Juan 14:27 | «Chkakʼboxuk komel li jun oʼontonale»

«Chkakʼboxuk komel li jun oʼontonale; chkakʼboxuk li jun oʼontonal kuʼune. Maʼuk jech chkakʼboxuk jech kʼuchaʼal chakʼ li krixchanoetike. Mu me xavat avoʼontonik xchiʼuk mu me xa˗alubik ta xiʼel» (Juan 14:27, Xchʼul Kʼop Dios sventa Achʼ Balumil).

«Ta xcacʼboxuc comel jun avoʼntonic. Li jun oʼntonal oy cuʼune jaʼ ta xcacʼboxuc comel. Li jun oʼntonal chcaqʼue mu jechuc jech chac cʼu chaʼal chacʼ li cristianoetique. Jaʼ yuʼun mu me xloʼilaj avoʼntonic; mu me xaxiʼic» (Juan 14:27, Xchʼul Cʼop Jtotic Dios, ta skʼop Chenalhó).

Li kʼusi skʼan xal Juan 14:27

Li Jesuse laj yalbe yajtakboltak ti akʼo mu svul tajek yoʼontonik kʼalal ta snuptan svokolike. Yuʼun jech kʼuchaʼal stuke xuʼ xkoltaatik yuʼun Dios sventa junuk noʼox yoʼontonike.

¿Kʼu yelan li jun oʼontonal laj yakʼbe komel yajtakboltak li Jesuse? Li Jesuse laj yakʼ li jun oʼontonale, jaʼ xkaltik, ti junuk noʼox yoʼontonik kʼuchaʼal stuke. Pe taje maʼuk skʼan xal ti muʼyuk xa kʼusi chopol tsnuptanik o ti muʼyuk xa chil svokolike (Juan 15:20; 16:33). Li Jesuse muʼyuk tukʼ laj yichʼ chapanel xchiʼuk laj yichʼ milel, akʼo mi jech jun noʼox yoʼonton (Lukas 23:27, 28, 32-34; 1 Pedro 2:23). Muʼyuk kʼusi la svul˗o yoʼonton, yuʼun snaʼoj ti kʼanbil xchiʼuk ti lek ilbil yuʼun li stote, li Jeovaea (Mateo 3:16, 17).

Li Jesuse laj yalbe yajchankʼoptak ti skʼanojan xchiʼuk lek chilanane. Jech xtok, laj yalanbe ti kʼanbilik xchiʼuk ti lek ch˗ilatik yuʼun li Stote, taje jaʼ koltaatik sventa junuk noʼox yoʼontonik (Juan 14:23; 15:9, 10; Romanos 5:1). Ti jech jun yoʼontonik li jtakboletike, jaʼ ta skoj ti xchʼunojik ti jaʼ Xnichʼon Dios li Jesuse. Taje jaʼ koltaatik˗o sventa stsatsub yoʼontonik xchiʼuk ti mu svul yoʼontonike (Juan 14:1). Akʼo mi muʼyuk xa te chchiʼinatik yuʼun li Jesuse, jamal laj yal komel ti chkoltaatik yuʼun li xchʼul espiritu Dios sventa junuk noʼox yoʼontonike (Juan 14:25-27). Jaʼ yuʼun, li yajchankʼoptak Jesuse xuʼ tsots yoʼontonik kʼalal ta snuptan svokolike, yuʼun snaʼojik ti lek ch˗ilatik xchiʼuk chkoltaatik yuʼun li Jeovae (Ebreos 13:6).

Li ta skʼakʼalil Jesuse, kʼalal tsta sbaik ta be o tskʼopon sbaik li krixchanoetike nopem xaʼiik ti chalbe sbaik ti junuk noʼox yoʼontonike (Mateo 10:12, 13). Li Jesuse maʼuk noʼox laj yalbe ti junuk yoʼonton li yajtakboltake, yuʼun oy kʼusi la spas sventa junuk yoʼontonik. Li jun oʼontonal akʼbatik yuʼun Jesuse jelel xchiʼuk li jun oʼontonal chakʼ balumile.b Li balumile chakʼ kiltik ti jaʼ noʼox jun koʼontontik kʼalal lek chkil jbatik xchiʼuk yantike, mi lek ojtikinbilutike, mi jkʼulejutike o kʼalal tsots jkʼoplaltike. Pe jelel tajek li jun oʼontonal chakʼ Jesuse, yuʼun jaʼ chakʼ li jun oʼontonal ti mu snaʼ xlaje.

Stsʼak loʼil ta Juan 14:27

Li kʼusi laj yal Jesus ta Juan 14:27 jaʼo laj yalbe yajtakboltak li vaʼ akʼobal kʼalal jutuk xa ox skʼan xichʼ milele. Laj yalbe ti jutuk xa skʼan xiktaan komele (Juan 13:33, 36). Laj yat˗o yoʼontonik li jtakboletike (Juan 16:6). Jaʼ yuʼun, li Jesuse la spatbe yoʼonton li yajtakboltake xchiʼuk laj yakʼbe lek srasonaltak sventa junuk noʼox yoʼontonike.

Li kʼusi laj yal komel Jesuse xuʼ spat koʼontontik li yajtsʼaklomutik Kristo avie, yuʼun xuʼ jtatik jun oʼontonal ek (2 Tesalonisenses 3:16). Kʼalal chijkʼot ta yajtsʼaklom Kristoe, chkakʼtik venta ti lek chilutik xchiʼuk skʼanojutik li Jeova xchiʼuk Jesuse (Kolosenses 3:15; 1 Juan 4:16). Jaʼ yuʼun, muʼyuk ta jvul tajek koʼontontik. ¿Kʼu yuʼun? Yuʼun jaʼ xchiʼinojutik li Jeovae (Salmo 118:6; Filipenses 4:6, 7; 2 Pedro 1:2).

Sventa xavaʼibe smelolal kʼusi chal li slivroal Juane, kʼelo li video liʼe.