¿Mi chchapaj˗o kʼop mi la jpaktik sutele?

Li avie, mas xa ep krixchanoetik tsnopik ti jaʼ to te chchapaj skʼopik o svokolik mi la spakik sutel o mi la slikesik kʼope. Pe li kʼusi tsnopike mu jechuk chanubtasvan komel li Jesuse. Jkʼeltik batel junantik li kʼusi laj yal xchiʼuk li kʼusi la spase.

Li kʼusi laj yal Jesuse

Li ta mantal laj yal Jesus kʼalal jaʼo te oy ta vitse, laj yal ti maʼuk te chchapaj˗o jkʼoptik mi chlik skʼakʼal koʼontontik, mi chijmajvan o ti jlikestik kʼope. Jkʼeltik batel junchibuk skʼelobil.

• «Li kʼusitik chakʼan akʼo spasboxuk li krixchanoetike jechuk me xapasbeik ek» (Mateo 7:12; Lukas 6:31). Li kʼusi laj yal Jesuse jaʼ ti skʼan lekuk jtalelaltik ta stojolal yantik jech kʼuchaʼal ta jkʼantik pasbel eke, taje ojtikinbil kʼuchaʼal li Mukʼul Lekil Mantale.a Muʼyuk onoʼox buchʼu ti lek xa chaʼi chichʼ utilanel, tsotsik xa chichʼ kʼoponel o ti oy kʼusi chopol tspasbate. Vaʼun chaʼa, ¿mi mu jechuk ti skʼan xij˗ichʼvan ta mukʼ xchiʼuk ti xkakʼtik ta ilel slekil koʼontontik ta stojolal li yantike akʼo mi mu koʼoluk li kʼusi ta jnoptik xchiʼukike?

• «Li buchʼu chtʼaxbot majel ta xokon abatsʼisate, akʼbo xtok li jot xokon asate» (Mateo 5:38, 39; Lukas 6:29). Li kʼusi laj yal Jesuse maʼuk chakʼ ta aʼiel ti lek xa chkaʼitik kʼalal chkichʼtik ilbajinel o kʼalal oy kʼusi chopol chkichʼtik pasbele. Moʼoj, li kʼusi la skʼan laj yale jaʼ ti muʼyuk lek mi ta jpak jkʼoplaltik jech kʼuchaʼal chchanubtasvanik yaʼeluk junantik jnitvanejetik ta relijion li vaʼ orae. Jaʼ yuʼun, li Jesuse la xchanubtas yajtsʼaklomtak ti akʼo mu spakik sutel kʼalal oy kʼusi chopol tspasbatike.b

• «Kʼanik˗o me li avajkontratakike» (Mateo 5:43, 44; Lukas 6:27). Li Jesuse laj yal ti skʼan lekuk koʼontontik ta stojolal li buchʼu oy kʼusi chopol tspasbutik o ti spʼajojutike. Pe taje maʼuk skʼan xal ti lek xa chkiltik li kʼusi chopol tspasike.c Akʼo mi jech, mi lek kʼusi ta jpastik ta stojolalike, xuʼ xlekub yoʼontonik xchiʼuk muʼyuk xa van kʼusi chopol tspasbutik o chalbutik.

Li kʼusi la spas Jesus xchiʼuk li kʼusi tspas ta jelavele

Li Jesuse laj yakʼ ta chanel ti maʼuk xa te chchapaj jkʼoptik mi la jpaktik sutel o ti jlikestik kʼope. Jech kʼuchaʼal liʼe, kʼalal laj yichʼ chukel batel li Jesuse, oy jun yajtsʼaklom ti tskʼan ox tspas kʼop sventa mu xichʼ ikʼel batele, pe xi laj yal li Jesuse: «Tikʼo ochel ta sna li a˗espadae, yuʼun skotol li buchʼu chakʼ espadae, ta espada chlaj ek» (Mateo 26:52). Li Jesuse jamal laj yakʼ ta ilel xtok ti la skʼan li yajkontratake, laj yakʼan ta perton li buchʼutik oy kʼusi chopol pasbate xchiʼuk la spas orasion ta stojolalik (Lukas 23:33, 34; 1 Pedro 2:23).

Li Vivliae xi chalbe skʼoplal li Jesuse: «Bankilal J˗akʼ˗jun˗oʼontonal». Jech xtok, chal ti poʼot xa slajesbe skʼoplal ta j˗echʼel li kʼusitik chlik˗o kʼope (Isaias 9:6, 7). Mi chakʼan to chanabe mas skʼoplal li kʼusitik lekik chkʼot ta pasel ta jelavele, kʼelo li mantal «Ta onoʼox xlaj skʼoplal li paskʼopetike».