Li Diose la skolta li ajvalil Ezequiase

¿MI XA naʼ kʼu yuʼun tskʼopon Jeova li vinik liʼe? ¿Kʼu yuʼun te la jyakʼ kartaetik ta yeloval skajleb smoton Jeova? Li vinik liʼe jaʼ Ezequías. Jaʼ ajvalil li ta chaʼvokʼ nitilulal ta Israel ta sure. Yakal ta xil tsots svokoltak. ¿Kʼu yuʼun?

Yuʼun li soltaroetik ta Asiriae la xa stsal komel li lajunvokʼ nitilulal ta Israel ta nortee. Li Jeovae la jyakʼ jech kʼotuk ta pasel yuʼun toj chopolik li krixchanoetik taje. Vaʼun, tana liʼ ne li soltaroetik ta Asiriae talemik ta pas leto ta skontra li chaʼvokʼ nitilulal ta Israele.

Li ajvalil ta Asiriae naka to la stakbe batel kartaetik li ajvalil Ezequiase. Jaʼ li kartaetik ti te la jyakʼ Ezequías ta yeloval li skajleb smoton Diose. Chchopol kʼopta Jeova li kartaetike xchiʼuk ta xalbe ti akʼo yakʼ sba ta entrekal li Ezequiase. Jech oxal li Ezequiase xi la skʼopon Diose: O Jeova, mu xa vakʼ ti akʼo stsalunkutik li ajvalil ta Asiriae. Vaʼun jech ta snaʼik lumetik ti voʼot noʼox atuk Diosote, xi. ¿Mi ta van xaʼi ti Jeovae?

Li Ezequiase jaʼ lekil ajvalil. Mu xkoʼolaj kʼuchaʼal li chopol ajvaliletik ti la jyichʼik ta venta li lajunvokʼ nitilulal ta Israele, mi jaʼuk la xchanbe li xchopol talelal stote, li Acaze. Moʼoj, yuʼun li stuke la xchʼunbe lek skotol li smantaltak Jeovae. Jaʼ yuʼun, kʼalaluk laj yoʼonton ta skʼoponel Diose, li jchʼul alkʼop Isaiase la stakbe batel Ezequías li aʼyej akʼbat yuʼun Jeovae: Li ajvalil ta Asiriae muʼyuk ch-och ta Jerusalén. Mi junuk yajsoltarotak ta xnopaj batel. Muʼyuk ta stʼilesik batel mi jmojuk flecha li ta lume.

Kʼelavil li lokʼol liʼe. ¿Mi xa naʼ buchʼutik li anima soltaroetik leʼe? Jaʼ li j-asirioetike. Li Jeovae la stak tal yaj-anjel, vaʼun li anjele la smil 185.000 j-asirioetik. Jaʼ yuʼun li ajvalil ta Asiriae sut batel.

Li chaʼvokʼ nitilulal ta Israele muʼyuk bu stsalatik, jech oxal la jyil lekilal kʼuk sjalil li jteklume. Pe kʼalaluk cham li Ezequiase, jaʼ och ta ajvalilal li Manasese. Li Manasés xchiʼuk li xnichʼon ti jaʼ sbi Amone, jaʼ chopol ajvaliletik echʼik. Jaʼ yuʼun li balumile noj noxtok ta jpʼaj mantaletik xchiʼuk epaj buchʼutik tspasik kʼusitik chopol. Kʼalaluk milat yuʼun yajtuneltak li Amone, jaʼ och sventain li chaʼvokʼ nitilulal ta Israel li xnichʼone, ti jaʼ sbi Josiase.