Li Jeovae la spoj li Jeosafate

Li Jeosafate jaʼ jun ajvalil echʼ ta Juda ti la sjinesbe skotol li skajleb matanal yuʼun Baale xchiʼuk li yan jecheʼ diosetik oy ta jteklume. Li kʼusi oy ta yoʼontone jaʼ ti akʼo xojtikinbeik smantaltak Jeova li krixchanoetike. Jaʼ yuʼun, li Jeosafate la stak batel jlevietik xchiʼuk bankilaletik ta sjunul li steklumal Juda sventa xakʼik ta chanel li smantaltak Jeovae.

Li yan jteklumetike mu skʼan stsakik ta kʼop li Judae, yuʼun snaʼojik ti koltabilik yuʼun li Jeovae. Jaʼ yuʼun, chichʼbeik batel smoton li ajvalil Jeosafate. Pe li jmoabetike, li j-amonetike xchiʼuk li yan jteklumetik li ta yosilal Seire bat stsakik ta kʼop li Judae. Pe li Jeosafate snaʼoj ti xuʼ xkoltaatik yuʼun li Jeovae. Jaʼ yuʼun, la stsob ta Jerusalen skotol li viniketik, antsetik xchiʼuk li kʼox kerem tsebetike. Vaʼun, li Jeosafate xi la skʼopon Jeova ta yeloval skotol li krixchanoetike: «Jeova, mi muʼyuk chakoltaunkutike, mu xuʼ jpaskutik kanal li ta paskʼope. Avokoluk, albunkutik kʼusi xuʼ jpaskutik».

Li Jeovae laj yaʼibe s-orasion li Jeosafate, vaʼun xi takʼbate: «Mu xa xiik, voʼon ta jkoltaoxuk. Saʼo noʼox lek avavilik, tsʼijlanik noʼox, kʼelik kʼu yelan ta jpojoxuk». ¿Kʼu van yelan chkoltaatik yuʼun li Jeovae?

Li ta sob yokʼomale, li Jeosafate la stʼuj jkʼejimoletik xchiʼuk laj yalanbe ti akʼo jbabe xanavikuk batel ta yeloval li soltaroetike. Vaʼun, lokʼik batel li ta Jerusalene, batik ta jun osil ti Tekoa sbie, ti jaʼ te tspasik kʼope.

Li jkʼejimoletike xmuyubajik noʼox la skʼejintaik Jeova. Kʼalal jaʼo jech tspasike, li Jeovae yakal tspas kʼop xchiʼuk li j-ammonetik xchiʼuk li jmoabetike, yuʼun laj yakʼ ti akʼo te noʼox smil sba stukike. Vaʼun, te cham skotolik. Li Jeovae la xchabi li jnaklejetik ta Judae, li soltaroetike xchiʼuk li paleetike. Skotol li kʼusi la spas Jeovae kʼot ta xchikin li yan jteklumetik ti te nopol oyike. Vaʼun, laj yakʼik venta ti yakal chchabi steklumal li Jeovae. Pe ¿kʼutik yelan chchabi steklumal li Jeovae? Ep ta tos ti kʼu yelan tspase. Jech xtok, mu persauk tskʼan koltael ta stojolal li krixchanoetike.