¿Kʼuxi xuʼ stsal kuʼuntik li xiʼel ta sventa li lajelale?
Li kʼusi chal Vivliae
Stalel onoʼox ti oy kʼusitik ep ta jpastik ta skoj ti mu jkʼan xijchame, yuʼun jaʼ kajkontratik li lajelale (1 Korintios 15:26). Akʼo mi jech, oy buchʼutik ti toj echʼ xa noʼox chiʼik-o li ta lajelale yuʼun mu skʼan xchamik, taje jaʼ ta skoj li labtael o metsʼtaele xchiʼuk li jecheʼ chanubtaseletike. Li sibtasel taje xkoʼolaj ta yajval abtelal ti toj chopol yoʼonton ti tsmosoinvane xchiʼuk ti mu xakʼ jkʼupin jkuxlejaltike (Ebreos 2:15). Sventa mu xa xijxiʼoe, skʼan xkojtikintik li kʼusi melel chal Vivliae (Juan 8:32).
Li kʼusi melel ta sventa li lajelale
Li buchʼutik chamemik xae mu xa kʼusi snaʼik-o (Salmo 146:4). Jaʼ yuʼun, mu me jnoptik ti ta to xkil jvokoltik o ti oy to kʼusi kʼux chkaʼitik kʼalal mi lijchame, yuʼun li Vivliae chal ti xkoʼolaj ta vayel li lajelale (Salmo 13:3; Juan 11:11-14).
Li buchʼutik chamemik xae, muʼyuk kʼusi xuʼ spasbutik akʼo mi toj chopol yoʼonton echʼik, li Vivliae jamal chal ti «mu xa kʼusi stakʼ spasik ta lajelale» xchiʼuk ti «laj xa skʼoplal [...] ti chpʼajvanike xchiʼuk ti ch-itʼixtavanike» (Proverbios 21:16; Eklesiastes 9:6).
Kʼalal chcham junuk krixchanoe, maʼuk te chlaj-o skotol. Koliyal ti oy chaʼkuxesele, li Diose ep buchʼutik chchaʼkuxes (Juan 5:28, 29; Echos 24:15).
Li Diose yaloj onoʼox ti chkʼot skʼakʼalil ti ‹muʼyuk xa lajelale› (Apokalipsis 21:4). Jech kʼu chaʼal chal li Vivliae, li vaʼ orae «chuʼuninik balumil li buchʼutik tukʼike xchiʼuk te chkuxiik-o sbatel osil», vaʼun muʼyuk xa ta jxiʼtatik li lajelale (Salmo 37:29).