Lajchaʼvoʼ jpaʼivanejetik

KʼELAVIL li sat teʼetik ti xkuchojik li viniketik liʼe. Kʼelavil kʼu to smukʼul li jchoj tsʼusube. Chaʼvoʼ to viniketik xkuchojik tal ta jun teʼ. Kʼelavil noxtok li ikuxetik xchiʼuk li karanatoetike. ¿Bu lik tal li kʼupil sba sat teʼetik liʼe? Ta yosilal Canaán. Vuleso ta ajol, li Canaane jaʼ li bu toʼox nakal Abraham, Isaac xchiʼuk Jacobe. Pe ta skoj li viʼnal echʼ tee, li Jacob xchiʼuk yutsʼ yalale bat nakiikuk ta Egipto. Avi ne, ti kʼalaluk echʼem xaʼox 216 jabile, li Moisese ta xikʼ sutel ta Canaán li j-israeletike. Vaʼun te xa oyik ta Cades, te ta taki xokol balumil.

Naka chopol krixchanoetik te nakalik li ta Canaane. Jech oxal li Moisese la stak batel lajchaʼvoʼ jpaʼivanejetik, xi la jyalbe batele: Kʼelik kʼuyepal li krixchanoetik te nakalike xchiʼuk mi toj tsotsik. Kʼelik mi toj lek stakʼ tsʼunel kʼusitikuk. Xchiʼuk mu me xchʼay ta ajolik yichʼel tal jlomuk sat teʼetik.

Kʼalaluk vulik ta Cades li jpaʼivanejetike, xi vul yalbeik li Moisese: Li osil ay jkʼelkutik tale batsʼi lek ta jyalel. Sventa chakʼik ta ilel ti melel jeche, la jyakʼik ta ilel jlom sat teʼetik. Pe ta skotol li jpaʼivanejetike lajunvoʼ xi la jyalike: Li krixchanoetik te nakalike toj mukʼtik xchiʼuk toj tsotsik. Ta xi smilutik mi ta jkʼan ta jpojbetik li yosilike.

Kʼalal la jyaʼiik jech li j-israeletike xiʼik tajek. Jaʼ lek ti teuk li jcham ta Egiptoe o jaʼ lek ti liʼuk xi jcham ta taki xokol balumile, xiik. Chi jchamutik ta pas leto, li kajniltaktike xchiʼuk jnichʼnabtike ch-ochik ta skʼob li kajkontratike. ¡Jsaʼtik junuk bankilal kuʼuntik sventa xi jyikʼutik sutel ta Egipto, jaʼ kiktatik li Moisese!, xiik.

Pe oy chaʼvoʼ jpaʼivanejetik ti spatoj yoʼontonik ta stojolal Jeovae, liʼe tskʼan ta spatbeik yoʼonton li jteklume. Jaʼ sbi Josué xchiʼuk Caleb. Xi la jyalike: Mu xa xiʼik. Liʼ oy ta jtojolaltik li Jeovae. Mu tsotsuk chkuʼunintik li lum leʼe, xiik. Pe li jteklume muʼyuk la xchikinta. Solel tsmil yaʼiik li Josué xchiʼuk li Calebe.

Taje ilin-o tajek li Jeovae, jech oxal xi la jyalbe li Moisese: Mi junuk ti buchʼu yichʼoj 20 jabil o mase muʼyuk ta x-ochik li ta yosilal Canaane. Yilojik li skʼelobiltak juʼelal la jpas ta Egipto xchiʼuk li ta taki xokol balumile, pe yokel to mu spat yoʼontonik ta jtojolal. Jaʼ yuʼun 40 jabil cha batik ta yalel muyel ta butikuk noʼox li ta taki xokol balumile jaʼ to mi cham li slajebe. Kʼajomal noʼox Josué xchiʼuk Caleb ch-ochik li ta yosilal Canaane.