Tojobtasel sventa jun koʼontik xchiʼuk li yantike

Akʼo perton

«Jechuk-o me [...] ti chapasbe abaik pertone akʼo mi oy buchʼu tsaʼ smul ta atojolalik» (KOLOSENSES 3:13).

Ta skoj ti maʼuk tukʼil krixchanoutike, xuʼ van oy kʼusi chkaltik o ta jpastik ti chopol-o chaʼi sba kuʼuntik li yantike o xuʼ van chopol chkaʼi jbatik yuʼunik ek. Jaʼ yuʼun, jkotoltik skʼan talbat jpasbe jbatik perton. Mi jech la jpastike, muʼyuk xa me chopol chkiltik li buchʼu muʼyuk lek kʼusi la spasbutike. Muʼyuk me ta jpakbetik sutel mi jaʼuk ta jtikʼbetik ta sat li xchopolile (Romanos 12:17). Pe mi kʼux tajek chkaʼitik li kʼusi la spasbutik ti te xijnopnun-o yuʼune, jaʼ lek ti jchiʼintik ta loʼil stuk li krixchanoe xchiʼuk ta slekiluk koʼontontik jkʼopontik. Li kʼusi ta jkʼantike jaʼ ti jchapan li jkʼoptike, maʼuk ti jkʼeltik buchʼu ta smule (Romanos 12:18).

Bikʼit xavakʼ aba xchiʼuk ichʼvanan ta mukʼ

«Bikʼit xavakʼ abaik, jaʼ masuk tsots skʼoplal xavilik li yantike» (FILIPENSES 2:3).

Mi bikʼit chkakʼ jbatik xchiʼuk mi chij-ichʼvan ta mukʼe, lek chaʼi chchiʼinutik li yantike. Vaʼun, jech ta snaʼik ti lek koʼontontike, ti xkaʼibetik smelolale xchiʼuk ti mu kolbajtikuk oy kʼusi chopol ta jpastike. Pe mi ta jnoptik ti jaʼ mas tsots jkʼoplaltike xchiʼuk mi ta jkʼantik ti jaʼuk xichʼ pasel li kʼusi ta jkʼan jtuktike, jaʼ noʼox me ta jlikestik-o kʼop xchiʼuk ta xkut-o jbatik. Vaʼun, mu xa skʼan xchiʼinutik li yantike xchiʼuk jutuk xa noʼox chkom kamigotaktik... o xuʼ van muʼyuk.

Mu xatʼujvan

«Mu snaʼ xtʼujvan li Diose, yuʼun buyuk noʼox slumal lek ilbil li buchʼu chiʼta xchiʼuk ti tspas kʼusi tukʼe» (ECHOS 10:34, 35).

Li Jpasvanej kuʼuntike muʼyuk bu chtʼujvan, mu ventauk bu jlumaltik, kʼusi jkʼoptik, mi jkʼulejutik o mi povreutik, mi ikʼal krixchanoutik, sakil krixchanoutik o yamal krixchanoutik. Yuʼun «ta jun noʼox vinik la spas krixchanoetik ta skotol lumetik» (Echos 17:26). Taje jaʼ skʼan xal ti jaʼ jbankiltik, jvixtik, jmuktik, kitsʼintik skotol li krixchanoetike. Kʼalal chkichʼtik ta mukʼ xchiʼuk chkakʼtik ta ilel slekil koʼontontik ta stojolal li yantike, xijmuyubajutik noʼox me jkotoltik xchiʼuk xkuxet yoʼonton li Jpasvanej kuʼuntike.

Mu me ta aniluk xa-ilin

‹Lapik me li manxoale› (KOLOSENSES 3:12).

Kʼalal manxoutik noʼox xchiʼuk ti muʼyuk chij-ilin ta anile, jun noʼox yoʼontonik ta jtojolaltik li yantike xchiʼuk xuʼ xalbutik li kʼusi oy ta yoʼontonike. Jech xtok, ta sjunul yoʼonton tstojobtasutik, yuʼun snaʼojik ti muʼyuk chijkaputike. Mi muʼyuk kʼusi chopol chkalbetik li buchʼu ilin ta jtojolaltike, jaʼ chkoltaat sventa junuk noʼox yoʼonton. Xi chal Proverbios 15:1: «Kʼalal xlamet noʼox chijtakʼave, chchʼak lokʼel li skʼakʼal oʼontonale, yan mi chyayijesvan ti kʼu yelan chijkʼopoje, tslikes skapemal jolil».

Oyuk kʼusi xavakʼ xchiʼuk tojo ta vokol

«Jaʼ mas xmuyubaj li buchʼu chakʼe, jaʼ mu sta li buchʼu chichʼe» (ECHOS 20:35).

Epal krixchanoetike jaʼ noʼox tskʼanik ti epuk kʼusitik x-ayan yuʼunike xchiʼuk jaʼ noʼox tsnop ta stojolal stukik. Pe mi jnaʼtik yakʼel li kʼusitik oy kuʼuntike, mas to me xijmuyubaj (Lukas 6:38). Li buchʼutik snaʼik yakʼel kʼusitike xmuyubajik tajek, yuʼun mas skʼanojik li krixchanoetike, jaʼ xkom to li kʼusitike. Taje jaʼ chkoltaatik sventa snaʼikuk stojel ta vokol kʼalal oy kʼusi ch-akʼbatike (Kolosenses 3:15). Xi xajakʼbe abae: «¿Buchʼu ta jkʼan ta jchiʼin? ¿Mi jaʼ li buchʼu tskʼan sba stuke xchiʼuk ti mu snaʼ stojel ta vokole? O ¿mi jaʼ li buchʼu snaʼ xakʼ kʼusitik oy yuʼun xchiʼuk ti snaʼ stojel ta vokole?». Jaʼ xkaltik, skotol li kʼusitik ta jkʼan akʼo spasbutik li krixchanoetike skʼan jech jpasbetik ek (Mateo 7:12).