¿Kʼusi xuʼ jpastik sventa mu xlik jtoy jbatik kʼuchaʼal li yantike?
¿MI AVAKʼOJ venta ti oy epal krixchanoetik tsnopik ti oy sderechoik sventa oy kʼusi xichʼ akʼbel sbainik o ti xichʼik ichʼel ta mukʼe? Akʼo mi xichʼik ichʼel ta mukʼ, tsnopik ti oy to kʼusi skʼan xichʼik pasbele. Taje mu labaluk sba chkaʼitik, yuʼun jech onoʼox yaloj Vivlia ti chkʼot ta pasele, ti tstoy sbaike xchiʼuk ti mu kʼusi snaʼ stojik ta vokole (2 Tim. 3:2).
Melel onoʼox, li toybaile voʼne xa onoʼox slikel. Li Adan xchiʼuk Evae la snopik ti oy sderecho tsnop stukik li kʼusi lek xchiʼuk li kʼusi chopole, ta skoj taje chkil jvokoltik. Ta mas tsʼakale, li ajvalil Usias ta Judae oy kʼusi toj chopol la spas, yuʼun la xchikʼ pom li ta temploe akʼo mi maʼuk oy ta sba xchikʼel (2 Kron. 26:18, 19). Li jfariseoetik xchiʼuk jsaduseoetike la snopik ti mas to staik-o ichʼel ta mukʼ yuʼun Jeova ta skoj ti jaʼik snitilulal Abraane (Mat. 3:9).
Ta skoj ti kuxulutik ta jun balumil ti noj ta krixchanoetik ti jtoybaetike, xibal sba ti jchanbetik li stalelalike (Gal. 5:26). Xuʼ van jnoptik ti jtatik-o mas ichʼel ta mukʼe o ti oyuk kʼusitik xkichʼtik akʼbel jbaintike. ¿Kʼusi xuʼ jpastik sventa mu jechuk xlik jnoptik taje? Baʼyele, jaʼ ti skʼan xkaʼibetik smelolal kʼu yelan chil Jeova li toybaile. Jkʼeltik batel chib beiltaseletik ta Vivlia.
Li Jeovae jaʼ chakʼ kʼusi jbaintik ta jujuntal. Jkʼeltik junantik skʼelobiltak.
Li ta utsʼ alalile, li Jeovae tskʼan ti xichʼ ta mukʼ smalal li antse, li ants eke jaʼ ti xkʼanat yuʼun li smalale (Efes. 5:33). Li buchʼu nupuneme sta-o ti jaʼ noʼox xakʼbe ta ilel kʼanelal li snup xchiʼile, muʼyuk buchʼu yan (1 Kor. 7:3). Li totil meʼiletik eke sta-o ti xchʼunbat smantalik yuʼun li yalab xnichʼnabike. Li alab nichʼnabiletik eke sta-o ti xchabiatik xchiʼuk ti xkʼanatik yuʼun li stot smeʼike (2 Kor. 12:14; Efes. 6:2).
Li ta tsobobbaile, sta-o ti xkichʼtik ta mukʼ li moletik ta tsobobbail ta skoj ti tsots ch-abtejike (1 Tes. 5:12). Akʼo mi jech, muʼyuk sderechoik sventa xalbeik kʼusi skʼan spasik li yermanotakike (1 Ped. 5:2, 3).
Li Diose yaloj ti skʼan jtojbetik patan xchiʼuk ti xkichʼtik ta mukʼ li ajvaliletike (Rom. 13:1, 6, 7).
Toj echʼ noʼox skʼanojutik li Jeovae xchiʼuk ep kʼusitik chakʼbutik akʼo mi mu jtatik-o. Ta skoj ti jpasmulilutike, jtatik-o ti xijchamutike (Rom. 6:23). Pe ta skoj li tukʼil kʼanelal yuʼun Jeovae, ep kʼusitik lek chakʼbutik (Sal. 103:10, 11). Skotol li bendisionetik yakʼojbutike maʼuk ta skoj ti jtatik-oe, yuʼun jaʼ ta skoj li slekil yutsil yoʼontone (Rom. 12:6-8; Efes. 2:8).
¿KʼUSI TSKOLTAUTIK SVENTA MU JTOY JBATIKE?
Mu xachanbe stalelal li balumile. Akʼo mi mu xkakʼtik venta, pe xuʼ me xlik jnoptik ta anil ti jtatik-o ti oyuk kʼusi mas xkichʼtik akʼbel jbaintike. Sventa xkaʼibetik smelolale, li Jesuse laj yalbe skʼoplal jun loʼil ti chakʼ ta ilel ti ta anil xuʼ jech xlik jnoptike. Laj yalbe skʼoplal jun vinik ti tsaʼ yaj-abteltak sventa x-abtejik ti bu stsʼunoj s-uvae, ti jun denario tstoj ta kʼakʼale. Laje, laj to saʼ yan yaj-abteltak ti mas xa jutuk abtejike, junantike kʼajomal xa noʼox jun ora. Kʼalal ikʼub xa oxe, jun denario la stoj skotol li yaj-abteltake. Li buchʼutik sob noʼox likik ta abtele la snopik ti mas to ch-akʼbat stojolike, yuʼun tsots tajek abtejik kʼalal kʼux toʼox tajek kʼakʼale (Mat. 20:1-16). Taje jech laj yakʼbe yil yajchankʼoptak Jesus ti skʼan jun noʼox yoʼontonik xchiʼuk li kʼusi ch-akʼbatik yuʼun li Diose.
Li viniketik ti abtejik sjunul kʼakʼale la snopik ti staik-o mas xichʼik tojele.
Xanaʼuk stojel ta vokol, mu xatoy aba (1 Tes. 5:18). Jchanbetik stalelal li jtakbol Pabloe, li stuke muʼyuk la skʼanbe takʼin li ermanoetik ta Korinto akʼo mi oy sderecho ti jech spase (1 Kor. 9:11-14). Jaʼ mas lek ti junuk noʼox koʼontontik xchiʼuk li kʼusi oy kuʼuntike, mu jtoy jbatik.
Li jtakbol Pabloe muʼyuk la skʼan ta persa ti xichʼ koltael ta takʼine.
Bikʼit xavakʼ aba. Kʼalal oy buchʼu tsnop ti tsots skʼoplal chaʼi sbae, xuʼ me xlik snop ti sta-o kʼusi mas x-akʼbat sbaine. Pe mi bikʼit chakʼ sbae, jaʼ chkoltaat sventa mu jechuk snop.
Ta skoj ti bikʼit laj yakʼ sba li j-alkʼop Daniele, kʼanbil yuʼun li Jeovae.
Li j-alkʼop Daniele bikʼit laj yakʼ sba xchiʼuk lek ta chanbel stalelal. Li stuke likem talel ta jun utsʼ alalil ti tsots skʼoplale, lek xvinaj spat xokon, lek pʼij xchiʼuk ep kʼusitik xtojob spasel. Jaʼ yuʼun, xuʼ ox van la snop ti sta-o li kʼusi akʼbat sbaine xchiʼuk ti laj yichʼ ichʼel ta mukʼe (Dan. 1:3, 4, 19, 20). Pe bikʼit laj yakʼ sba, jaʼ yuʼun xi laj yal Jeova ta stojolale: «Voʼot ti toj lek kʼanbilote» (Dan. 2:30; 10:11, 12).
Jaʼ yuʼun, mu me jchanbetik stoyobbail li krixchanoetik avi kʼakʼale, jaʼ mas lek ti junuk noʼox koʼontontik xchiʼuk li bendision chakʼbutik Jeova ta skoj li slekil yutsil yoʼontone.