Ta jkʼol na ta toyol

ECHʼ xa chib kʼakʼal, tana liʼe jaʼ xa jueves, akʼobaltik xa. Li Jesús xchiʼuk li lajchaʼvoʼ yajtakboltake talemik liʼ ta mukʼta jkʼol na ta toyole sventa tslajesik li veʼlil yuʼun kʼin Koltaele. Li buchʼu yakal chlokʼ batele jaʼ Judas Iscariote. Chbat yalbe paleetik kʼux-elan xuʼ tstsakik li Jesuse.

Kʼalal jun toʼox kʼakʼal skʼane, li Judase la xchiʼin ta loʼil li paleetike, xi la jyale: ¿Kʼusi cha vakʼbeikun mi ta jkoltaoxuk ta stsakel li Jesuse?, xi. Li paleetike xi la stakʼike: Ta xkakʼbotkutik 30 ta sep sakil takʼin, xiik. Jech oxal li Judase bat skʼel li viniketik taje, sventa chikʼan batel ti bu oy li Jesuse. ¡Toj echʼ noʼox chopol!, ¿mu jechuk?

Tsuts xa li veʼel ta kʼin Koltaele. Pe tanae li Jesuse la slikes yan veʼel ti tsots skʼoplale. Vaʼun la jyakʼbe jpʼej pan li yajtakboltake xchiʼuk xi la jyale: Veʼanik, yuʼun jaʼ smelolal jbekʼtal ti chichʼ akʼel ta aventaike. Vaʼun la stsak noxtok jun vaso yaʼlel tsʼusub xchiʼuk xi la jyale: Uchʼanik yuʼun jaʼ smelolal jchʼichʼel ti chichʼ malel ta aventaike, xi. Li veʼel taje, li Vivliae ta sbiiltas: Snaʼobil Kajvaltik.

Li yaj-anjel Diose muʼyuk x-echʼ ta snaik j-israeletik ti kʼalal te toʼox oyik ta Egiptoe, pe ta sna j-egiptoetike echʼ te neʼ, milbatik li sba xnichʼonike, jech oxal kʼalal tslajesik li veʼlil yuʼun kʼin Koltael li j-israeletike jaʼ chvul ta sjolik taje. Pe tanae, li Jesuse tskʼan akʼo xtaat ta naʼel yuʼun li yajtsʼaklomtake, xchiʼuk akʼo staik ta naʼel ti cham ta stojolalike. Jaʼ sventa li veʼel ta mal kʼakʼal ta jujun jabile.

Kʼalal laj veʼikuk li ta snaʼobil Kajvaltike, li Jesuse la jyalbe yajtakboltak ti akʼo tsotsuk yoʼontonike xchiʼuk ti akʼo tsotsuk xchʼunel yoʼontonike. Ta slajebal ne la skʼejintaik Dios, laj ne lokʼik batel. Toj ikʼ xa osil, oʼlol xa van akʼobal. Jkʼeltikik bu chbatik.