LI KʼUSITIK TSJAKʼ KEREM TSEBETIKE
¿Mi chopol ti ta jchiʼin kaʼi ta vayel li jchiʼil noʼox ta vinikal o ta antsile?
«Kʼalal xyaket chichʼie, li kʼusi vokol laj kaʼie jaʼ ti lek chkil li keremetike. La jnop mi ch-echʼ noʼox, pe yokel-o jech chkaʼi jba» (David 23 sjabilal).
Li Davide jaʼ jun yajtsʼaklom Kristo xchiʼuk tskʼan chchʼunbe smantal li Diose. Pe ¿mi spas yuʼun li kʼusi tskʼan Diose? ¿Kʼusi tsnop Dios ta sventa li buchʼutik chchiʼin sbaik ta vayel ti xchiʼil noʼox sbaik ta vinikal o ta antsile?
¿Kʼusi chal li Vivliae?
Ta skoj ti chjel batel li kuxlejale, chjel batel li kʼusi tsnop krixchanoetik ta sventa li buchʼu chchiʼin sbaik ta vayel ti xchiʼil noʼox sbaik ta vinikal o ta antsile. Pe li yajtsʼaklomutik Kristoe, maʼuk ta jpastik li kʼusi tspasik li yan krixchanoetike. Yuʼun mu jkʼantik xij-ikʼat «batel ta jujujot ta kʼusiuk noʼox chanubtasel» jech kʼuchaʼal chal ta Efesios 4:14. Li kʼusi jnaʼojtik ta sventa li buchʼutik chchiʼin sbaik ta vayel ti xchiʼil noʼox sbaik ta vinikal o ta antsile o yan kʼusi nopem xaʼiik spasele, te lokʼem talel ta Vivliae.
Li Vivliae jamal chalbe skʼoplal li buchʼutik chchiʼin sbaik ta vayel ti xchiʼil noʼox sbaik ta vinikal o ta antsile. Jkʼeltik li kʼusi chale.
«Mu xuʼ xachiʼin ta vayel achiʼil ta vinikal jech kʼuchaʼal chachiʼin ta vayel junuk antse» (Levitiko 18:22).
«Akʼbat spasik yuʼun Dios jech kʼuchaʼal tskʼan yoʼontonike, [...] li Diose laj yakʼ ti akʼo oyuk tajek ta yoʼontonik li chiʼinejbail ta vayel ti solel kʼexlal sbae. Li antsetike la sjelik ti kʼu yelan stalel li chiʼinejbail ta vayele, jaʼ xa la spasik li kʼusi mu staleluke» (Romanos 1:24, 26).
«Mu xaloʼla aba atukik. Li jmulivajeletike, li buchʼutik chichʼ ta mukʼ santoetike, li buchʼutik tsloʼla xchiʼil ta nupunele, li viniketik ti mu xa jechuk tspasik ta sventa li chiʼinejbail ta vayele, li viniketik ti chchiʼin ta vayel xchiʼilik ta vinikale, li j˗elekʼetike, li buchʼu mu x˗echʼ yoʼontonik ta skʼanel kʼusitike, li jyakubeletike, li jchopol˗loʼiltavanejetike xchiʼuk li buchʼutik tsloʼla krixchanoetik ti jaʼ noʼox tskʼan takʼine muʼyuk bu chuʼuninik li Ajvalilal yuʼun Diose» (1 Korintios 6:9, 10).
Li smantaltak Diose jaʼ sventa jkotoltik mu ventauk kʼusi tskʼan li koʼontontik ta sventa li xchiʼinel bail ta vayele, jkotoltik skʼan jpajes jbatik sventa mu jpastik li kʼusi chopol chil Diose (Kolosenses 3:5).
¿Mi jaʼ skʼan xal ti...?
¿Mi jaʼ skʼan xal Vivlia ti jpʼajtik li buchʼutik jech stalelalike?
Maʼuk, yuʼun li Vivliae chchanubtasutik ti mu xuʼ jpʼaj batike, jech xtok chalbutik ti ‹junuk koʼontontik jkotoltik› mu ventauk kʼu yelan li jkuxlejaltike (Ebreos 12:14). Jaʼ yuʼun, chopol mi ta jlabantik o ti ta xkilbajintik li buchʼutik lek chaʼiik xchiʼinel ta vayel ti xchiʼil noʼox sbaik ta vinikale o ta antsile.
¿Mi jaʼ skʼan xal ti ta jkontraintik li smantaltak ajvalil ti xuʼ xnupunik li xchiʼil noʼox sbaik ta vinikal o ta antsile?
Li Vivliae chal ti jaʼ noʼox lek chil Dios ti xnupunik jun vinik xchiʼuk jun antse (Mateo 19:4-6). Akʼo mi jech, li voʼotike muʼyuk lek chkiltik mi jaʼuk ta jkontraintik li mantaletik ti chal ti xuʼ xnupunik li buchʼutik lek chaʼiik xchiʼinel ta vayel ti xchiʼil noʼox sbaik ta vinikal o ta antsile, yuʼun mi jech la jpastike, xyaket xa me ta jtikʼ jbatik ta politika, pe li Vivliae jamal yalojbutik ti mu stakʼ jtikʼ jbatik li ta politikae (Juan 18:36).
Pe ¿mi...?
Pe mi oy buchʼu yakal chchiʼin ta vayel xchiʼil noʼox ta vinikal o antsile, ¿mi xuʼ to van xjel stalelal?
Xuʼ. Xuʼ xjel stalelalik, yuʼun li Vivliae chalbe skʼoplal krixchanoetik ta baʼyel siglo ti jech toʼox la spasike, li karta la stakbe batel jkorintoetik li jtakbol Pabloe jamal chakʼ ta ilel ti muʼyuk chuʼuninik Ajvalilal yuʼun Dios li buchʼutik chchiʼin sbaik ta vayel ti xchiʼil noʼox sbaik ta vinikal o ta antsile xi to laj yal xtoke: «Taje jaʼ toʼox jechoxuk jlom li ta voʼnee» (1 Korintios 6:11).
Li buchʼutik ta toʼox xchiʼin sbaik ta vayel ta xchiʼil noʼox sbaik ta vinikal o antsile, ¿mi jaʼ skʼan xal ti muʼyuk xa tskʼan yoʼontonike? Moʼoj, yuʼun li Skʼop Diose xi chale: «Jaʼ lapik li achʼ talelale, yuʼun yakal ch-achʼub batel ta skoj li lekil yojtikinobile» (Kolosenses 3:10). Jaʼ yuʼun, ta kʼunkʼun chjel-o batel li xkuxlejalike.
¿Ati mi oy buchʼu tskʼan chchʼunbe smantal Dios pe ti jech to chtijbat yoʼonton ta xchiʼinel ta vayel xchiʼil noʼox ta vinikal o ta antsil une?
Kʼusiuk noʼox ti tskʼan yoʼonton li jun krixchanoe jaʼ te tsnop stuk mi chakʼ chʼiuk o ti spasat ta mantale. Pe ¿kʼuxi xuʼ stsal yuʼun? Xi chal li Vivliae: «Xanavanik-o ta stojolal li chʼul espiritue, vaʼun muʼyuk bu chapasik jtosuk li kʼusi tskʼan abekʼtalike» (Galatas 5:16).
Li ta versikuloe jamal chakʼ ta ilel ti maʼuk sk’an xal ti muʼyuk xa kʼusi chopol tsnop ta sventa mulivajel li jun krixchanoe. Moʼoj, yuʼun li kʼusi chale jaʼ ti mi la jnopes jbatik ta xchanel Jvivliatik xchiʼuk mi jech-o la jpasulantik orasione oy me yipal kuʼuntik sventa stsal kuʼuntik li kʼusi tskʼan koʼontontike xchiʼuk ti mu jpastike.
Li David ti laj kalbetik skʼoplal ta slikebale jaʼ jech la sta yipal kʼalal jech la spas taje, mas to kʼalal laj yalbe stot smeʼ li kʼusi yakal tsnuptane xi laj yale: «Xkoʼolaj kʼuchaʼal la jyales jun alal ikatsil xchiʼuk xuʼ ox van mas la jkʼupin li jkeremal ti lajuk onoʼox kalbe jtot jmeʼ ta slikebale».
Mas me xijmuyubaj mi la jchʼunbetik smantal li Diose, yuʼun li smantaltake «toj tukʼik» xchiʼuk «xpatet koʼontontik yuʼun». Mi la jchʼuntike, mukʼ me jmotontik ta jtatik (Salmo 19:8, 11).