12 ta voʼ viniketik

Li j-israeletike lokʼik batel li ta vits Sinaie, te echʼik batel ta takixokol balumil ta Paran, vaʼun te kʼotik ta Kades. Xi albat yuʼun Jeova li Moisese: «Tako batel 12 ta voʼ viniketik ta Kanaan sventa xbat skʼelik kʼu yelan li osile, yuʼun jaʼ chkakʼbe j-israeletik li yosilal Kanaane, jun ta jujuchop snitilulalik xatak batel». Vaʼun, li Moisese la stʼuj 12 jpaʼivanej, xi laj yalanbee: «Batanik ta Kanaan, bat kʼelik mi xchʼi li kʼusi chichʼ tsʼunel tee. Kʼelik mi toj tsots xuʼ yuʼunik li jnaklejetik tee o mi muʼyuk xchiʼuk kʼelik mi ta karpana noʼox nakalik o mi oy smuroal ti bu nakalike». Li 12 ta voʼ ti bat skʼelik li osil ta Kanaane, te tsakal skʼoplal li Josue xchiʼuk Kalebe.

Kʼalal jelav xa ox 40 kʼakʼale, sutik talel li jpaʼivanejetike. Yichʼojik tal igo, granada xchiʼuk uva, xi vul yalike: «Toj lek maʼ li yosilal Kanaane, jaʼ noʼoxe toj tsotsik li jnaklejetik tee xchiʼuk lek joyolik ta muro». Pe xi laj yal li Kalebe: «¡Batik, yuʼun stsal kuʼuntik!». ¿Kʼu yuʼun xanaʼ ti jech laj yal li Kalebe? Yuʼun li Kaleb xchiʼuk Josuee spatoj lek yoʼontonik ta stojolal Jeova. Pe li lajunvoʼ jpaʼivanejetike xi laj yalike: «Jaʼ lek mu xijbat, yuʼun toj mukʼtik li krixchanoetik tee xchiʼuk jun to snatikil. Yan li voʼotike xijkoʼolaj noʼox ta jkot pʼilix».

Ta skoj taje, chibaj yoʼonton li j-israeletike, lik bikʼtal kʼopojikuk, xi laj yalike: «Jtʼujtik yan buchʼu xuʼ sbeiltasutik, jaʼ lek sutkutik batel ta Ejipto. ¿Kʼusi chbat jsaʼtik li ta Kanaane? ¿Mi yuʼun jecheʼ te chbat kakʼ jbatik ta milel?». Pe xi laj yalik li Kaleb xchiʼuk Josuee: «Mu xa xiʼik jaʼ lek jchʼunbetik smantal li Jeovae, yuʼun jaʼ tskoltautik». Pe muʼyuk xa la xchikintaik li j-israeletike, kʼajomal tskʼan ox tsmilik li Josue xchiʼuk Kalebe.

¿Kʼusi la spas li Jeovae? Xi laj yalbe li Moisese: «Ep ta velta lek kʼusi la jpasbe li j-israeletike, pe mu skʼan xchʼunbeikun jmantal. Jaʼ yuʼun, akʼo liʼ komikuk 40 jabil ta takixokol balumile sventa liʼ xcham skotolike. Jaʼ noʼox xuʼ te xnakiik li Josue xchiʼuk Kaleb xchiʼuk li yalab xnichʼnab j-israeletik li ta Albil Balumil ti kaloj onoʼox chkakʼbeike».