Sabo baʼyel skʼoplal

Li kʼusi chakʼ vokolile

Kʼalal chopol kʼusi ta jnoptik ta stojolal li yantike, ep ta velta jaʼ ta skoj ti mu meleluk li kʼusi chkichʼtik albele. Jech kʼuchaʼal liʼe:

Jlom yajval abtelale tsnopik ti mu snaʼik stunesel makinaetik o komputadoraetik li antsetike.
Li ta Edad Mediae la sabeik smul judaetik ta Europa ti laj la stikʼbeik veneno li posoetike, vaʼun jaʼ la te lik talel li tsatsal chamele. Kʼalal jaʼo chventainvan li jnazietike, laj yichʼik tikʼbel smulik li judaetike xchiʼuk albatik ti jaʼ la ta smulik ti chʼabal takʼin li ta Alemaniae. Taje chakʼ ta ilel ti tsots laj yil svokolik li judaetik ta skoj ti chopol kʼusi la snopik ta stojolalike. Li avi eke jaʼ jech tsnuptan jlom krixchanoetik.
Epal krixchanoetike tsnopik ti muʼyuk xmuyubajik li buchʼutik maʼsatetike, makal xchikinik, koxoetik o ti oy kʼusi yan snuptanoj ta xkuxlejalike.

Li buchʼutik tsnopik ti jaʼ jech li kʼusi chalike xchiʼuk ti buchʼu mu jechuk tsnopik taje mu la kʼusi snaʼik.

Beiltasel ta Vivlia

«Muʼyuk lek mi muʼyuk yojtikinobil yuʼun li jun krixchanoe» (PROVERBIOS 19:2).

¿Kʼusi skʼan xal? Mi mu jnaʼtik lek li kʼusi kʼot ta pasele, xuʼ me chopol li kʼusi chkʼot ta nopel kuʼuntike. Mi jaʼ ta jchʼuntik li kʼusi chkichʼtik albele, muʼyuk me lek kʼusi ta jnoptik ta stojolal li yantike.

K’alal jnaʼojtik ta stojolal li yantike, jaʼ tskoltautik

Kʼalal xkojtikintik lek li jun krixchanoe, muʼyuk ta jchʼuntik ta anil li kʼusi mu meleluk chalik ta stojolale. Mi laj kakʼtik venta ti mu meleluk li kʼusi chalik ta stojolal jtsop krixchanoetike, vokol xa me ta jchʼuntik li kʼusi chalik ta stojolal li yantike.

Li kʼusi kʼotem ta xkuxlejalike: Yovitsa / Ta suresteal Europa

Li Yovitsa ti laj xa kalbetik skʼoplal li ta yan mantal echʼe te chʼi talel ti bu jaʼ noʼox chopol kʼusitik chal li slakʼnatake, ta notisiaetik xchiʼuk ta television ta stojolal li jtsop krixchanoetike. Xi chale: «Chopol kʼusi ta jnop ta stojolal li krixchanoetik taje xchiʼuk xkapet jol ta stojolalik. La jnop ti oy lek srasonal kuʼun ti jech ta jnop ta stojolalike.

»Pe kʼalal li-ay ta soltaroale la jchiʼin li jtsop krixchanoetik taje. Vaʼun, te kʼunkʼun laj kojtikinik. Te lik jchanbe li skʼopike xchiʼuk te lik jchikintabe li sonike. La jkʼupin ti te jchiʼukane, vaʼun lik jeluk li kʼusi toʼox ta jnop ta stojolalike. Pe xuʼ me oy kʼusi chopol xlik jnoptik yan velta ta stojolal li yantike. Jech oxal, muʼyuk ta jchikinta notisiaetik, muʼyuk ta jkʼel pelikulaetik o programaetik ti chopol kʼusi chalik o ti tslabanik li jtsop krixchanoetik taje. Kʼalal chopol kʼusi ta jnoptik ta stojolal li yantike, xuʼ me xlik kapuk joltik ta stojolik o jkontraintik».

Li kʼusi xuʼ xapase

Mu me xanop ti jech skotol li krixchanoetike. Akʼo mi oy jun krixchano ti chopol kʼusi chichʼ alel ta stojolal li ta jtsop krixchanoe, maʼuk me skʼan xal ti jech xa skotolike.
Akʼo me venta ti mu xanaʼ skotol ta stojolal li yantike.
Jaʼ me te xasabe skʼoplal ti bu anaʼoj ti melel kʼusi chalike.