Chapano avoʼonton

Li kʼusi ta jchantik ta stojolal Jeova li ta Vivliae, ta jkʼantik ti xkʼot ta koʼontontike, ti stij koʼontontike, ti sjel jnopbentike, ti sjel li kʼusi oy ta koʼontontike xchiʼuk ti kʼu yelan chkaʼi jbatike. Lek ti jchanbetik stalelal li Esdrase, yuʼun baʼyel xa onoʼox la xchapan yoʼonton sventa xchanbe li Smantal Jeovae (Esd. 7:10). ¿Kʼuxi xuʼ jech xapas ek?

Paso orasion. Kʼalal skʼan to xlik chanunajane, kʼanbo koltael Jeova sventa xavaʼibe smelolal li kʼusi chachane xchiʼuk ti xavakʼ ta akuxlejale (Sal. 119:​18, 34).

Bikʼit xavakʼ aba. Li Diose muʼyuk chakʼbe snaʼ kʼusi melel li buchʼutik xtoyet chaʼi sbaike xchiʼuk ti tspat yoʼontonik ta spʼijil stukike (Luk. 10:21). Kʼalal oy kʼusi chasabe skʼoplale, maʼukuk me sventa labal sba xilik yantik ti ep kʼusi xanaʼe. Mi laj avakʼ venta ti oy kʼusi skʼan xatukʼibtas kʼalal chachan Avivliae, bikʼit xavakʼ aba xchiʼuk jelo li atalelale.

Chikintao junuk kʼejoj. Li kʼejoje chkʼot ta koʼontontik xchiʼuk jaʼ tskoltautik sventa jchapan jbatik yoʼ xkichʼtik ta mukʼ li Diose. Kʼalal skʼan to jchan li Jvivliatike, jchikintatik junuk kʼejoj, yuʼun jaʼ tskoltautik sventa jaʼuk noʼox jnopbetik skʼoplal li kʼusi ta jchantik ta stojolal Jeovae, vaʼun jaʼ jech chkʼot ta koʼontontik li kʼusi ta jchantike.