6 Xchanobil

¿Kʼusi jaʼ li sReino Diose?

¿Bu oy yavil li sReino Diose? (1)  ¿Buchʼu jaʼ li sReye? (2)

¿Mi oy yantik ta x-ajvalilajik xchiʼuk li Reye? Mi yuʼun jeche, ¿jayvoʼik? (3)

¿Kʼuxi xuʼ jnaʼtik ti kuxulutik ta slajebal kʼakʼale? (4)

¿Kʼusi ta spas ta tsʼakal li sReino Dios ta sventa li krixchanoetike? (5-7)

1. Kʼalal liʼ toʼox oy ta Balumil ti Jesuse, la xchanubtas li stsʼaklomtak ta skʼanel ta orasion ti akʼo taluk li sReino Diose. Jun reinoe jaʼ jun ajvalilal, ti buchʼu ch-ajvalilaje jaʼ jun rey. Li sReino Diose jaʼ jun ajvalilal ti jaʼ noʼox stuk jeche. Te oy ta vinajel xchiʼuk tsventain tal li Balumile. Ta xchʼultajesbe sbi ti Diose, jaʼ xkaltik, ta spas ta chʼul. Ta spas ti akʼo kʼotuk ta pasel li kʼusi tskʼan Dios ta Balumil jech kʼuchaʼal te ta vinajele (Mateo 6:9, 10).

2. Dios la onoʼox jyal ta melel ti Jesus chkʼot ta Rey ta SReino (Lucas 1:30-33). Kʼalal liʼ toʼox oy ta Balumil ti Jesuse, la jyakʼ ta ilel ti jaʼ jun Ajvalil lek yoʼonton, tukʼ xchiʼuk chʼabal smul. Kʼalal sut batel ta vinajele, muʼyuk la jyichʼ chotanel ta ora kʼuchaʼal Rey li ta sReino Diose (Hebreos 10:12, 13). Ta 1914, Jeova la jyakʼbe Jesus li ajvalilal ti yalojbe onoʼox ta melele. Ta jabil taje kʼalal to ta jkʼakʼaliltike, Jesus yakal ta x-ajvalilaj ta vinajel kʼuchaʼal Rey biinem yuʼun Jeova (Daniel 7:13, 14).

3. Jech xtok, Jeova stʼujoj ta Balumil junantik tukʼil viniketik xchiʼuk antsetik ti tukʼ yakʼoj sbaik ta stojolal sventa chbatik ta vinajel. Li krixchanoetik liʼe ta x-ajvalilajik ta xokon Jesus kʼuchaʼal reyetik, jchapanvanejetik xchiʼuk paleetik sventa tsventainik li krixchanoetike (Lucas 22:28-30; Apocalipsis 5:9, 10). Jesus la sbiiltas «kuni chijtak» li skoltaombatak ta ajvalilal ta sReinoe. Ta skotole jaʼik 144.000 (Lucas 12:32, Ch; Apocalipsis 14:1-3).

4. Kʼalal pas ta Rey ti Jesuse, la slokʼes ta vinajel li Satanas xchiʼuk li xchopol anjeltake, ijipatik yalel tal ta Balumil. Jaʼ yuʼun toj chopolibem li kʼusitik ta Balumil taj ta 1914 kʼakʼal to ta jkʼakʼaliltike (Apocalipsis 12:9, 12). Letoetik, viʼnaletik, chameletik, epal pʼajel mantal..., skotol liʼe jaʼ «svinajeb» ti yakal xa ta x-ajvalilaj ti Jesuse xchiʼuk ti oy xa ta slajebal kʼakʼal li kʼusitik ta skʼakʼalil slajeb kʼakʼale (Mateo 24:3, 7, 8, 12, Ch; Lucas 21:10, 11; 2 Timoteo 3:1-5).

5. Ti Jesuse poʼot xa ta xchapan krixchanoetik xchiʼuk ta xchʼakanan jech kʼuchaʼal jun jchabiej chij ta xchʼak li chijetik ta tentsunetike. Jesuse «chijetik» ta xil li buchʼutik la jyakʼik ta ilel ti jun yoʼontonik ta stojolal li ajvalilal yuʼune xchiʼuk ta xakʼbe xkuxlejalik sbatel osil li ta Balumile. Li «tentsunetike» jaʼ li buchʼutik muʼyuk la xchʼamik li sReino Diose (Mateo 25:31-34, 46). Jesuse, poʼot xa ta slajes skotol li krixchanoetik ti jech xkoʼolajik kʼuchaʼal tentsunetike (2 Tesalonicenses 1:6-9). Mi cha kʼan cha kʼot ta «xchij» ti Jesuse, skʼan cha chikinta li aʼyej yuʼun Reino xchiʼuk cha pas li kʼusitik cha chane (Mateo 24:14).

6. Li Balumile chʼakbil ta epal mukʼtik lumetik xchiʼuk oy ajvalil yuʼunik ta jujuntal. Li lumetike nopem xaʼiik ta spasel letovajel. Pe li sReino Diose ta xkom ta xkʼexol skotol li ajvalil krixchanoetike. Jaʼ noʼox stuk ajvalil chkʼot ta spʼejel Balumil (Daniel 2:44). Vaʼun, chʼabal xa letoetik, milbail mi jaʼuk majbail. Jmoj xchiʼuk ta lekilal chnakiik skotol li krixchanoetike (Miqueas 4:3, 4).

7. Li ta Mil Jabil Ajvalilal yuʼun ti Jesuse, li buchʼutik tukʼ ta xakʼ sbaik ta stojole, chkʼotik ta krixchanoetik ti chʼabal smulik xchiʼuk ta xkʼataj ta jun paraiso spʼejel li Balumile. Kʼalal mi echʼ li mil jabile, Jesuse la xa-o spas skotol li kʼusi tskʼan toʼox Dios ti akʼo spase. Vaʼun, li Reinoe chakʼbe ta skʼob li sTote (1 Corintios 15:24). ¿Kʼu yuʼun mu xa valbe avamikotak xchiʼuk li buchʼutik lek cha vil li kʼusi ta spas li sReino Diose?

[Lokʼol ta pajina 13]

Ta ajvalilal yuʼun ti Jesuse, chʼabal xa pʼajbail, mi jaʼuk chopol kʼoptael ti buchʼu muʼyuk to ojtikinbile