Li yaj-anjel Jeovae la xchabi li Esekiase

Li ajvalil ta Asiriae laj yuʼunin li lajunchop nitilulal ta Israele. Pe tskʼan yaʼi xtok li chaʼchop nitilulal ta Judae. Jaʼ yuʼun, ta kʼunkʼun lik yuʼunin li jteklumetik ta Judae. Pe ti bu tskʼan tajeke, jaʼ li Jerusalene. Li Senakeribe mu snaʼ ti yakal chchabi Jerusalen li Jeovae.

Li Esekias ti jaʼ ajvalil ta Judae laj yakʼbe epal takʼin li Senakerib sventa mu stsakatik ta kʼope. Akʼo mi la stsak takʼin li Senakeribe, laj onoʼox stak batel yajsoltarotak sventa xbat stsakik ta kʼop. Jaʼ yuʼun, li krixchanoetik ta Jerusalene solel xiʼemik tajek, yuʼun yantik xa chnopajik batel li j-asiriaetike. Jaʼ yuʼun, li Esekiase xi laj yalbe li Judaetike: «Mu xa xiʼik yuʼun li j-asiriaetik ti lek xuʼ yuʼunik paskʼope, yuʼun liʼ xchiʼinojutik li Jeova Dios kuʼuntik sventa skoltautike».

Li Senakeribe la stak batel jun j-al-aʼyej sventa xbat slaban li krixchanoetik ta Jerusalene, li vinik taje rabsake sbi ta skoj li yabtel akʼbile. Kʼalal te xa ox oy ta stiʼ Jerusalen li rabsakee, xi tsots laj yale: «¡Li Jeovae mu xuʼ yuʼun skoltaoxuk. Mu xavakʼ abaik ta loʼlael yuʼun li Esekiase, yuʼun mi junuk dios xuʼ yuʼun skoltaoxuk!».

Li Esekiase la sjakʼbe Jeova li kʼusi xuʼ spase, vaʼun xi la stakʼ li Jeovae: «Mu xaxiʼ yuʼun li kʼusi chal rabsakee, yuʼun mu onoʼox stsal yuʼun Jerusalen li Senakeribe». Ta tsʼakale, takbat tal karta yuʼun Senakerib li Esekiase, xi chal li kartae: «Akʼo xa abaik ta jkʼob. Yuʼun mu xuʼ yuʼun skoltaoxuk li Jeovae». Vaʼun, li Esekiase xi laj yalbe li Jeovae: «Jeova, avokoluk, koltaunkutik sventa snaʼik ti voʼot noʼox atuk melel Diosote». Vaʼun, xi la stakʼ li Jeovae: «Li ajvalil ta Asiriae muʼyuk ta x-och tal li ta Jerusalene, yuʼun voʼon ta jchabi li jteklumale».

Li ajvalil Senakeribe jpʼel ta yoʼonton ti chuʼunin li Jerusalene. Pe li Jeovae la stak batel jun yaj-anjel ti bu spasoj skarpanaik li j-asiriaetik ti nopol xil li spat jteklume. Li anjele la smil 185 mil soltaroetik ta jun noʼox akʼobal. Milbat skotol li yajsoltarotak ajvalil Senakerib ti lek xuʼ yuʼunik paskʼope. Ta skoj ti mu xa kʼusi stakʼ spas li Senakeribe, sut batel ta sna. Vaʼun, koltaatik onoʼox yuʼun li Jeovae, yuʼun la xchabi li Jerusalene xchiʼuk li Esekiase. Ti teuk oyot ta Jerusalen kʼalal jech kʼot ta pasele, ¿mi laj van apat avoʼonton ta stojolal Jeova ti jechuke?