Ti kʼu yelan chkaʼi jbatike
Li Vivliae chal ti oy onoʼox kʼusitik chopol ta jnoptik bateltik ti skʼan mu jnopbetik skʼoplale, pe chal xtok ti oy kʼusitik lek ti skʼan jnopbetik skʼoplale.
LI SKAPEMAL JOLTIKE
BEILTASEL TA VIVLIA: «Jaʼ lec me oy smucʼul coʼntontique, jaʼ altic noʼox me toj echʼem xuʼ cuʼuntic cʼope» (Proverbios 16:32).
¿K’USI SK’AN XAL? Tsots skʼoplal ti jnaʼuk jpajestik ti kʼu yelan chkaʼi jbatike. Bateltike xuʼ van oy srasonal ti chkap joltike, pe mi muʼyuk ta jpajestike, xuʼ ch-akʼvan ta vokol. Ilbil ti xuʼ chopol kʼusi chlik yal o tspas li buchʼu mu snaʼ spajes sbae xchiʼuk ti chopol chaʼi sba ta tsʼakale.
LI KʼUSI XUʼ XAPASE. Skʼan xatsal li skapemal ajole, yuʼun mi moʼoje xuʼ jaʼ tstsalot. Junantik krixchanoetike tsnopik ti jaʼ svinajeb ti tsatsal krixchanoetik mi snaʼ x-ilinike, pe ti melel xkaltike, jaʼ svinajeb ti kʼunike. Xi chal li Vivliae: «Li bochʼo mu snaʼ stsalel cʼusi chopol tscʼan yoʼntone jaʼ jech cʼotem jech chac cʼu chaʼal jun lum ti muʼyuc scoraltonale, ti mu vocoluc ch-och yajcontrae» (Proverbios 25:28). Mi anaʼoj lek kʼusi kʼot ta pasele, jaʼ tskoltaot sventa xapajes aba. Xi chal Proverbios 19:11: «Li sbijil cristianoe xuʼ tstsal o li scʼacʼal yoʼntone». Kʼalal chachikintabe sloʼil li buchʼu oy van akʼop achiʼuke o ti oy kʼusi la spasbote, jaʼ chkoltavan sventa xanaʼ lek li kʼusi kʼot ta pasele xchiʼuk ti oyuk smalael avuʼune.
TOJO TA VOKOL
BEILTASEL TA VIVLIA: «Tojik ta vokol» (Kolosenses 3:15).
¿K’USI SK’AN XAL? Oy buchʼutik chalik ti jaʼ noʼox xmuyubajik li buchʼutik snaʼik stojel ta vokole. Jech noxtok, li buchʼutik oy kʼusi snuptanojike yilojik ti jaʼ melele. Yalojik ti kʼalal tstojik ta vokol li kʼusi oy yuʼunike xchiʼuk ti maʼuk chbat ta yoʼontonik li kʼusi chʼayem yuʼunike, jaʼ chkoltaatik sventa stsalik kʼalal muʼyuk lek chaʼi sbaike.
LI KʼUSI XUʼ XAPASE. Jujun kʼakʼal skʼan xatsʼiba ta vun li kʼusi chatoj ta vokole. Mu persauk ti labaluk sbae, yuʼun xuʼ xatoj ta vokol ti kuxulote, ti lachiʼin ta loʼil junuk avutsʼ avalal o ti lavil li sakubel osile. Mi jech chapase, ta xlekub ti kʼu yelan chavaʼi abae.
Yan kʼusi tskoltaote, jaʼ ti xatojbe ta vokol li avutsʼ avalal xchiʼuk avamigotake. Nopo kʼusi lek chavil ta stojolalik, vaʼun xuʼ xavalbe ta jujuntal, ta jlikuk karta, ta junuk koreo o ta junuk mensaje. Mi jech chapase, mas to me lek chavil aba xchiʼukik xchiʼuk xamuyubaj ti lek kʼusitik chapas ta stojolal yantike (Echos 20:35).
YAN BEILTASELETIK TA VIVLIA
Xuʼ xayales li Vivlia sventa xachikinta ta español o ta yan 40 jeltos kʼopetik li ta jpajinakutik ta Internet ta jw.org.
MU JSAʼTIK KʼOP
«Ti leto ta xlique, jaʼ xchiʼil jun yoc ucʼum ta xtʼom; ta lec noʼox, tam xi loqʼuel yoʼ mu to xcʼacʼub ti cʼope». (PROVERBIOS 17:14, Ch).
MU JVUL KOʼONTONTIK SVENTA LI YOKʼOMALE
«Jech oxal chaʼa, mu me xavul avoʼontonik ta sventa li yokʼomale, yuʼun oy kʼusi chakʼ vul-oʼonton xtok li ta yokʼomale. Yuʼun xuʼ noʼox ti kʼu yepal vokolil yichʼoj tal jujun kʼakʼale». (MATEO 6:34).
BAʼYELUK JNOPTIK LI KʼUSI TA JPASTIKE
«Li tojobtasele te oy o sat ta atojol; li bijubtasele jaʼ chaxchabiot». (PROVERBIOS 2:11).