Jechuk xavaʼi kʼuchaʼal chaʼi sba li yantike

Li kʼusi chakʼ vokolile

Mi jaʼ ta jkʼeltik li kʼusi jelelik-o li yantike, xuʼ me chopol xa tajek chkiltik-o ta skoj ti kʼusi jelelik-oe. Ta skoj ti oy kʼusi jelelik-oe, xuʼ me jnoptik ti muʼyuk xa tsots skʼoplalike. Mi jech la jnoptike, xuʼ me vokol xa chkaʼitik ti jechuk xkaʼi jbatik jech kʼuchaʼal chaʼi sbaik li yantike. Taje jaʼ me slikeb ti chopol li kʼusi ta jnoptik ta stojolal li yantike.

Beiltasel ta Vivlia

«Kuxetuk me avoʼonton achiʼukik li buchʼutik xkuxet yoʼontonike; okʼan me achiʼukik li buchʼutik ch-okʼike» (ROMANOS 12:15).

¿Kʼusi skʼan xal? Li beiltasel liʼe xuʼ xi noʼox xkaltike: ti jechuk xkaʼi jbatik kʼuchaʼal li yantike. Sventa spas kuʼuntike, skʼan xkaʼibetik xkʼuxul svokol li yantike.

Chkoltavan ti xkaʼibetik xkʼuxul svokol li yantike

Kʼalal chkaʼibetik xkʼuxul svokol li yantike, chkakʼtik venta ti koʼolutike. Jech xtok, chkakʼtik venta ti jech chaʼi sbaik xchiʼuk jech tsnopik kʼuchaʼal li voʼotike. Kʼalal jech chkaʼitike, tskoltautik ta yaʼibel smelolal ti jaʼutik jun utsʼ alalil jkotoltike. Ti chkakʼtik venta ti koʼolutike, jaʼ tskoltautik sventa mu chopoluk kʼusi jnoptik ta stojolal li yantike.

Ti xkaʼitik kʼu yelan chaʼi sbaik li yantike jaʼ me tskoltautik sventa jtsaktik ta venta. Li Anne-Marie ti likem ta Senegale nopem xaʼi muʼyuk tstsak ta venta li buchʼutik muʼyuk tsots skʼoplal ilbile. Xi chalbutik smelolal kʼusi koltaat sventa xakʼ ta ilel ti kʼuxuk ta yoʼonton li yantike: «Kʼalal laj kil kʼu yelan chil svokolik li krixchanoetik taje, la jnopbe skʼoplal kʼu van yelan chkaʼi jba ti voʼonuke. Vaʼun, laj kakʼ venta ti maʼuk xa tsots jkʼoplal li voʼone xchiʼuk ti muʼyuk kʼusi jpasoj ti masuk xa tsots jkʼoplal chkaʼi jbae». Jaʼ yuʼun chaʼa, kʼalal chkakʼtik persa yaʼibel smelolal kʼu yelan chil svokol li yantike, jaʼ me tskoltautik sventa mu jchopol jloʼiltatik.

Li kʼusi xuʼ xapase

Kʼelo ti kʼusi xakoʼolajik-o xchiʼuk ti kʼusi koʼol x-ayan avuʼunik xchiʼuk li jtsop krixchanoetik ti mu masuk lek chavile. ¿Kʼu van yelan chaʼi sbaik ti xiuk chkʼot ta stojolalike?

Ti xkaʼibetik xkʼuxul svokol li yantike jaʼ tskoltautik ta yaʼibel smelolal ti jaʼutik jun utsʼ alalile

Kʼalal koʼol chveʼik xchiʼuk li yutsʼ yalalike.
Kʼalal tsots abtejik sjunul kʼakʼale.
Kʼalal chchʼay yoʼonton xchiʼuk li yamigotakike.
Kʼalal chchikinta skʼupil sonike.

Akʼo persa ti voʼotuk xae. Vaʼun xi xajakʼbe abae:

¿Kʼusi van ta jpas ti oyuk buchʼu chakʼ ta aʼiel ti muʼyuk jbalile?
¿Kʼu van yelan chkaʼi jba mi chopol kʼusi tsnopik ta jtojolal ti mu xojtikinikune?
Ti teuk jkʼoplal li ta jtsop krixchanoetik taje, ¿kʼu van yelan ta jkʼan ti xilikune?

Li chaʼvoʼ viniketike koʼol tskʼel sfotoik ti te chvinaj ti koʼol li kʼusitik tspasike: li ta yutsʼ yalalike, li kʼusi chtajinik-oe xchiʼuk li yabtelike.

Li kʼusi kʼotem ta xkuxlejalike: Robert / Ta Singapur

«Ta jnop toʼox ti toj yanik-o li buchʼutik makal xchikinike, ti muʼyuk pʼijike xchiʼuk chopol chaʼi sbaik ta anil mi oy kʼusi jsetʼjuteb la jpasbetike. Jaʼ yuʼun, mu masuk ta jchiʼinik ta loʼil. Akʼo mi jech, kaloj mi muʼyuk kʼusi chopol ta jnop ta stojolal yantik, yuʼun kaloj mi muʼyuk chopol chaʼi sbaik kuʼun ta sventa li kʼusi ta jnope.

»Kʼalal laj kaʼibe xkʼuxul svokol li buchʼutik makal xchikinike, jaʼ la skoltaun sventa mu xa kʼusi chopol jnop ta stojolalik. Jun skʼelobile, kaloj mi chʼabal lek snopbenik, yuʼun kʼalal ta jchiʼinik ta loʼile toj yan sba sat tskʼelikun. Pe la jnopbe skʼoplal kʼu van yelan chkaʼi jba ti muuk xkaʼi kʼusi chalbeikun li yantike. ¡Melel onoʼox ti yan-o jsat ta jkʼelike! Ti jtikʼojuk j-audifonoe xuʼ van chkakʼ ta ilel ta jsat ti mu xkaʼibe smelolal li kʼusi chalbeikune, pe taje jaʼ ta skoj ti mu xkaʼi li kʼusi chalike.

»Kʼalal laj kaʼibe smelolal ti kʼu yelan chaʼi sbaik li buchʼutik makal xchikinike, muʼyuk xa kʼusi chopol la jnop ta stojolalik».