4 ¿Mi jaʼ noʼox tal kil jvokoltik yuʼun li Diose?
¿Kʼu yuʼun ti skʼan jnaʼtike?
Yuʼun jaʼ tskoltautik sventa jnaʼtik ti kʼu yelan skʼan xijkuxiutike.
Nopo ta sventa liʼe
¿Mi sta-o ti toj kʼupil sba la spas jbalumiltik li Diose xchiʼuk ti jaʼ noʼox liʼ chkil jvokoltik xtoke?
Jlom krixchanoetik ti muʼyuk srelijionike chalik ti jeche’ no’ox la spasutik Dios mi ja’ no’ox chkil jvokoltike xchiʼuk chalik ti xuʼ van muʼyuk kuxul li Diose. Tsnopik ti kʼalal chkil jvokoltike jaʼ la chakʼ ta ilel li oxtos liʼe: 1) ti mu xlaj yuʼun vokolil li Diose, 2) ti muʼyuk oyutik ta yoʼontone o 3) ti muʼyuk kuxul li Diose.
¿Mi oy van yan kʼusi skʼan jnaʼtik?
SVENTA XANABE MAS SKʼOPLALE
Kʼelo ta jw.org li video ¿Kʼu yuʼun xuʼ jchʼuntik ti melel kʼusi chal li Vivliae?
Li kʼusi chal Vivliae
Li Diose maʼuk sventa tal kil jvokoltik yuʼun ti la spasutike
Li kʼusi oy ta yoʼontone jaʼ ti jkʼupintik li kuxlejale.
«Ti kʼusi mas lek xuʼ spasike [li krixchanoetike] jaʼ ti xmuyubajike xchiʼuk ti spasik kʼusi lek ti kʼu sjalil kuxulike, jech xtok, ti akʼo veʼikuk skotolike, ti x-uchʼbolajike xchiʼuk ti skʼupinik li kʼusi tsots tajek laj yabtelanike. Taje jaʼ jun matanal yuʼun Dios» (EKLESIASTES 3:12, 13).
Kʼalal laj yichʼik pasel yuʼun Dios li Adan xchiʼuk Evae, lek toʼox tajek skotol
Muʼyuk oy ta yoʼonton Dios ti xil svokolike mi jaʼuk ti xil svokolik li snitilulalike.
«Vaʼun, akʼbatik bendision yuʼun Dios, xi albatike: ‹Epajanik, pʼolanik, nojesik li balumile, ventainik›» (JENESIS 1:28).
Li baʼyel krixchanoetike la snop stukik ti muʼyuk chchʼunbeik smantal li Diose
Ta skoj ti la stoy sbaike laj yil-o svokolik xchiʼuk laj yil svokol li snitilulalike.
«Jaʼ yuʼun, jech kʼuchaʼal ta jun noʼox vinik och talel li mulil ta balumile, jech ta skoj mulil och talel ek li lajelale, jaʼ yuʼun chcham skotol krixchanoetik ta skoj ti jpasmulil kʼot skotolike» (ROMANOS 5:12).a
Ti kʼu yelan la spasutik li Diose maʼuk sventa jbeiltas jba jtuktik
Jech kʼuchaʼal mu stakʼ xijkuxiutik ta yut voʼe, mu xuʼ kuʼuntik ti ta jventain jba jtuktike.
«Mi jaʼuk xuʼ yuʼun tsbeiltas sba batel stuk li jun krixchano ti yakal chanave» (JEREMIAS 10:23).
Li Diose mu skʼan ti xkil jvokoltike
Li Diose chakʼbutik tojobtaseletik sventa mu masuk xkil jvokoltik
«¡Oy ta koʼonton ti xatsʼet chikinta li jmantaltake! Vaʼun bi, li jun oʼontonal avuʼune chkʼot kʼuchaʼal jun ukʼum» (ISAIAS 48:18).
a Li Vivliae maʼuk noʼox chalbe skʼoplal mulil kʼalal oy kʼusi chopol chichʼ pasele, yuʼun jaʼ chalbe skʼoplal li mulil ti jkuchoj jkotoltike.