Tsots skʼoplal ti jnaʼtik ti oy jun Jpasvaneje
¿Kʼu yuʼun tsots skʼoplal ti jnaʼtik ti oy jun Jpasvaneje? Yuʼun mi laj avakʼ venta ti oy jun Dios ti skotol xuʼ yuʼune, yikʼaluk van chakʼan chanaʼ mi te likem tal ta stojolal Dios li Vivliae. Vaʼun, mi la apat avoʼonton ta sventa li kʼusi chal Vivliae, chatabe sbalil jech kʼuchaʼal liʼe:
Mas chakʼupin akuxlejal
XI CHAL LI VIVLIAE: Lek kʼusitik la spas Dios ta stojolal li krixchanoetike, yuʼun «akʼbatik talel voʼ ta vinajel xchiʼuk lek laj yakʼ sat li kʼusitik tstsʼunike, akʼbat lek sveʼelik xchiʼuk xkuxet tajek yoʼontonik» (Echos 14:17).
¿KʼUSI SKʼAN XAL? Skotol li kʼusitik oye jaʼ jun matanal yakʼoj li Jpasvaneje. Mas to me chakʼupin li matanaletik mi laj avakʼ venta ti chal Vivlia ti oyot ta yoʼonton li Diose.
Chata lekil tojobtaseletik
XI CHAL LI VIVLIAE: «Chavaʼibe smelolal li tukʼilale, ti kʼusi tukʼe xchiʼuk ti kʼusi lek ta pasele, chavaʼibe smelolal bu li tukʼil be skʼan xabate» (Proverbios 2:9).
¿KʼUSI SKʼAN XAL? Ta skoj ti jaʼ Jpasvanej li Diose snaʼoj li kʼusi chtun avuʼun sventa xamuyubaje. Mi la achan li Vivliae, te chata lekil tojobtaseletik ti tskoltaote.
Xuʼ xatabe stakʼobil li kʼusi chakʼan chanaʼe
XI CHAL LI VIVLIAE: Chavaʼibe smelolal «xchiʼuk chavojtikin li Diose» (Proverbios 2:5).
¿KʼUSI SKʼAN XAL? Kʼalal chanaʼ ti oy jun Jpasvaneje, tskoltaot sventa xatabe stakʼobiltak li sjakʼobiltak ti tsotsik skʼoplal jech kʼuchaʼal liʼe: ¿Kʼu yuʼun ti kuxulutike? ¿Kʼu yuʼun chkil jvokoltik? Xchiʼuk ¿kʼusi chkʼot ta stojolal li buchʼu chchame? Te chatabe stakʼobiltak ta Vivlia.
Chata spatobil avoʼonton
XI CHAL LI VIVLIAE: «Xi chal li Jeovae: ‹Yuʼun jnaʼoj lek li kʼusi ta jpas ta atojolalike, chkakʼboxuk jun oʼontonal, maʼuk vokolil, sventa oyuk kʼusi lek xataik ta jelavel xchiʼuk sventa oyuk spatobil avoʼontonik›» (Jeremias 29:11).
¿KʼUSI SKʼAN XAL? Li Diose yaloj ti tslajes li choplejale, li vokolile xchiʼuk li lajelale. Mi chapat avoʼonton li ta kʼusi yaloj tspas Diose, chkuch avuʼun li kʼusitik chanuptan jujun kʼakʼale.