3 ¿Kʼu yuʼun chil svokol li buchʼu lek stalelale?
¿Kʼu yuʼun ti skʼan jnaʼtike?
Mu lekuk ti chil svokolik li buchʼutik lek stalelalike. Yuʼun xuʼ van oy buchʼutik snopik ti muʼyuk sbalil ti chkakʼtik persa spasel li kʼusitik leke.
Nopo ta sventa liʼe
Junantik krixchanoetike xchʼunojik ti ep ta velta chijvokʼ xchiʼuk chijchamutike. Ja’ yu’un tsnopik mi lek li kʼusi ta jpas ta jkuxlejaltike, mas xa la lek chijkuxiutik mi lijchaʼvokʼutike, pe mi chopolik la li kʼusi ta jpastike, ep la chkil jvokoltik. Xchiʼuk xuʼ la xil svokol li jun lekil krixchano mi oy kʼusi chopol spasoj li ta yan xkuxlejale. Pe xi xajakʼbe abae:
¿Mi sta-o ti jaʼ to chkil jvokoltik yuʼun ta skoj li kʼusi la jpas ta yan jkuxlejaltik ti mu xa xvul ta joltike?
Mi ta onoʼox xkil jvokoltik ta skoj li kʼusi la jpastik ta yan jkuxlejaltike, ¿mi oy sbalil ti chkakʼtik persa ti lekuk noʼox li jkuxlejaltike xchiʼuk ti ta jkʼeltik ti mu kʼusiuk jnuptantike?
SVENTA XANABE MAS SKʼOPLALE
Kʼelo ta jw.org li video ¿Kʼu yuʼun yakʼoj to oyuk vokolil li Diose?
Li kʼusi chal Vivliae
Li vokolile maʼuk kastigo yuʼun Dios
Bakʼintike chkil jvokoltik ta skoj ti jaʼo jech chkʼot ta pasele, ta skoj ti jaʼo te oyutike o ti te lijkʼote.
«Mu skotoluk velta tspas kanal anilajel li buchʼu tsots x-anilaje, mu skotoluk velta tspas kanal paskʼop li buchʼutik lek tsots xuʼ yuʼunike, mi jaʼuk oy sveʼel skotol ora li buchʼutik pʼijike, mi jaʼuk oy skʼulejalik skotol ora li buchʼutik oy spʼijilike xchiʼuk mi jaʼuk skotol ora lek kʼusi chkʼot ta pasel yuʼunik li buchʼutik oy yojtikinobil yuʼunike; yuʼun tsnuptan skotolik li yorail kʼusitik chkʼot ta pasel ti muʼyuk malabile» (EKLESIASTES 9:11).
Chkil jvokoltik ta skoj ti jpas mulilutik onoʼox chijvokʼe
Li krixchanoetike jaʼ onoʼox chalbeik skʼoplal mulil kʼalal oy kʼusi chopol chichʼ pasele. Pe li Vivliae jaʼ chalbe skʼoplal li mulil la sjelubtasbutik talel jkotoltik li Adan xchiʼuk Evae, ti mu ventauk mi lek jtalelaltik o mi chopol.
«¡Kʼelavil! Oy onoʼox jmul kʼalal livokʼe xchiʼuk nojun xa onoʼox ta mulil kʼalal la xchiʼinun li jmeʼe» (SALMO 51:5, tsʼib ta yok vun).
Ep yakʼojbe svokol krixchanoetik li mulile
Maʼuk noʼox ti mu xa lekuk xkil jbatik xchiʼuk li Jpasvanej kuʼuntike, yuʼun mu xa lekuk xkil jbatik xchiʼuk li kʼusitik spasojane, jaʼ xkaltik, ta stojolal li yan krixchanoetike xchiʼuk li kʼusitik oy ta jpat jxokontike. Taje jaʼ chkil-o jvokol jkotoltik.
«Kʼalal ta jkʼan ta jpas li kʼusi tukʼe, jaʼ oy ta jtojolal li kʼusi chopole» (ROMANOS 7:21).
«Oy kʼusi kʼux chaʼi-o ta yoʼontonik li kʼusitik pasbile xchiʼuk ti jmoj oy-o svokolik kʼalal to avi kʼakʼale» (ROMANOS 8:22).