¿Kʼusi chal Vivlia ta sventa li eutanasiae?
Li kʼusi chal Vivliae
Li Vivliae muʼyuk bu tukʼ chalbe skʼoplal li eutanasiae.a Pe akʼo mi jech, li kʼusi chal ta sventa li kuxlejal xchiʼuk li lajele jaʼ tskoltautik sventa jnoptik lek ta sventa taje. Li Vivliae chal ti mu stakʼ xijmilvane, pe taje maʼuk skʼan xal ti jsaʼtik jtosuk poxil sventa xjalij to li xkuxlejal junuk krixchanoe akʼo mi ta xa onoʼox xcham.
Li Vivliae chal ti Diose jaʼ jpasvanej kuʼuntik, yuʼun jaʼ «li snioʼal kuxlejale» (Salmo 36:9; Echos 17:28). Toj ep sbalil chil li kuxlejale, jaʼ yuʼun toj chopol chil li milvaneje, chopol chil mi chijmilvane o mi ta jmil jbatike (Eksodo 20:13; 1 Juan 3:15). Jech noxtok, chal Vivlia ti skʼan jkʼel jbatik sventa mu xkakʼ ta vokol li jkuxlejaltik xchiʼuk li xkuxlejal yantike (Deuteronomio 22:8). Jamal ta aʼyel chaʼa, ti tskʼan Dios ti oyuk sbalil xkiltik li kuxlejal ti jaʼ jun matanale.
¿Mi jaʼ ta sventa li buchʼu ip ti mu xa x-echʼ yuʼun une?
Li Vivliae muʼyuk bu chal mi stakʼ xichʼ milel li buchʼu chcham xae o li buchʼu muʼyuk xa xpoxil xchamele. Li kʼusi kʼot ta pasel ta xkuxlejal li ajvalil Saul ta Israele, jaʼ te chakʼ ta ilel taje. Kʼalal jutuk xa kuxul iktaat komele, laj yalbe yajkoltaobba ti akʼo xa noʼox xmilate (1 Samuel 31:3, 4). Li yajkoltaobbae muʼyuk bu la smil, pe ta tsʼakale laj yal jun vinik ti laj skolta Saul sventa spas li kʼusi oy ta yoʼontone, akʼo mi mu meleluk. Li Davide laj yakʼbe smulin ti la smal chichʼe, yuʼun jaʼ jech chil ti kʼu yelan chil kuxlejal li Diose (2 Samuel 1:6-16).
¿Mi skʼan van jalijestik tajek li kuxlejale?
Li Vivliae muʼyuk bu chal ti skʼan jalijestik tajek jkuxlejaltik mi jamal xvinaj ti mu xa x-echʼ kuʼuntike. Moʼoj, yuʼun oy noʼox smelolal li kʼusi chale. Li lajele jaʼ li kajkontratike, ti jaʼ ta skoj ti jkuchojtik li mulile (Romanos 5:12; 1 Korintios 15:26). Akʼo mi mu jkʼan xijcham, pe skʼan mu jxiʼtatik xtok li lajele, yuʼun li Diose chal ti chchaʼkuxes li buchʼu chameme (Juan 6:39, 40). Li buchʼutik chichʼik ta mukʼ li kuxlejale tsaʼik li lekil poxtaele. Pe taje maʼuk skʼan xal ti ta xa xichʼ saʼel tajek junuk poxil sventa xjalij li kuxlejal ti ta xa onoʼox xlaje.
Li buchʼu tsmil sbaike, ¿mi ta van xichʼik akʼbel perton?
Tana, yuʼun kʼalal chal ta Vivlia ta sventa li mulil ti mu xa xichʼ tael-o pertone muʼyuk te tsakal skʼoplal li buchʼu tsmil sbae. Akʼo mi jaʼ jun tsatsal mulil, li Diose snaʼoj lek ti kʼu yuʼun jech tsnopik ti tskʼan tsmil sbaike, jech kʼuchaʼal kʼalal ip ta sjolike, ti kʼalal lubemik tajeke, ti mu xa snaʼ kʼusi tspas ta xkuxlejalike o ti jech xa onoʼox chvokʼike (Salmo 103:13, 14).b Li Diose tspatbe yoʼonton li krixchanoetik ti oy kʼusi chat-o yoʼontonike. Jech noxtok, li Vivliae chal «ti chchaʼkuxi li buchʼutik tukʼike xchiʼuk li buchʼutik muʼyuk tukʼike» (Echos 24:15). Taje chakʼ ta ilel ti chchaʼkuxes li buchʼutik tsots spasoj smulike, ti te kapal skʼoplalik ek li buchʼutik la smil sbaike.
a Li eutanasiae, xi chichʼ albel skʼoplale: «Jaʼ li kʼusi chichʼ pasel sventa xcham li buchʼu ip chaʼi ti muʼyuk xa xpoxile sventa mu xa xil svokol» (Diccionario del estudiante, de la Real Academia Española). Li suicidio asistido sbie, jaʼ kʼalal chkoltaat yuʼun jun doktor sventa xcham li buchʼu ip chaʼie.
b Li ta Vivliae toj jutuk tajek chalbe skʼoplal li buchʼu tsmil sbae, pe skotol velta kʼalal chalbe skʼoplale, chal ti yuʼun muʼyuk la stsakik ta venta li kʼusi tsnop Diose (2 Samuel 17:23; 1 Reyes 16:18; Mateo 27:3-5).