Slajeb velta veʼ li Jesuse

Li judaetike jujun jabil tspasik li Kʼin Koltael ta 14 yuʼun Nisane. Taje jaʼ sventa svules ta sjolik ti kʼu yelan pojatik lokʼel yuʼun Jeova kʼalal mosoinbilik toʼox ta Ejiptoe xchiʼuk ti ikʼatik batel li ta Albil balumile. Jaʼ yuʼun, li ta sjabilal 33, li Jesus xchiʼuk yajtakboltake la spasik li Kʼin Koltaele, te la spasik ta xchaʼkojal jpʼej na ta Jerusalene. Kʼalal laj xa ox yoʼontonik ta veʼele, xi laj yal li Jesuse: «Oy buchʼu junukal avuʼunik ti chakʼun ta kʼabale». Vaʼun, li jtakboletike toj labal to sba laj yaʼiik, vaʼun xi la sjakʼbeike: «Kajval, ¿buchʼu taje?». Xi la stakʼ li Jesuse: «Jaʼ li buchʼu chkakʼbe tana li pan liʼe». Li Jesuse laj yakʼbe Judas li pane. Vaʼun, lokʼ batel li Judase.

Kʼalal laj xa ox spas orasion li Jesuse, la stsak jun pan xchiʼuk la xut, vaʼun laj yakʼbe li yajtakboltake. Xi laj yalanbee: «Veʼanik li pan liʼe, yuʼun jaʼ smelolal jbekʼtal ti chkakʼ ta atojolalike». Jech xtok, la stsak jun kopa vino, la stojbe ta vokol yan velta li Jeovae, vaʼun laj yakʼbe li yajtakboltake, xi laj yale: «Uchʼan akotolik, yuʼun jaʼ smelolal jchʼichʼel ti ta jmal sventa ep buchʼutik tsta perton ta skoj smulike. Jamal chkalboxuk ti jmoj chij-ajvalilaj li ta vinajele. Jech xapasilanik jujun jabil sventa jnaʼobil». Li melel yajtsʼaklom Kristoe jech-o tspasilanik jujun jabil. Taje ojtikinbil kʼuchaʼal li Veʼlil ta bat kʼakʼal yuʼun Kajvaltike.

Kʼalal laj xa ox yoʼontonik ta veʼele, te lik svulilan sbaik li yajtakboltak ti buchʼu mas tsots skʼoplal yuʼunike. Jaʼ yuʼun, xi laj yal li Jesuse: «Li buchʼu tskʼan mukʼ skʼoplal avuʼunike, skʼan bikʼit xakʼ sba».

Xi to laj yal li Jesuse: «Voʼoxuk kamigooxuk, jaʼ yuʼun chkalboxuk li kʼusi oy ta yoʼonton li Jtote. Li voʼone poʼot xa xisut batel ta vinajel ti bu oy li Jtote, yan li voʼoxuke liʼ chakomike. Mi jech-o chakʼan abaik jech kʼuchaʼal jkʼanojoxuke, ta snaʼik skotol krixchanoetik ti voʼoxuk kajchankʼopoxuke».

Ta tsʼakale, li Jesuse la spas orasion sventa skʼanbe vokol Jeova ti xchabibat skotol li yajtsʼaklomtake xchiʼuk ti junuk yoʼonton x-abtejike. Jech xtok, la skʼan ta orasion ti akʼo xichʼ chʼultajesbel sbi li Jeovae, ta tsʼakale jmoj la skʼejintaik Jeova xchiʼuk li yajtakboltake, laje lokʼik batel. Skotol taje jaʼ jech la spasik kʼalal jutuk xa ox skʼan xichʼ xchukel batel li Jesuse.