Li selular, tavleta o komputadorae, ¿mi xuʼ sokes anopben?
Ep kʼusitik ta jchantik li ta eskuela o ta kabteltike. Jaʼ yuʼun, jtunel kuʼuntik li selular xchiʼuk li yan kʼusitik ta jtunestike. Mu toʼox bu jech xkiltik ti toj kʼun xa ta tael li kʼusitik skʼan jchantike, yuʼun te noʼox oy ta jkʼobtik.
Pe li buchʼutik jaʼ xa batem ta yoʼontonik stunesel selular, tavleta o komputadorae xuʼ snuptanik li kʼusitik liʼe:
Mu xaʼibeik smelolal kʼalal chaptaik vune.
Mu xa jtosuk kʼusi lek chbat ta pasel yuʼunik.
Anil noʼox chchʼajubik kʼalal stuk oyike.
LI KʼUSI SKʼAN XANAʼE
YAPTAEL VUN
Junantike toj anil xa noʼox tskʼan chaptaik li vune, vaʼun mu xa xaʼibeik smelolal li kʼusi tskʼelike.
Kʼalal anil noʼox chkaptatik vune, xuʼ jtabetik stakʼobil junuk sjakʼobil, pe xuʼ van mu xkaʼibetik smelolal li kʼusi chal ta melele.
NOPO TA SVENTA LIʼE: ¿Mi vokol chavaʼi yaptael vun kʼalal ep pajina yichʼoje? ¿Kʼusi sbalil chatabe mi laj avakʼ persa yaʼibel lek smelolal li kʼusi chavaptae? (PROVERBIOS 18:15).
VOKOL CHAʼIBE SMELOLAL
Junantik krixchanoetike tsnopik ti ta skoj ti oy xa la selular, tavleta o komputadorae, xuʼ xa la oy kʼusi jaytos spas yuʼunik. Jech kʼuchaʼal liʼe, xuʼ la stakbe mensaje yamigoik xtok kʼalal chchanunajike. Pe mi muʼyuk laj kakʼ lek ta koʼontontike, mu jtosuk lek chbat ta pasel kuʼuntik.
Sventa xkaʼibetik smelolale, skʼan xkakʼ lek ta koʼontontik, yuʼun oy sbalil mi jech la jpastike. Jkʼeltik avil kʼusi laj yal jun tseb li Grace sbie: «Mas lek chbat ta pasel avuʼun xchiʼuk muʼyuk mas chavul avoʼonton. Laj kakʼ venta ti jaʼ mas lek ti jtosuk noʼox kʼusi xkakʼ ta koʼontone, jaʼ vokol mi ta jkʼan ta jpas jaytosuke».
NOPO TA SVENTA LIʼE: Kʼalal oy jaytosuk kʼusi chakʼan chapase, ¿mi mas vokol chavaʼibe smelolal xchiʼuk ti mu xvul ta ajol li kʼusi la achane? (PROVERBIOS 17:24).
KʼALAL STUK OYE
Oy junantike mu stakʼ chaʼiik mi stuk oyik kʼalal muʼyuk kʼusi tspasike. Jaʼ yuʼun, jaʼ xuʼ chaʼiik mi tskʼel selularik, stavletaik o yan kʼusitik tstunesike. Xi chal jun ants ti Olivia sbie: «Mu xikuxi chkaʼi mi muʼyuk la jkʼel 15 minutouk jtelefono, jtavleta o mi muʼyuk la jtsan jtelee, yuʼun chichʼajub tajek».
Akʼo mi kerem tsebutik to o mi maʼuk xa, jkotoltik onoʼox chtun kuʼuntik ti skʼan jtuk oyutike sventa jnopbetik skʼoplal li kʼusi la jchantike, yuʼun jaʼ to jech chkaʼibetik smelolal li kʼusi ta jchantike.
NOPO TA SVENTA LIʼE: ¿Mi oy kʼusi chlik anopbe skʼoplal kʼalal jaʼo atuk oyote? (1 TIMOTEO 4:15).
LI KʼUSI XUʼ XAPASE
NOPO KʼUXI CHATUNES LI ASELULAR O LI YAN KʼUSI CHATUNESE
¿Kʼuxitik xuʼ skoltaot li aselular o yan kʼusitik chatunes sventa oyuk kʼusi xachane? Pe ¿kʼuxi xuʼ xata-o avokol yuʼun xtok?
BEILTASEL TA VIVLIA: «Chabio li pʼijilale xchiʼuk ti xatojob snopele» (PROVERBIOS 3:21).