Jun vinik ti mu snaʼ xiʼe

TI KʼALAL lik epajuk li krixchanoetik ta Balumile, toj chopol kʼusitik la spasik kʼuchaʼal ti Caine. Pe oy jun vinik ti jelele. Li vinik taje jaʼ sbi Enoc. Li stuke mu snaʼ xiʼ. Li krixchanoetik ti kuxulik ta sjoylejale toj chopolik, pe ti Enoque muʼyuk la jyikta sba ta spasbel yabtel ti Diose.

¿Mi xa naʼ kʼu yuʼun la spasik ep kʼusitik chopol li krixchanoetik taje? Nopo avaʼi ta sventa liʼe: ¿Buchʼu la sokbe sjol yoʼonton li Adán xchiʼuk Eva sventa mu xchʼunbeik smantal li Diose xchiʼuk la jyal ti xuʼ sloʼik li sat teʼ ti albilik yuʼun Dios ti mu stakʼ sloʼike? Jaʼ jun chopol anjel. Li Vivliae Satanás yakʼojbe sbi. Liʼe tskʼan tspasutik ta chopol krixchano jkotoltik.

Jun kʼakʼal ti Enoque albat yuʼun Jeova Dios ti akʼo yalbe jun mantal li krixchanoetike, pe li krixchanoetike mu skʼan xchikintaik. Li kʼusi la jyal li Enoque jaʼ liʼe: Chkʼot skʼakʼalil ti chakʼbe slajeb skotol li chopol krixchanoetik ti Diose. Taje xuʼ van ilinik-o yuʼun tajek li krixchanoetike. Yikʼal van taʼox smil yaʼiik ti Enoque. Jaʼ yuʼun, ti Enoque skʼan tsotsuk yoʼonton sventa chalbe krixchanoetik li kʼusi snopoj tspas ti Diose.

Ti Diose muʼyuk jal la jyakʼ kuxiuk ti Enoque yuʼun toj chopol li krixchanoetik tee. Kʼajomal noʼox 365 jabil ikuxi. ¿Kʼu yuʼun chkaltik ti «ja noʼox 365 jabile»? Yuʼun li ta skʼakʼalil Enoque; li krixchanoetike toj tsotsik xchiʼuk jal chkuxiik, ta orae mu jechuk. ¡Jech, li Matusalén xnichʼon Enoque chaʼa kuxi 969 jabil!

Kʼalal chamem xaʼox ti Enoque, li krixchanoetike toj echʼ noʼox sokik tajek. Li Vivliae chal ti jaʼ noʼox batem ta yoʼontonik-o snopel li kʼusitik chopole, xchiʼuk li Balumile noj ta choplejal.

¿Mi xa vojtikin junuk srasonal ti epaj vokolil ta skʼakʼalil Enoque? Yuʼun li Satanase oy kʼusi lik stunes sventa ta stijbe sjol yoʼonton krixchanoetik ta spasel li kʼusitik chopole. Jkʼeltikik kʼusi taje.