Slikebal kʼusitik kʼalal to ta nojelal ta voʼ

¿Bu lik tal li vinajeletik xchiʼuk li Balumile? ¿Kʼuxi imeltsaj li Kʼakʼale, li Ue, li kʼanaletike xchiʼuk skotol li kʼusitik oy ta Balumile? Li Vivliae jamal ta xi yalbutik ti jaʼ Dios ti buchʼu la spas skotol li kʼusitike. Jaʼ yuʼun li jlivrotike ta xlik xcholbutik loʼiletik ta Vivlia ta sventa li kʼusitik pasbile.

Ta jchantik ti kʼusi baʼyel la spas ti Diose jaʼ kuxlejaletik kʼuchaʼal stuk ti mu xkiltike. Jaʼ anjeletik. Pe li Balumile la jyichʼ pasel sventa krixchanoetik kʼuchaʼal voʼotike. Jaʼ yuʼun ti Diose la spas jun vinik, jaʼ sbi Adán, xchiʼuk la spas jun ants, jaʼ sbi Eva, xchaʼvoʼalik akʼatik ta jun alakʼ sba nichimaltik. Pe ti Adán xchiʼuk Evae muʼyuk la xchʼunbeik smantal ti Diose, jaʼ yuʼun mu xa staʼo xkuxiik.

Li kʼu sjalil echʼ kʼalal la jyichʼ pasel Adán kʼalal to li ta mukʼta Nojelal ta voʼe jaʼ 1.656 jabil. Li ta sjalil taje kuxi epal chopol krixchanoetik. Li ta vinajele te oyik toʼox Satanás xchiʼuk li xchopol anjeltake, kuxlejaletik ti mu xkiltike. Li ta Balumile, liʼ toʼox kuxul Caín xchiʼuk epal chopol krixchanoetik, xchiʼuk yan viniketik ti yan x-elanik ta skoj ti toj echʼ noʼox yip stsatsalike. Pe Abel, Enoc xchiʼuk ti Noee lek echʼik ta Balumil. Liʼ ta SBAVOKʼAL loʼile ta jchantik ta sventa li krixchanoetik taje xchiʼuk kʼusitik kʼotanuk ta pasel.