Kiletel chon ti pasbil ta kovre takʼine

¿MI BATSʼI chon yileluk li te tsʼotol ta teʼe? Maʼuk, mu jaʼuk batsʼi chon. Li chon leʼe pasbil ta kovre (bronce) takʼin. Li Moisese albat yuʼun Jeova ti akʼo stsʼot muyel ta teʼ sventa tskʼelik batel li krixchanoetike, sventa mu xchamik. Pe li kiletel chonetik ta lumtike, jaʼ batsʼi chonetik. Li krixchanoetike lajik ta tiʼel jech oxal iʼipajik. ¿Mi xa naʼ kʼu yuʼun?

Yuʼun li j-israeletike chchopol kʼoptaik Dios xchiʼuk Moisés. Xi la jyalike: ¿Kʼu yuʼun la alokʼesunkutik tal ta Egipto sventa chtal chamkunkutik liʼ ta taki xokol balumile? Yuʼun liʼe muʼyuk veʼlil, mi jaʼuk voʼ. Xchiʼuk noxtok echʼ xa koʼontonkutik ta slajesel li mu manae, xiik.

Pe li manae jaʼ lekil veʼlil. Ta skʼelobil sjuʼel Jeova la jyakʼ ta sventa li slumale. Xchiʼuk ta skʼelobil sjuʼel la jyakʼbe voʼ li slumale. Li j-israeletike chabibilik yuʼun li Diose, pe mi jaʼuk oy ta yoʼontonik stojbel ta vokol. Jaʼ yuʼun ti Jeovae la stak tal kiletel chonetik ti oy svenenoal sventa stojol smulik. Lajik ta tiʼel ta kiletel chonetik, jech oxal toj ep chamik.

Vaʼun li krixchanoetike batik ta stojolal Moisés, xi la jyalbeike: La jsaʼ jmulkutik, yuʼun chopol kʼopojemunkutik ta stojolal Jeova xchiʼuk ta atojolal ek. Kʼopono Jeova sventa tslokʼes li kiletel chonetik liʼe, xiik.

Jech oxal li Moisese la skʼopon Dios sventa li j-israeletike. Li Moisese albat yuʼun Jeova ti akʼo spas jkot kiletel chon ta kovre takʼine. Albat ti akʼo stsʼot ta jun teʼe, yuʼun jech skʼelik batel ti buchʼutik lajem ta tiʼele. Ti Moisese la spas jech kʼuchaʼal albat yuʼun li Diose. Li buchʼutik lajem ta tiʼele, ta skʼelik batel li chon pasbil ta kovre takʼine, vaʼun jech ta xpoxtajik.

Oy kʼusi xuʼ jchantik ta sventa taje. Jkotoltik xi jkoʼolajutik xchiʼuk li j-israeletik ti lajemik ta tiʼel ta kiletel chone. Kʼelavil, skotol krixchanoetik ta xmalub, ta x-ipaj xchiʼuk ta xcham. Taje jaʼ ta skoj li baʼyel vinik xchiʼuk li baʼyel antse, li Adán xchiʼuk Evae, yuʼun jkotoltik jaʼ yalab xnichʼnabutik. Pe ti Jeovae tsjam jun be sventa xuʼ xi jkuxiutik-o sbatel osil.

Li Jeovae la stak tal ta Balumil li xNichʼone, li Jesucristoe. Li Jesuse la jyichʼ jokʼanel ta jun teʼ, yuʼun ep buchʼutik la snopik ti jaʼ jun chopol vinike. Pe ti Jeovae la jyakʼ sventa chi spojutik. Mi ta jkʼeltik batel ta stojolal Jesuse, mi ta jtsʼaklitike, xuʼ xi jkuxiutik sbatel osil. Ta mas tsʼakal ta to jchantik mas ta sventa taje.