KOLTAEL SVENTA UTSʼ ALALILETIK | TOTIL ME’ILETIK
¿Mi lek ti xbat kikta ta snail ololetik li kalab jnichʼnabe?
Junantik totil meʼiletik ti ch˗abtejike, tsnop chikʼik batel ta snail ololetik o ti bu xuʼ xchanubtasbat li yalab xnichʼnabike (guardería). ¿Mi lek ti jech chapas eke?
¿Kʼusitik skʼan xajakʼbe aba?
¿Mi xuʼ van sok ti kʼu yelan xkil jba xchiʼuk li jkʼoxtake? Yikʼaluk van. Kʼalal jaʼ to chchʼi tal li jun olole, ta anil noʼox chchan li kʼusi chil ta stojolal li yantike. Jaʼ yuʼun, akʼo persa xachi’in k’alal jaʼ to chchʼiik talele (Deuteronomio 6:6, 7).
Mi chanop chavikʼ batel ta guardería li akʼoxe, nopo kʼusi xuʼ xapas sventa mu sok ti kʼu yelan xavil abaike.
¿Mi tstsak to van ta venta li kʼusi chkakʼbe xchane? Yikʼaluk van. Li livro Hold On to Your Kids (Aférrese a sus hijos) xi chale: «Mi mas jal chchiʼin xchiʼiltak ta chanun li akʼoxtake, mas ep kʼusi chchan ta stojolalik».
Mi chanop chavikʼ batel ta guardería li akʼoxe, nopo mi xuʼ to avuʼun xachanubtas jech kʼuchaʼal chakʼane.
Mi la jtak batel ta guarderiae, ¿mi chkoltaat sventa masuk xchan kʼalal mi och ta chanune? Junantike tsnopik ti tanae. Junantik xtoke tsnopik ti jutuk chkoltaat li ololetike o muʼyuk chkoltaatik. Pe labal sba kʼusi laj yal li Penelope Leach ti jaʼ psicóloga sventa ololetike, xi chale: «Mu me xanopik ti jaʼ to lek chbat xkuxlejal avalab anichʼnabik mi ochik ta chanune xchiʼuk mu xanopik ti mas to lek chbat xkuxlejal mi mas ep chanunajik o mi bikʼit noʼox la atakik batel ta chanune. Mi jech chanopike, xkoʼolaj ti muʼyuk sbalil chavilik ti kʼu yelan achanubtasojik talel kʼalal ayane».
Mi chanop chavikʼ batel ta guardería li akʼoxe, nopo mi persa skʼan xbat o mi tstabe sbalil
¿Mi oy van buchʼu junukal kuʼunkutik xuʼ xkom ta na sventa xchiʼin li jkʼoxkutike? Junantik nupultsʼakaletike ch˗abtej xchaʼvoʼalik ta skoj ti tskʼanik ti oyuk kʼusi lek x-ayan yuʼunike. ¿Mi persa skʼan jech xapasik?
Mi chanop chavikʼ batel ta guardería li akʼoxe, nopo mi persa skʼan jech xapasik o mi xuʼ van xa jutukajes li kʼusi oy avuʼunik sventa oyuk buchʼu junukal xkom avuʼunik ta xchabiel li akʼoxike.
Kʼalal mi laj xa ox akʼelik lek kʼusi sbalil tstabe o kʼusi xuʼ snuptan li akʼoxik mi la avikʼik batel ta guarderiae, jaʼ to xuʼ xanopik mi chavikʼik onoʼox batel. Pe mi kʼot onoʼox ta nopel avuʼunik ti chavikʼik batele, oy to me kʼusi skʼan xatsakik ta venta.
Li kʼusi xuʼ xapase
Xi chal li Vivliae: «Li buchʼu pʼije tsnop lek li kʼusi tspase» (Proverbios 14:15). Jech kʼuchaʼal chal li beiltasel liʼe, skʼan me xanop lek buchʼu chavakʼbe xchabi li akʼoxe.
¿Mi oy bu yan xuʼ xavakʼ komel?
Junantik totil meʼiletike tsnop chikʼik batel yalab xnichʼnabik ta jpʼej na ti jaʼ sventa xchabiik ololetike. Tee maʼuk noʼox jun li buchʼu chchabivane xchiʼuk juteb noʼox li ololetik tskʼelike.
Yan totil meʼiletik xtoke tskʼanbeik yutsʼ yalalik ti akʼo xkʼelbat li yalab xnichʼnabike o junantike oy buchʼu tstojik sventa xkʼelbatik (niñera), mi moʼoje jaʼ chakʼbeik skʼel li buchʼu te ch˗abtej ta snaik ti te nakale.
Skotol li kʼusi laj yichʼ alele xuʼ me stabe sbalil li olole o xuʼ me mu stabe. ¿Kʼu yuʼun mu xajakʼbe sloʼil junantik totil meʼil ti jech spasojik talel jech kʼuchaʼal laj yichʼ alel li ta mantal liʼe? Xi chal li Vivliae: «Li pʼijilale te oy ta stojolal li buchʼutik tsaʼik tojobtasele» (Proverbios 13:10).
¿Kʼusi xuʼ xapas mi kʼot onoʼox ta nopel avuʼun ti chavikʼ batel ta guarderiae?
Sabo skʼoplal ti bu chavikta komele
¿Mi oy spermiso sventa x-abtej xchiʼuk mi chchʼunbeik smantal li ajvaliletike?¿Kʼu yelan ojtikinbil?
¿Mi lek sak xchiʼuk mi lek kʼelbil?
¿Kʼusitik chakʼbeik spas li ololetike?a
Sabo skʼoplal li buchʼutik chkʼelvanike
¿Mi chanubtasbilik lek sventa xchanubtasvanik xchiʼuk mi snaʼ kʼusi tspasik mi oy kʼusi la snuptan li ololetike (resucitación cardiopulmonar)?
¿Mi xuʼ xa jakʼ mi muʼyuk kʼusi chopol spasojik li buchʼutik te ch˗abtejike?
¿Mi nopajtik noʼox chjel li buchʼutik te ch˗abtejike? Mi jeche, vokol me chnop akʼox ta stojolal li buchʼu chkʼelate.
¿Jayvoʼ ololetik tskʼel li jujun j˗abtele? Mi ep ololetik tskʼele, xuʼ me mu xa lekuk xichʼ chabiel li akʼoxe. Li kʼusi chichʼ tsakel ta venta ti kʼu yelan chichʼ chabiel li jun olole, jaʼ li sjabilale xchiʼuk li kʼusi xtojob spasele.
Li buchʼutik te ch˗abtejike, ¿mi tstsakik ta venta mi oy kʼusi laj avalbee? ¿Mi chalbeikot mi oy kʼusi tsvul yoʼontonik ta stojolal li akʼoxe?
a Jech kʼuchaʼal liʼe, ¿mi jal ch˗akʼbat skʼelik television o mi oy kʼusi yan ch˗akʼbat spasik sventa xtojobikuk stunesel li snopbenik xchiʼuk li sbekʼtalike?