetike.
3-9 YU’UN FEVRERO
KʼUSITIK KʼUPIL SBA TA VIVLIA | SALMOS 144-146
«¡Xmuyubaj noʼox li jteklum ti jaʼ Sdios li Jeovae!»
Li kʼusitik tsjakʼ jkʼelvunetike
1. Lek snup-o sba xchiʼuk sjunul li Salmo 144. Li bendisionetik chalbe skʼoplal ta versikulo 12 kʼalal ta 15 jamal chakʼ ta aʼiel ti jaʼ tskʼanik li buchʼutik tukʼike; ti jaʼ li buchʼutik xi tskʼanik vokole: «Coltaun me, loqʼuesun me ta scʼob li [jyanlum krixchanoetik ti toj chopolike]» (versikulo 11). Jaʼ jech chakʼ ta aʼiel ek li ta versikulo 15, yuʼun li buchʼu chib to velta ch-albat skʼoplal ti «xcuxet noʼox [yoʼontonike]» jaʼ onoʼox li buchʼutik tukʼike, ti jaʼ «li jun ta lum ti jaʼ Dios yuʼunic li Mucʼul Diose».
2. Snup-o tajek sba xchiʼuk yan tekstoetik ti jaʼ chalbe skʼoplal li bendisionetik tsta ta tsʼakal li steklumal Diose. Li Salmo 144 chakʼ ta ilel ti solel xchʼunoj lek ajvalil David ti chichʼik bendision li j-israeletike, ti ch-akʼbat skʼulejalik xchiʼuk smuyubajelik yuʼun Jeova kʼalal mi laj yichʼik pojel lokʼel ta stojolal li yajkontratakike (Le 26:9, 10; Dt 7:13; Sl 128:1-6). Jech kʼuchaʼal li Deuteronomio 28:4 xi chale: «Chichʼ bendición avalab anichʼnabic xchiʼuc scotol cʼusitic chatsʼunic. Xchiʼuc lec chchʼi yalab smeʼ avacaxic, xchiʼuc achijic, xchiʼuc scotol li cʼusitic yan oy avuʼunique». Kʼot ta pasel skotol li bendisionetik laj yichʼ alel taje. Ti kʼu sjalil ajvalilaj li xnichʼon David ti Salomon sbie, jun yoʼonton kuxi li jteklum Israele xchiʼuk ayan ep kʼusitik yuʼunik; taje muʼyuk bu jech yilojik-o. Junantik li kʼusitik kʼot ta pasele, jaʼ svinajeb li bendisionetik chakʼ tal ta jelavel li Ajvalilal yuʼun Mesiase (1Re 4:20, 21; Sl 72:1-20).
Tsotsuk-o me li spatobil koʼontontike
16 Ti jpatoj koʼontontik ti xuʼ xijkuxi sbatel osile jaʼ jun mukʼta matanal yakʼojbutik Jeova. Oy xa ta koʼontontik ti xkiltik li kʼusi kʼupil sba jmalaojtike, yuʼun jnaʼojtik ti ta onoʼox xkʼot ta pasele. Li spatobil oʼontonale xkoʼolaj kʼuchaʼal jun ankla, yuʼun tskoltautik sventa stsal kuʼuntik li prevaetike, li kontrainele o ti xkichʼtik milele. Xkoʼolaj xtok kʼuchaʼal smak jolil ti chchabi li jnopbentike xchiʼuk tskoltautik sventa jpʼajtik li kʼusi chopole xchiʼuk ti jaʼuk-o xkakʼ ta koʼontontik li kʼusi leke. Li spatobil oʼontonal chakʼbutik Vivliae tsnopajesutik mas ta stojolal Dios xchiʼuk jaʼ te chakʼ ta ilel ti skʼanojutik tajeke. Ta me jtabetik sbalil mi jech-o tsots li spatobil koʼontontike.
17 Li Pabloe xi la stsʼibabe batel ta karta li yajtsʼaklomtak Kristo ta Romae: «Kuxetuk avoʼontonik yuʼun li spatobil oʼontonale» (Ro 12:12). Li Pabloe xmuyubaj tajek, yuʼun jpʼel ta yoʼonton ti chkuxi sbatel osil ta vinajel mi tukʼ laj yakʼ sba ta stojolal Jeovae. Li voʼotik eke xijmuyubaj ta skoj li kʼusi jmalaojtik chtal ta tsʼakale, yuʼun jnaʼojtik ti ta onoʼox xkʼot ta pasel yuʼun li Jeovae. Xi laj yal jun jtsʼibajom yuʼun salmoe: «Xmuyubaj noʼox li buchʼu [...] spatoj yoʼonton ta stojolal li Jeova ti jaʼ Dios yuʼune, [...] ti jaʼ li buchʼu tukʼ-o yakʼoj sba ta sbatel osile» (Sl 146:5, 6).
¿Kʼusi jtosukal kʼanelal ti chakʼbutik tajek muyubajele?
19 Li sbalumil Satanase toj ep yakʼojbe tal svokol li krixchanoetike, yuʼun te xa van vakmil jabil ti jech spasoj tale. Ta skoj ti ta slajebal xa kʼakʼal kuxulutike noj ta krixchanoetik ti jaʼ noʼox tsnopbeik skʼoplal li takʼine, ti tskʼan sba stukike xchiʼuk ti jaʼ tspasik li kʼusi tskʼupinike. Jaʼ batem ta yoʼontonik li kʼusi tskʼanike xchiʼuk li kʼusi xuʼ sta ta xkuxlejalike. Pe muʼyuk bu tstaik-o li melel muyubajele. Yuʼun li Vivliae xi chale: «Xcuxet noʼox yoʼnton li bochʼo jaʼ jcoltavanej yuʼun li Dios yuʼun Jacobe, ti jaʼ spatoj o yoʼnton yuʼun li Mucʼul Dios yuʼune» (Sl 146:5).
20 Li yajtunelutik Diose mas ta jkʼantik jujun kʼakʼal li Jeovae. Jaʼ yuʼun, li ta jujun jabil ch-echʼe epal krixchanoetik chojtikinik xchiʼuk chlik skʼanik ek. Taje, jaʼ sprevail ti yakal xa ch-ajvalilaj li Ajvalilal yuʼun Diose xchiʼuk ti jutuk xa skʼan xichʼ talel li bendisionetik ti muʼyuk bu jech kilojtik-oe. Pe ta skoj ti jaʼ ta jpastik li kʼusi tskʼan yoʼonton Jeovae xchiʼuk ti jnaʼojtik ti jaʼ yakalutik spasel li kʼusi lek chile, jaʼ me chakʼ jmuyubajeltik li avie xchiʼuk li ta mas jelavele. Li ta yan xchanobil chtale ta jkʼeltik kʼusi sjelbenal li talelaletik chakʼ li jecheʼ kʼanelale xchiʼuk li slekil talelal yajtuneltak Jeovae.
Jsaʼtik lek li kʼusitik kʼupil sba ta Vivliae
Mas xijmuyubaj mi chkakʼtik li kʼusi x-ayan kuʼuntike
6 Ta skoj ti skʼanojutik li Jeovae, ta xakʼbutik li kʼusitik chtun kuʼuntike. Jkʼelbetik batel skʼoplal li kʼusi laj yal Jesus ta Mateo 6:25 xchiʼuk 26 (kʼelo). Li ta versikuloetik liʼe, li Jesuse laj yalbe skʼoplal mutetik sventa oy kʼusi xakʼ jchantik, xi laj yale: «Mu snaʼ stsob sveʼelik mi jaʼuk bu tskʼej ta snail li sveʼelike». Xi to laj yal xtoke: «Chmakʼlinat yuʼun li Atotik ta vinajele». Laje, xi la sjakʼe: «¿Mi mu jaʼuk mas tsots akʼoplalik kʼuchaʼal li stukike?». Li kʼusi oy ta yoʼonton chakʼ ta chanel li Jesuse, jaʼ ti toj ep sbalil chil yajtuneltak li Jeovae ti jaʼ mu sta li chonbolometike. Mi chchabi chonbolometik li Jeovae, jpʼel me skʼoplal chchabiutik ek. Ta skoj ti jaʼ Jtotik li Jeovae xchiʼuk ti skʼanojutik tajeke, ta me xakʼ li kʼusi chtun kuʼuntike (Sl 145:16; Mt 6:32).
10-16 YUʼUN FEVRERO
KʼUSITIK KʼUPIL SBA TA VIVLIA | SALMOS 147-150
Ep tajek srasonal kuʼuntik sventa jkʼupil kʼoptatik li Jeovae
¿Kʼu yuʼun skʼan xkichʼtik ta mukʼ li Jeovae?
5 Li Jeovae maʼuk noʼox la skolta li jteklum Israele, yuʼun ta jujuntal la spatbe yoʼonton. Jaʼ jech tspas li avi eke, yuʼun xi laj yal li jtsʼibajom yuʼun Salmo 147: «Ta xpoxta li bochʼotic oy svocol yoʼntonique; ta xpixbe lec li xtuchʼemalique» (Sl 147:3). Kʼalal jaʼo iputike o kʼalal abol jba chkaʼitike, xuʼ jchʼuntik ta melel ti oy tajek ta yoʼonton tspat koʼontontik li Jeovae, yuʼun xi chalbutik yaʼele: «Ta jpoxtatik li ayayijemale» (Sl 34:18; Is 57:15). Kʼuchaʼal chkiltike, xuʼ xakʼbutik kipaltik xchiʼuk jpʼijiltik sventa xkuch kuʼuntik li vokoliletik ta jnuptantike (Snt 1:5).
6 Li jtsʼibajom yuʼun salmoe la skʼel muyel li vinajele xchiʼuk xi laj yale: «[Li Jeovae] jaʼ yichʼoj ta venta cʼu yepal li cʼanaletique; ta jujubej ta scʼopan ta sbiic» (Sl 147:4). ¿Pe kʼu yuʼun lik yalbe skʼoplal li kʼanaletike? Jnopbetik skʼoplal liʼe, li jtsʼibajom yuʼun salmoe xil ti toj ep li kʼanaletike, pe mu snaʼ kʼu yepal ta melel. Li sientifikoetik avie mas xa ep xilik li kʼanaletike. Yuʼun chalik ti ta smiyonal xa noʼox oy li ta jgalaxiatike xchiʼuk ta sbiyonal xa noʼox oy galaxiaetik li ta vinajele. Pe mi jaʼuk xchap yuʼunik kʼu yepal ta skotol. Li buchʼu noʼox snaʼoj kʼu yepale, jaʼ li Jpasvaneje xchiʼuk yakʼojbe sbi ta jujuntal. Taje jaʼ smelolal ti toj tsots skʼoplal chil ta jujupʼej li Jeovae (1Ko 15:41). ¿Kʼusi chchanubtasutik ta sventa taje? Li Diose snaʼoj ta skotol ora bu oy li kʼanaletike, jaʼ jech snaʼoj lek ti bu oyutik eke, ti kʼu yelan chkaʼi jbatike xchiʼuk snaʼoj li kʼusi chtun kuʼuntik jujun kʼakʼale.
¿Kʼu yuʼun skʼan xkichʼtik ta mukʼ li Jeovae?
7 Li Jeovae xaʼibe lek smelolal li kʼusitik ta jnuptantik ta jujuntale xchiʼuk toj ep sjuʼel sventa tskoltautik (kʼelo Salmo 147:5). Bateltike, toj tsots chkiltik li jvokoltike xchiʼuk ti mu xa xuʼ chkaʼitike. Pe li Diose snaʼoj ti bu kʼalal xuʼ kuʼuntike xchiʼuk snaʼoj «ti lum achʼelutic noʼoxe» (Sl 103:14). Ta skoj ti jpasmulilutike, mu onoʼox xkaʼi ta jpastik yan velta li kʼusi mu lekuke. Yuʼun jkotoltik xuʼ chopol chkaʼi jbatik ta tsʼakal ta skoj li kʼusi laj kaltike o li kʼusi chopol ta jkʼantik bateltike xchiʼuk ti chij-itʼixaj bakʼintike. Akʼo mi muʼyuk bu jech tsnuptan li Jeovae, xaʼibe lek smelolal ti kʼu yelan chkaʼi jbatike (Is 40:28).
¿Kʼu yuʼun skʼan xkichʼtik ta mukʼ li Jeovae?
18 Li jtsʼibajom yuʼun salmoe snaʼoj ti akʼbilik jun mukʼta matanal li j-israeletike, yuʼun li Diose jaʼ noʼox la stʼuj sventa xichʼbeik li ‹skʼope›, li «chanubtaseletic» xchiʼuk li mantaletik yuʼune (kʼelo Salmo 147:19, 20). Li voʼotik eke jtaojtik jun mukʼta matanal, yuʼun voʼotik noʼox stʼujojutik Jeova sventa xkichʼbetik li sbie. Xkojtikintik li Diose xchiʼuk tsbeiltasutik li Skʼope. Taje jaʼ tskoltautik yoʼ xijkʼot ta yamigo. Skotol taje ta jtojtik tajek ta vokol. Jech kʼuchaʼal li jtsʼibajom yuʼun Salmo 147, ep tajek srasonal kuʼuntik sventa xkichʼtik ta mukʼ li Jeovae xchiʼuk sventa xkalbetik yantik ti jechuk spasik eke.
Jsaʼtik lek li kʼusitik kʼupil sba ta Vivliae
Chkojtikintik mas Jeova kʼalal ta jkʼelbetik li spasbentake
6 Li Jeovae oy yorailtak yuʼun. Jujun jabile, ta slajebaltik fevrero xchiʼuk ta oʼloltik batel mayoe, li j-israeletike chilik sigüenya mutetik ti chbatik ta nortee. Li Jeovae xi laj yalbe li j-israeletike: «Li sigüenya mut ta vinajele snaʼoj lek kʼusi ora chvil batel ta yan lum» (Jer 8:7). Jech kʼuchaʼal yakʼojbe yorail Jeova kʼusi ora chvil batel li sigüenya mutetike, jaʼ jech yakʼojbe yorail li kʼusi ora chchapanvane. Kʼalal chkiltik ti oy yorail chvil batel li mutetike, jaʼ tsvules ta joltik ti oy yorail yuʼun Jeova sventa tslajes li chopol balumil liʼe. Taje xuʼ jchʼuntik, yuʼun ta onoʼox spas (Aba 2:3).
17-23 YUʼUN FEVRERO
KʼUSITIK KʼUPIL SBA TA VIVLIA | PROVERBIOS 1
Kerem tsebetik, ¿buchʼu chachikintabeik?
Mu me kʼusi smakutik jsetʼuk sventa jtatik li matanale
16 Kerem tseb, bakʼintike xuʼ van xlik anop ti toj tsotsik li mantal chakʼ atot ameʼe xchiʼuk ti mu xaʼiboxuk smelolal ti kʼu yelan chavaʼi abae. Kʼalal jech chanop taje, xuʼ van xkap ajol xchiʼuk ti mu xa xakʼan xatun ta stojolal li Jeovae. Pe, ¿kʼusi chkʼot ta pasel mi la avikta li mantale? Te chavakʼ venta ti muʼyuk tstsakoxuk ta mukʼ li yan krixchanoetike, ti jaʼ oyoxuk ta yoʼonton ta melel li atot ameʼe xchiʼuk li ermanoetik ta tsobobbaile.
17 Li tukʼibtasel chakʼ li totil meʼiletike toj tsots me skʼoplal. Pe mi muʼyuk tstukʼibtasoxuke, ¿mi jaʼ skʼan xal ti skʼanojoxuk ta melele? (Ebr 12:8). Bateltike xuʼ van chopol chavaʼi ti kʼu yelan tstukʼibtasoxuke. Pe sventa mu jaʼuk xbat ta avoʼonton taje, jaʼ nopo ti kʼu yuʼun jech ta xalboxuke. Mas lek ti oyuk stsʼikemal avuʼune xchiʼuk ti mu xakap ta anile, yuʼun li Vivliae xi chale: «Li bochʼo bije tspajes sba ta loʼil; li bochʼo oy lec srazone snaʼ spajesel sba» (Pr 17:27). ¿Kʼusi tskoltaot sventa xachʼam kʼalal chavichʼ junuk tojobtasele? Jaʼ ti jechuk xapas atalelal kʼuchaʼal jun yijil krixchanoe, yuʼun mi jech la apase ta me xatabe sbalil xchiʼuk jaʼ muʼyuk xa chatsak ta venta ti kʼu yelan chalboxuke (Pr 1:8). Jaʼ yuʼun, toj ep me sbalil chatabe ti skʼanojik tajek Jeova li atot ameʼe. Yuʼun li stukike oy tajek ta yoʼonton tskoltaoxuk sventa xata li kuxlejale.
w05 15/2-S paj. 19, 20 par. 11, 12
Lekuk-o jkʼoplaltik ta stojolal Dios
11 Mu jxiʼtatik li krixchanoetike, jaʼuk jxiʼtatik li Diose. Stalel onoʼox ti jaʼ te chvinaj kʼu kelantik kʼalal oy kʼusi jmoj ta jpastik xchiʼuk yantike. Jkotoltik ta jkʼantik ti oyuk kamigotaktike xchiʼuk xijmuyubaj yuʼun ti lekuk xilutik ek li yantike. Kʼalal jchʼielutik xa tale o akʼo mi xjel jabilaltike, xuʼ van mas to sujutik li yantike, ti jchanbetik stalelalike o ti jaʼuk jpastik li kʼusi lek chilike. Pe teuk ta joltik un ti mu skotoluk velta tskʼanik ti lekuk xbat jkuxlejaltike. Bateltike, jaʼ noʼox tskʼanik ti oyuk xchiʼilik ta spasel li kʼusitik chopole (Pr 1:11-19). Mi oy jun yajtsʼaklom Kristo ti lik xa spas ek li kʼusitik chopole mu xa xakʼ sba ta ilel kʼu yelan ta melel (Sl 26:4). Xi pʼijubtasvan li Pabloe: «Mu xa jechuc xanopic jech cʼu chaʼal ta spasic ti jnaclejetic ta banomil ti yan sjol yoʼntonique» (Romanos 12:2, Xch’ul C’op Jtotic Dios, ta skʼop Chenalhó). Jaʼ chakʼ kipaltik Jeova sventa stsal kuʼuntik taje (Ebr 13:6).
12 Kʼalal oy kʼusi tsujvanik ta spasel yantik ti muʼyuk xa lek jkʼoplaltik chijkomutik ta stojolal Jeovae, teuk me ta joltik ti jaʼ mas tsots skʼoplal li Jeovae, ti maʼuk li kʼusi tsnop yantike o ti kʼusi lek chilike. Tskoltautik li kʼusi chal Eksodo 23:2: «Mu me xatsʼakli batel epal krixchanoetik sventa xapas li kʼusi chopole». Kʼalal la snopik jutuk mu skotoluk j-israeletik ti mu spas yuʼun Jeova li kʼusi yaloje, li Kalbe mu jechuk la spas. Jpʼel ta yoʼonton ti chkʼot ta pasel yuʼun Dios li kʼusi yaloje. Ta skoj ti jech la spase, ep la sta-o bendision (Nu 13:30; Jos 14:6-11). ¿Mi jpʼel ta koʼontontik ti lekuk-o xilutik Diose, ti maʼuk ta jpastik li kʼusi tspas jutukuk mu skotoluk krixchanoetike?
Jsaʼtik lek li kʼusitik kʼupil sba ta Vivliae
«Tsots x-avet ta be li melel pʼijilale»
7 Li buchʼutik muʼyuk spʼijilike jaʼ li buchʼutik chchʼunik noʼox ta anil li kʼusi ch-albatike xchiʼuk ti chlajik ta loʼlaele (Pr 14:15). Ep jech ta jtatik li ta cholmantale. Yuʼun ep buchʼutik loʼlabilik yuʼun jnitvanejetik ta relijion o jpolitikoetik. Junantike chopol tajek chaʼiik kʼalal chakʼik venta ti loʼlabilike. Pe li buchʼutik chalbe skʼoplal li ta Proverbios 1:22 yalel xa jech tskʼanik (Jer 5:31). Tskʼupinik spasel li kʼusi tskʼanike xchiʼuk muʼyuk oy ta yoʼontonik xchanel mi jaʼuk yakʼel ta xkuxlejalik li kʼusi chal Vivliae. Ep buchʼutik jech tsnopik kʼuchaʼal jun ants ta Quebec (Canadá) ti oy srelijione xchiʼuk ti xi laj yalbe jun stestigo Jeovae: «Mi tsloʼlaunkutik li palee, jaʼ ta smul stuk, maʼuk voʼonkutik». Mu jkʼantik jechutik kʼuchaʼal li buchʼutik yolbaj mu skʼan sta spʼijilike (Pr 1:32; 27:12).
24 YUʼUN FEVRERO–2 YUʼUN MARSO
KʼUSITIK KʼUPIL SBA TA VIVLIA | PROVERBIOS 2
¿Kʼu yuʼun ta sjunuluk koʼontontik skʼan xijchanunajutik?
Mu me xkiktatik li mantale
16 Mu jkotoltik ta jkʼupintik ti xijchanunaj xchiʼuk ti jsabetik smelolale, pe li Jeovae tskʼan ti akʼo xkakʼ ta koʼontontik yaʼibel smelolal li kʼusi melele (kʼelo Proverbios 2:4-6). Kʼalal jech ta jpastike, ep kʼusitik lek ta jtatik. Jun ermano ti Corey sbie chal ti kʼalal tskʼel Svivliae, jun noʼox versikulo chakʼ ta yoʼonton xchanel. Xi chale: «Ta jkʼel li tsʼibetik ta yok vune, ta jsaʼ ti bu chtakvan batel jujun versikuloe xchiʼuk ta jsabe mas smelolal. […] Kʼalal jech ta jpase, ta jtabe mas sbalil ti chichanunaje». Mu ventauk mi jech ta jpastik, pe mi ta jchʼakbetik yorail xchiʼuk mi chkakʼtik persa ta jchan li Jvivliatike, chkakʼtik ta ilel ti ep sbalil chkiltik li mantale (Sl 1:1-3).
«Tsots x-avet ta be li melel pʼijilale»
3 Li buchʼu pʼije tstunes li kʼusitik xojtikin sventa lekuk kʼusi xkʼot ta nopel yuʼune. Pe li melel pʼijilale oy to kʼusi yan smakoj. Li Vivliae xi chale: «Li kʼusi baʼyel skʼan pasel sventa xijpʼijube jaʼ ti jxiʼtatik li Jeovae. Li yojtikinobil yuʼun Chʼul Diose jaʼ li yaʼibel smelolale» (Pr 9:10). Jaʼ yuʼun, kʼalal oy kʼusi tsots skʼoplal ta jnop ta jpastike, skʼan teuk ta joltik «li yojtikinobil yuʼun Chʼul Diose», jaʼ xkaltik, li kʼusi tsnop Jeovae. Sventa spas kuʼuntike, skʼan jchantik li Vivliae xchiʼuk li jvuntike. Mi jech ta jpastike, chkakʼtik ta ilel ti pʼijutik ta melele (Pr 2:5-7).
4 Jaʼ noʼox xuʼ te jtatik melel pʼijilal ta stojolal li Jeovae (Ro 16:27). ¿Kʼu yuʼun? Baʼyel, yuʼun jaʼ Jpasvanej kuʼuntik xchiʼuk xojtikin lek li kʼusitik spasoje (Sl 104:24). Xchibal, yuʼun te chvinaj spʼijilal ta skotol li kʼusitik tspase (Ro 11:33). Yoxibal, yuʼun li buchʼutik chakʼ ta xkuxlejal li tojobtasel chakʼe ta stabeik sbalil (Pr 2:10-12). Mi ta jkʼantik pʼijutik ta melele, skʼan jtsaktik ta venta li oxtos kʼusi laj kalbetik skʼoplale xchiʼuk xkakʼtik ti jaʼuk akʼo sbeiltasutike.
Kerem tsebetik, tsatsubtaso li xchʼunel avoʼontonike
2 Li avie ep krixchanoetik ti muʼyuk xchʼunojik Diose. Mi kerem tsebot ti yakal chatun ta stojolal Jeovae o ti yakal chavojtikine, xuʼ van xanop bakʼintik ti kʼuxi xuʼ xavakʼ ta ilel ti jaʼ Jpasvanej kuʼuntik li Diose. Pe jaʼ tskoltaot li Vivliae sventa xanop lek li kʼusi chachan ta eskuelae xchiʼuk li kʼusi cha-albate, vaʼun jaʼ me tskoltaot yoʼ xavakʼ lek venta atuk. Xi chal li Skʼop Diose: «Li tojobtasele te oy o sat ta atojol». ¿Kʼusi skʼan xal taje? Jaʼ ti tskoltaot yoʼ mu xatsak ta mukʼ li jecheʼ chanubtaseletike xchiʼuk ti xatsatsubtas li xchʼunel avoʼonton ta stojolal li Jeovae (kʼelo Proverbios 2:10-12).
3 Sventa tsotsuk lek xchʼunel koʼontontik ta stojolal li Jeovae, skʼan me xkojtikintik lek (1Ti 2:4). Jaʼ yuʼun, kʼalal chachan Avivliae xchiʼuk li yan jvuntike skʼan me xanopbe lek skʼoplal. Akʼbo yipal ta yaʼibel smelolal li kʼusi chachane (Mt 13:23). Li ta xchanobil liʼe ta jkʼeltik mi jaʼ jech chachanunaj kʼuchaʼal taje, mas to chatabe sprevail ti jaʼ Jpasvanej kuʼuntik li Jeovae xchiʼuk ti jaʼ Skʼop li Vivliae. Vaʼun mu xa persauk ta jkʼantik yan prevaetik, yuʼun taje «jaʼ slekil vinajeb» (Ebr 11:1).
Jsaʼtik lek li kʼusitik kʼupil sba ta Vivliae
Jechuk-o xavamigoin li Jeovae
10 ¿Kʼuxi lik avamigoin li Jeovae? Jaʼo kʼalal lik achan li Vivliae, yuʼun lik avojtikin li Jeovae xchiʼuk mas lek laj avil aba xchiʼuk. Li yamigoinel Jeovae xkoʼolaj kʼuchaʼal kʼokʼ. Sventa mu xtupʼe, skʼan xachuchbe-o skʼakʼal. Taje jaʼ jech skʼan xapas sventa xavamigoin-o li Jeovae, yuʼun skʼan xavojtikin-o batel (Pr 2:1-5).