¿Mi ta melel tstsobvan li Olimpiadaetike? | ¿Kʼusi chal li Vivliae?

Li ta verano ta 2024, te van voʼmil miyon krixchanoetik tskʼelik k’u yelan chtajinik li jtajimoletik ti likemik ta 206 mukʼtik lumetik xchiʼuk bikʼtal lumetik (juegos Olímpicos). Li Thomas Bach, ti jaʼ presidente li ta Comité Olímpico Internacionale, xi laj yale: «Li tajimoletik li’e, tstsob li krixchanoetik ta spʼejel balumil xchiʼuk chakʼ ti junuk no’ox yoʼontonike». Xi to laj yale: «Jkʼupintik li tajimoletik li’e, yuʼun jaʼ no’ox stuk ti xuʼ tstsobutike xchiʼuk ti jun koʼontontik yuʼune».

Li tajimoletik ta Olimpiadae, ¿mi xuʼ tstsobutik xchiʼuk ti jun koʼontontik yuʼune? ¿Mi ta sta yorail ti ta jkʼupintik skotol taje?

¿Mi ta melel tstsobvan xchiʼuk ti jun koʼontontik yuʼune?

Li tajimoletik ta Olimpiada ta 2024, maʼuk noʼox stijojbe yoʼonton krixchanoetik sventa li tajimole. Yuʼun jamal yakʼoj ta ilel xtok ti jelel kʼusi tsnopik sventa politika xchiʼuk yan kʼusitik ti xchʼak-o sba yuʼun li krixchanoetike, jech kʼuchaʼal ta sventa li sderecho li krixchanoetike, ti yan-o stsʼunbalike, ti jelel srelijionike xchiʼuk ti kʼu yelan xkuxlejalike.

Li tajimoletik chichʼ chapanel ti tstsob sba yuʼun epal krixchanoetike jech kʼuchaʼal li Olimpiadaetike, tskʼupinik onoʼox li krixchanoetike. Akʼo mi jech, tstijbe yoʼonton krixchanoetik sventa xakʼik ta ilel jtosuk talelal o ti oyuk kʼusi spasik ti chchʼak li krixchanoetike.

Li Vivliae yaloj xa onoʼox kʼu yelan stalelal krixchanoetik ta jkʼakʼaliltike xchiʼuk ti jaʼ chchʼak-o sba li krixchanoetike (2 Timoteo 3:1-5). Sventa xanabe mas skʼoplal li albil kʼope, kʼelo li mantal liʼe: «¿Mi yaloj xa onoʼox Vivlia kʼu yelan stalelal krixchanoetik li avie?».

Xuʼ jmoj tsobolutik xchiʼuk ti junuk no’ox koʼontontike

Li Vivlia chal kʼuxi xuʼ jtatik jun oʼontonal xchiʼuk ti jmoj no’ox oyutik ta melele. Chalbutik xtok ti xuʼ tstsobutik jun Ajvalil ta vinajel, jaʼ li Ajvalilal yuʼun Diose (Lukas 4:43; Mateo 6:10).

Li Ajvalil li ta Ajvalilal yuʼun Dios ti jaʼ li Jesukristoe, jaʼ chakʼ jun oʼontonal ta spʼejel li balumile. Xi chal li Vivliae:

• «Xnichinajik noʼox li buchʼutik tukʼike, ta x-epaj li jun oʼontonale» (Salmo 72:7).

• «Tspoj li povreetik ti x˗avet tskʼanik koltaele [...]. Chpojatik kʼalal chichʼik ilbajinele xchiʼuk kʼalal tstsakatik ta kʼope» (Salmo 72:12, 14).

Li kʼusitik laj yakʼ ta chanel Jesuse, jaʼ koltavanem avi kʼakʼal sventa jmojuk tsobol oy ta smiyonal krixchanoetik ta 239 mukʼtik lumetik xchiʼuk bikʼtal lumetik. Li stestigotak Jeova ta spʼejel balumile sjeloj xkuxlejalik, yuʼun jaʼ chchʼunik li kʼusi chal Vivliae. Jaʼ yuʼun, jmoj tsobol oyik. Sventa xanaʼ kʼuxi pasem yuʼunike kʼelo li revista Li Jkʼel-osil ta toyole ti xi sbie: «Jlokʼes ta koʼontontik li pʼajbaile».