¿Mi jaʼ van tsta-o skolebalik ti chcholik mantal ta naetike?

Moʼoj. Li voʼonkutike jnaʼojkutik ti maʼuk ta jta-o jkolebalkutik ti ta jcholkutik mantal ta naetike (Efesios 2:8). ¿Kʼu yuʼun?

Jnoptik avaʼi ta stojolal jun vinik ti toj lek yoʼontone, chal ti chakʼbe jun lekil matanal li buchʼutik chbatik ti bu tstʼuj sventa tstsob sbaike xchiʼuk ti kʼusi kʼakʼalil chale. Mi yalojbutik lek srasonal ti xuʼ jpat koʼontontik ta sventa li kʼusi yaloj chakʼe, ¿mi mu ta meleluk ti chijbat ti bu chale? Pe maʼuk noʼox ti chijbate, yuʼun chkalbetik xtok kutsʼ kalaltik xchiʼuk kamigotaktik yoʼ staik li matanal eke. Akʼo mi jech, mi junuk buchʼu sta-o li matanal ta skoj noʼox ti la xchʼunik li kʼusi laj yal li vinike. Moʼoj , yuʼun li matanal laj kichʼtike jaʼ ta skoj ti jech lok ta yoʼonton chakʼbutik li vinik taje.

Li stestigounkutik Jeova eke jpatoj koʼontonkutik ta stojolal Dios ti ta onoʼox xakʼbe kuxlejal sbatel osil li buchʼutik chchʼunbeik smantale (Romanos 6:23). Ta skoj ti oy ta koʼontonkutik ti akʼo staik yan krixchanoetik li kuxlejal taje, chkakʼkutik persa xcholbel mantal. Pe jnaʼojkutik ti maʼuk ta jta-o jkolebalkutik ti ta jcholkutik mantale (Romanos 1:17; 3:28). Ta melel, muʼyuk kʼusi stak pasel sventa jtatik-o li labal sba matanal chakʼ Diose. Xi jamal chal li Vivliae: «Jech la scoltautic. Pero mu jaʼuc ta sventa tucʼ cʼusi la jpastic ti jech la scoltautique; jaʼ ta sventa xcʼuxul yoʼnton stuc» (Tito 3:5).