Tspat yoʼonton ta stojolal Jeova li Josafate

¿MI XA naʼ buchʼutik li viniketik liʼe xchiʼuk mi xa naʼ kʼusi ta spasik? Chbatik ta pas leto, li viniketik ta jbabee yakal ta xkʼejinik. Xuʼ van cha jakʼbe aba: ¿Kʼu yuʼun chʼabal yespadaik xchiʼuk slansaik sventa tspasik leto li buchʼutik chkʼejinike? Jkʼeltikik.

Li Josafate jaʼ yichʼoj ta venta li chaʼvokʼ nitilulal ta Israele. Jaʼo kuxi kʼalaluk ch-ajvalilaj li Acab xchiʼuk Jezabel ta stojolal li lajunvokʼ nitilulal ta Israel ta nortee. Pe li Josafate jaʼ lekil ajvalil, jech kʼuchaʼal echʼ li Asae, stot li Josafate. Jaʼ yuʼun ep jabil jun yoʼontonik li chaʼvokʼ nitilulal ta Israel ti ventainbilik yuʼun li ajvalil ta sure.

Pe tana liʼe oy kʼusi kʼot ta pasel ti ta xiʼo li krixchanoetike. Oy jayvoʼ j-ichʼ kʼopetik xi la jyalbeik li Josafate: Chtal spas leto ta akontra epal soltaroetik ti likemik tal ta yosilal Moab, Amón xchiʼuk li ta vits Seire. Ep j-israeletik la stsob sbaik ta Jerusalén sventa tskʼanik koltael ta stojolal Jeova. Batik ta chʼulna, vaʼun li Josafate xi la skʼopon Diose: O Jeova Dios kuʼunkutik, mu jnaʼ kʼusi ta jpas. Mu xuʼ kuʼunkutik stsalel li epal soltaro liʼe. Koltaunkutik, xi.

Li Jeovae la jyaʼi, jech oxal la jyalbe jun yajtunel ti akʼo xi xalbe li jteklume: Li pas letoe maʼuk avuʼunik, jaʼ yuʼun Dios. Muʼyuk bu cha pasik leto. Kʼelavilik noʼox, kʼelavilik kʼuxi cha skoltaoxuk li Jeovae.

Jech oxal ta yokʼomal xi la jyalbe jteklum li Josafate: ¡Pat avoʼontonik ta stojolal Jeova! Vaʼun jaʼ jbabe la jyakʼ li jkʼejimoletike jaʼ patil to li soltaroetike, kʼalal yakal ta xchan yokik taje ta xkʼejinik sventa tsmuyubtaik li Jeovae. ¿Mi xa naʼ kʼusi kʼot ta pasel kʼalal nopajik batel li ta pas letoe? Li jkontrainvanejetike lik sokesbatuk sjolik yuʼun Jeova jech te la smilan sba stukik. ¡Kʼalaluk kʼotik li j-israeletike, skotol li jkontrainvanej soltaroetike chamemik xaʼox!

¿Mi mu jechuk ti pʼij li Josafat kʼalal la spat yoʼonton ta stojolal Jeovae? Mi jech ta jpastik eke yuʼun pʼijutik.