Laj yichʼ milel jun chopol meʼ ajvalil

Li Akabe te oy ta sventanail spasob mantal, te skʼeloj batel ti bu stsʼunoj s-uva jun vinik ti Nabot sbie. Li Akabe oy ta yoʼonton tsman li osil taje, jaʼ yuʼun bat sjakʼbe Nabot mi tskʼan chchon li yosile. Pe li Nabote mu skʼan xchon, yuʼun li ta Smantal Jeovae chal ti mu stakʼ chonel li osil ti akʼbil komel yuʼun stot li jun kereme. Jaʼ yuʼun, lek li kʼusi la spas Nabote. Pe ¿mi laj van stsak ta venta Akab li kʼusi tsnop Nabote? Muʼyuk. Ta skoj taje, ilin tajek li Akabe, jaʼ yuʼun mu xa skʼan xlokʼ li ta skuartoe xchiʼuk mu xa skʼan xveʼ xtok.

Li yajnil Akabe, jaʼ li chopol meʼ ajvalil Jesabele. Xi laj yalbe li smalale: «Pe voʼot li ajvalilot ta Israele, jaʼ yuʼun xuʼ xavichʼ skotol li kʼusitik chakʼane. Voʼon ta jkʼel kʼuxi xuʼ xavichʼ li uvatik yuʼun Nabote». Jaʼ yuʼun, la stsʼibabe batel jlik karta li bankilaletik ta jteklume. Li ta karta taje te laj yal batel ti akʼo stikʼbeik smul Nabot ti laj la xchopol kʼopta li Diose xchiʼuk ti akʼo xichʼ milel ta tone. Li bankilaletike jaʼ jech la spasik ti kʼu yelan laj yal li meʼ ajvalil Jesabele. Laje, xi laj yalbe smalal li Jesabele: «Cham xa li Nabote, xuʼ xa xavichʼbe li yosile».

Li Jesabele maʼuk noʼox la smil li Nabote, yuʼun la smil epal krixchanoetik ti skʼanojik li Jeovae. Jech xtok, laj yichʼ ta mukʼ jecheʼ diosetik xchiʼuk oy to yantik kʼusitik toj chopolik la spas. Pe li Jeovae yiloj skotol li kʼusitik chopol tspase. ¿Kʼusi van tspasbe li Jesabele?

Kʼalal echʼ xa ox kʼuuk sjalil xchamel li Akabe, jaʼ lik ajvalilajuk li skerem ti Jeoram sbie. Li Jeovae la stak batel jun vinik ti Jeu sbi sventa xakʼbe kastigo li Jesabel xchiʼuk yutsʼ yalale.

Li Jeue muy ta skareta xchiʼuk bat ta Jesreel ti jaʼ te nakal li Jesabele. Jech ek li Jeorame muy ta skareta sventa xbat nup ta be li Jeue. Vaʼun, kʼalal la sta sbaike, xi la sjakʼ li Jeorame: «¿Mi maʼuk me saʼkʼop tal apas, Jeu?». Xi la stakʼ li Jeue: «¡Kʼuxi xa noʼox mu xtal jsaʼkʼop ti naka chopol kʼusitik tspas li ameʼ Jesabele!». Kʼalal laj yaʼi Jeoram taje, lik jatavuk batel li ta skaretae, pe li Jeue la smil batel ta flecha.

Ta tsʼakale, li Jeue bat li ta spasob mantal Jesabele. Vaʼun, kʼalal laj yaʼi Jesabel ti chkʼot li Jeue, la smeltsan sba lek, la sbon sat xchiʼuk la stus sjol. Vaʼun, te chotol la smala ta sventanail li ta xchaʼkojal snae. Kʼalal kʼot li Jeue, muʼyuk lek la stakʼ li Jesabele. Jaʼ yuʼun, li Jeue xi tsots laj yalbe li yajtuneltak Jesabele: «¡Jipik yalel tal!». Vaʼun, la sjipik yalel ta ventana li Jesabele xchiʼuk toj chamel kʼot.

Ta mas tsʼakale, li Jeue la smilbe li 70 xnichʼnabtak Akabe xchiʼuk la slajesbe skʼoplal li yichʼel ta mukʼ jecheʼ dios Baale. ¿Mi laj avakʼ venta? Li Jeovae xil xchiʼuk snaʼ skotol li kʼusi chkʼot ta pasele xchiʼuk kʼalal jaʼo yorail chile, chakʼbe kastigo li buchʼutik chopol kʼusitik tspasike.