Sgayeta kuni tsʼiʼtak
XI LA stsʼiba Nick ti te nakal ta Oregón (Estados Unidos): «Ta slikebaltik 2014, lik jlokʼes ta xanbal li chaʼkot kuni tsʼiʼtak li ta yutil jteklume. Te onoʼox chcholik mantal ta karrito li stestigotak Jeovae, lek smeltsanoj sbaik xchiʼuk stseʼet noʼox sat tskʼoponik li krixchanoetik te chjelave.
»Li vaʼ testigoetike maʼuk noʼox lek yoʼontonik ta stojolal li krixchanoetike, yuʼun lek yoʼontonik xtok ta stojolal li kuni tsʼiʼtake. Jun veltae, te oy ta karrito jun ants ti Elaine sbie, laj yakʼanbe gayeta xchaʼkotal li kun tsʼiʼtake. Kʼalal te chi˗echʼilane, li kuni tsʼiʼtake chjochikun batel ti bu snaʼoj ch˗akʼbat yuni gayetaike.
»Kʼalal echʼ jayibuk ue, li kuni tsʼiʼtake xmuyubajik tajek ta skoj ti ch˗akʼbat sgayetaike. Yan li voʼone te chiloʼilaj jlikeluk xchiʼuk li testigoetike. Pe chkichʼ noʼox jpʼijil ti kʼu yelan ta jchiʼinik ta loʼile. Mas xa ox ta 70 jabilal, pe mu toʼox jnaʼ lek li kʼusi xchʼunojik li stestigotak Jeovae. Ta skoj ti muʼyuk lek kʼusi kiloj li ta yantik relijione, jaʼ mas lek chkaʼi ti ta jchan jtuk li Jvivliae.
»Ta mas tsʼakal jutuke, laj kil yan stestigotak Jeova ti chcholik mantal ta karrito li ta jteklume. Toj lek yoʼontonik ek. Li kʼusi ta jakʼbeike naka ta Vivlia tstakʼbeikun. Jaʼ yuʼun, mas lik jpat koʼonton ta stojolalik.
»Jun veltae, xi la sjakʼbun li Elaine: ‹¿Mi jaʼ jun matanal yuʼun Dios xanaʼ li chonbolometike?›. Laj kalbe ti jaʼe. Vaʼun, la xchanbun li kʼusi chal Isaias 11:6 kʼalal ta 9. Li vaʼ kʼakʼale, jel li kʼusi ta jnope, pe muʼyuk toʼox chkichʼ batel vunetik.
»Li vaʼ kʼakʼaletike, jech˗o la xchiʼinikun ta loʼil li Elaine xchiʼuk smalal ti Brent sbie. Jaʼ laj kalbekutik skʼoplal li kʼusitik tsotsik ta aʼibel smelolale. Laj yalbeikun ti akʼo jchan Mateo kʼalal ta Echos sventa xkaʼibe smelolal kʼusi skʼan xal ti ta jtsʼaklitik batel Kristoe. Vaʼun, jech la jpas. Mu ta sjaliluke, lik yakʼbeikun estudio li Brent xchiʼuk Elaine. Taje jaʼo jech kʼot ta pasel li ta oʼloltik batel 2016.
»Ta sjunul koʼonton ta jmala ti xtal yakʼbeikun chanubtasel ta Vivlia jujun xemanae xchiʼuk ti xibat li ta tsobajeletike. Ximuyubaj tajek xchiʼuk ta jtoj ta vokol ti xuʼ jchan li kʼusi chakʼ ta chanel li Vivliae. Kʼalal echʼ xa ox mas ta jun jabile, laj kichʼ voʼ. Avie, 79 xa jabilal xchiʼuk jnaʼoj ti ta melel relijion oyune. Li Jeovae yakʼojbun bendision, yuʼun te jkʼoplal li ta utsʼ alalil ta spʼejel balumil ti chtunik ta stojolale».