Jun alakʼ sba nichimaltik

¡KʼELAVIL li Balumile! ¡Toj alakʼ sba skotol! Kʼelavil li yaxale xchiʼuk li teʼetike, li nichimetike xchiʼuk skotol li chonetike. ¿Mi xa vil bu oy li elefante xchiʼuk li leonetike?

¿Bu ilokʼ talel li alakʼ sba nichimaltik liʼe? Veno, jkʼeltikik kʼuxi la xchapanbutik Balumil ti Diose.

Baʼyele, ti Diose la spas yaxal vomoletik sventa ta xpix li balumile. La spas ep ta tos vomoletik, tsʼiʼleletik xchiʼuk teʼetik. Li kʼusitik chchʼi taje jaʼ mas alakʼ sba-o ta kʼelel li Balumile. Pe taje maʼuk noʼox. Yuʼun ep li kʼusitik te chchʼie chakʼ muil veʼliletik.

Ta tsʼakal ne, Dios la spas choyetik sventa chnuxinajik ta voʼ xchiʼuk mutetik sventa chvilik ta vinajel. La spas tsʼiʼetik, bolometik xchiʼuk kaʼetik; mukʼtik chonetik xchiʼuk uni kʼox chonetik. ¿Mi oy chonetik li ta stsʼel anae? ¡Ti Diose toj echʼ noʼox lek yoʼonton ti kʼalal la spasbutik skotol li kʼusitik liʼe!

Ta slajebal ne, ti Diose la stʼuj uni jsep osil ta Balumil sventa tskʼatajes ta jun alakʼ sba lum. Nichimaltik Edén la jyakʼbe sbiin. Toj lek toʼox skotol. Toj echʼ noʼox alakʼ sba. Ti Diose oy ox ta yoʼonton ti akʼo xkʼot ta alakʼ sba nichimaltik spʼejel Balumil kʼuchaʼal xvinaj liʼe.

Chaʼkʼelo li lokʼole. Li Diose oy kʼusi chʼabal la jyil liʼ ta nichimaltike, ¿mi xa naʼ kʼusi? Jkʼeltikik.