La spas vinajel xchiʼuk balumil li Diose

Jaʼ Jpasvanej kuʼuntik li Jeovae. La spas li kʼusi mu xkiltike xchiʼuk li kʼusi xkiltike. Kʼalal muʼyuk toʼox spasoj li kʼusitik xkiltike, baʼyel la spas epal anjeletik. ¿Mi xanaʼ kʼu yelan li anjeletike? Jaʼik kuxlejaletik ti xkoʼolajik tajek kʼuchaʼal li Jeovae. Pe li voʼotike mu xkiltik li Jeova mi jaʼuk xkiltik li anjeletik taje. Li baʼyel anjel la spase jaʼ koltaat ta spasel li kʼusitike, jech kʼuchaʼal li kʼanaletike, li planetaetike xchiʼuk yan kʼusitik. Li voʼotike nakalutik ta jun planeta ek, jaʼ xkaltik, li kʼupil sba balumile.

Ta tsʼakale, li Jeovae la xchapan balumil sventa xuʼ te xnakiik krixchanoetik xchiʼuk li chonbolometike. La spas kʼakʼal sventa xakʼ xojobal li ta balumile. Jech xtok, la spas vitsetik, nab xchiʼuk li ukʼumetike.

¿Kʼusi kʼot ta pasel ta tsʼakal? Xi laj yal li Jeovae: «Ta xkakʼ chʼiuk tsʼiʼleletik, vomoletik xchiʼuk teʼetik». Jaʼ yuʼun, lik chʼiuk jeltos sat teʼetik, itajetik xchiʼuk nichimetik li ta balumile. Jech xtok, la spas jeltos chonbolometik ti snaʼ xvilike, ti snaʼ xnuxinajike xchiʼuk skotol li kʼusi xkilet ta balumil chanavike. La spas bikʼtal chonbolometik kʼuchaʼal tʼuletik xchiʼuk mukʼtik chonbolometik jech kʼuchaʼal li elefanteetike. ¿Kʼusi chonbolomal mas chakʼupin?

Li Jeovae xi laj yalbe li baʼyel anjele: «Jpastik krixchano». Pe li krixchanoetike mu xkoʼolajik xchiʼuk li chonbolometike, yuʼun xuʼ oy kʼusi smeltsanik, xloʼilajik, stseʼinik xchiʼuk spasik orasion. Jech xtok, li krixchanoetike chchabiik li balumile xchiʼuk li chonbolometike. ¿Mi xanaʼ buchʼu li baʼyel vinike? Jkʼeltik batel.