Li pukujil meʼ ajvalil Jezabele

KʼALAL cham xaʼox li ajvalil Jeroboame, li ajvaliletik ti tspasik mantal ta norte li lajunvokʼ nitilulal ta Israele toj chopolik. Li buchʼu mas toj chopole jaʼ li ajvalil Acabe. ¿Mi xa naʼ kʼu yuʼun? Li srasonal mas tsots skʼoplale jaʼ li yajnile, li pukujil meʼ ajvalil Jezabele.

Li Jezabele maʼuk j-israelal ants. Jaʼ stseb li ajvalil ta Sidone. Li Jezabele ta smuyubta li jecheʼ dios Baale, jech noxtok la sokbe yoʼonton Acab xchiʼuk epal j-israeletik ta smuyubtael li Baal eke. Li Jezabele ta skontrain Jeova, jech oxal ta smilanbe ep yajchʼul alkʼoptak. Li yantik jchʼul alkʼopetike ta snakʼ sbaik ta nail chʼen sventa mu xmilatik. Mi oy kʼusi ta skʼan yaʼi li Jezabele, xuʼ ta xmilvan-o sventa ta sta li kʼusi tskʼan yoʼontone.

Jun velta li ajvalil Acabe ta xat yoʼonton. Jech oxal li Jezabele xi la sjakʼe: ¿Kʼu yuʼun ti cha vat avoʼonton chkile?, xut.

Li Acabe xi la stakʼe: Jaʼ ta skoj li kʼusi la jyalbun Nabote, xi. Yuʼun ta ox jmanbe yosil ti bu stsʼunoj tsʼusubetike. Pe la jyalbun ti mu xuʼ xkichʼbee, xi.

Mu kʼu xal avoʼonton, xi li Jezabele. Voʼon ta jpas ti akʼo xa vuʼunine, xi.

Jech oxal li Jezabele la stsʼibabe batel karta li bankilaletik ta lum ti bu nakal li Nabote. Albeik jayvoʼ viniketik ti mu kʼusi xtunik-o ti akʼo yalik ti Nabote la xchopol kʼopta Dios xchiʼuk ti la xchopol kʼopta li ajvalile. Vaʼun lokʼesik li ta lume, milik ta ton.

Kʼalaluk la jyaʼi Jezabel ti cham xa li Nabote, xi la jyalbe li Acabe: Batan, ba ichʼbo li yosil Nabote. ¿Mi mu jechuk ti skʼan stoj smul li Jezabel ta skoj ti kʼusi toj chopol la spase?

Jaʼ yuʼun, ta tsʼakal li Jeovae la stak batel Jehú sventa chakʼbe stoj smul li Jezabele. Kʼalaluk la jyaʼi Jezabel ti te xa xtal li Jehue, la sbon sat yuʼun tskʼan ti alakʼ xa sbae. Pe kʼalal kʼot li Jehue te la jyil Jezabel ta ventana, xi la jyalbe li viniketik ti te oyik ta sna ajvalile: ¡Jipik yalel tal!, xi. Li viniketike la xchʼunik mantal kʼuchaʼal cha vil ta lokʼole. La sjipik yalel vaʼun icham. Jaʼ jech laj xi skʼoplal li pukujil meʼ ajvalil Jezabele.