Li kʼusi chanubtasvan Jesús ta sventa li Ajvalilal yuʼun Diose

«Tsʼacal to ibat ta yantic lum xchiʼuc ta tsobtsobnaetic li Jesuse. La xchol batel li Lequil Aʼyej ta sventa ventainel yuʼun Diose.» (LUCAS 8:1)

LI Jesuse xi laj yal jun veltae: «Yuʼun li cʼusi oy ta avoʼntonique jaʼ jech chlocʼ ta aveic» (Mateo 12:34). Melel onoʼox: kʼalal oy kʼusi toj tsots skʼoplal chkaʼitike, jtaleltik ti ta jkʼan chkalbetik batel li yantike. Jaʼ yuʼun, kʼalaluk ta jkʼeltik kʼuyelan chanubtasvan Jesús kʼalal la xchol mantale, te chvinaj ti toj j-echʼ noʼox tsots skʼoplal chaʼi li Ajvalilal yuʼun Diose.

¿Kʼusi jaʼ li Ajvalilal yuʼun Diose? Jaʼ jun ajvalilal ti svaʼanoj Diose xchiʼuk ti oy ta skʼob jun ajvalile. Li ajvalilal taje jaʼ li kʼusi mas laj yalbe skʼoplal Jesús kʼalal la xchol mantale, jech chakʼ ta ilel li xchanibal Evanjelioetike, yuʼun te ta jtatik mas ta 110 ta velta. ¿Kʼuxi xuʼ jchantik mas ta sventa li Ajvalilal taje xchiʼuk li kʼusi tspas ta jtojolaltike? Jaʼ mi chkaʼibetik lek li kʼusi laj yale xchiʼuk li kʼusitik la spas Jesuse.

¿Buchʼu jaʼ li ajvalil li ta Ajvalilal yuʼun Diose? Li ajvalil taje maʼuk ta votasion chichʼ tʼujel, yuʼun jaʼ tstʼuj stuk li Diose. Li Jesuse laj yal ti jaʼ tʼujat yuʼun Dios sventa jaʼ xkʼot ta ajvalile.

Jech kʼuchaʼal snaʼoj onoʼox li Jesuse, li Vivliae yaloj xa onoʼox ti Mesías ti albil onoʼox skʼoplale jaʼ chkʼot ta ajvalil li ta ajvalilal ti muʼyuk slajebe (2 Samuel 7:12-14; Daniel 7:13, 14; Mateo 26:63, 64). Jaʼ yuʼun, kʼalaluk laj yal ti jaʼ stuk ti Mesías ti albil onoʼox skʼoplale, jech laj yakʼ sba ta ojtikinel ti jaʼ li Ajvalil tʼujbil yuʼun Diose (Juan 4:25, 26). Jaʼ yuʼun, oy jayib velta xi laj yale: «Li abtel quichʼoj sventa ajvalilale» (Juan 18:36).

Li Jesús xtoke laj yal ti oy jtsop krixchanoetik ti chkoltaat ta ajvalilale (Lucas 22:28-30). Ta skoj ti jutebike, juteb chijetik xi albat skʼoplalik. Xi laj yalbe smelole: «Li Jtotic Diose slequil yoʼnton laj yacʼboxuc li ventainel yuʼune» (Lucas 12:32). Li slajeb livro ta Vivliae, chal ti jaʼik 144,000 ti yichʼojik tʼujel sventa li abtelal taje (Apocalipsis 5:9, 10; 14:1).

¿Bu ch-ajvalilaj? Kʼalal jaʼo yakal chchiʼin ta loʼil ajvalil Poncio Pilato ta Roma li Jesuse, xi laj yale: «Li abtel quichʼoj sventa ajvalilale mu jaʼuc sventa banamil» (Juan 18:36). Mi jech taje, li Ajvalilal yuʼun Diose muʼyuk tstunes junuk organisasion liʼ ta Balumil sventa tspas mantale. Lek xvinaj ti jaʼ jun ajvalilal ta vinajele (2 Timoteo 4:18).

Li Jesuse snaʼoj ti mi tsuts yabtel liʼ ta Balumile, ta sut batel ta vinajel. Te chchapan bu chkʼotik li buchʼutik tʼujbilike, ti jaʼ te xuʼ jmoj ta x-ajvalilajike (Juan 14:2, 3).

¿Kʼusi yabtel? Kʼalal la xchanubtas yajtsʼaklomtak ta spasel orasion ta stojolal Diose, li Jesuse xi laj yale: «Acʼo sta yorail chapas mantal, acʼo pasuc cʼusi tscʼan avoʼnton liʼ ta banamil jech chac cʼu chaʼal te ta vinajele» (Mateo 6:9, 10). Li kʼusi tskʼan yoʼonton Diose yakal xa chkʼot ta pasel li ta vinajele, xchiʼuk jaʼ tstunes li Ajvalilal yuʼun Dios sventa xkʼot ta pasel li kʼusi tskʼan yoʼonton liʼ ta Balumil eke. Sventa xkʼot ta pasele, li ajvalil taje ep kʼusitik ta sjel liʼ ta Balumile.

¿Kʼusitik tsjel liʼ ta Balumile? Jech kʼuchaʼal laj yal Jesuse, li Ajvalilal yuʼun Diose jaʼ tslajes skotol li kʼusitik chopole. ¿Kʼuxi? Jaʼ ti tslajes skotol liʼ ta Balumil li buchʼutik chopol kʼusitik tspasike (Mateo 25:31-34, 46). Vaʼun jech chlaj-o skʼoplal sbatel osil li choplejale xchiʼuk ti muʼyuk xkʼuxul oʼontonale. Jech kʼuchaʼal laj yal Jesuse, li ta balumile jaʼ xa noʼox chnakiik li krixchanoetik ti «mucʼ noʼox yoʼntonique», ti buchʼutik tukʼike, ti oy skʼuxul yoʼontonike, ti «oy slequil stuqʼuil yoʼntonique» xchiʼuk ti buchʼutik mu snaʼ saʼik kʼope (Mateo 5:5-9).

Jech xtok, skotolik tskʼupinik jun kuxlejal ti bu chʼabal xa kʼusitik chopole, ti muʼyuk xa yikʼobal li Balumil xchiʼuk li voʼe, ti sak xa noʼox li ikʼe, yuʼun li Jesuse yaloj xa onoʼox ti ta slekubtas skotol li kʼusitik ta Balumil li Ajvalilal yuʼun Diose. Oy toʼox jun vinik ti albil xaʼox skʼoplal chchame, xi laj yalbe li Jesuse: «Vulesun ta ajol kʼalal mi la och ta ajvalilal avuʼune», li Jesuse xi la stakʼbee: «Ta melel chkalbot li avie: Te cha chiʼinun li ta Paraisoe» (Lucas 23:42, 43, NM). Ta melel, li Ajvalilal yuʼun Diose tspas ta paraiso spʼejel li Balumil jech kʼuchaʼal ta nichimaltik Edén toʼoxe.

¿Kʼusi to yan tspas ta stojolal li krixchanoetike? Li Jesuse maʼuk noʼox laj yal li kʼusitik chtale, moʼoj, yuʼun laj yakʼ ta ilel li kʼusitik tspas li Ajvalilal yuʼun Diose. Jech kʼuchaʼal liʼe, ep poxtavan ta skʼelobil juʼelal, taje jaʼ noʼox svinajeb jutuk li kʼusi tspas ta tsʼakal mi och ta Ajvalile. Jech kʼuchaʼal laj yal Mateo ti akʼbat snaʼ yuʼun Diose, «li Jesuse ixanov ta scotol Galilea banamil; te ichanubtasvan ta jujun nail tsobobbailetic yuʼunic. Te la xcholbe yaʼyic li Lequil Aʼyeje, jaʼ ti chlic xa ventainvanuc li Diose. La scolta ep jchameletic xchiʼuc bochʼotic cʼusiuc noʼox cʼux chaʼyic» (Mateo 4:23).

Li Jesuse la xpoxta ep ta tos chameletik. Jech kʼuchaʼal liʼe, la sjambe sat jun maʼsat ti jech onoʼox vokʼeme (Juan 9:1-7, 32, 33). Jun velta xtoke, naka noʼox la spik jun vinik, vaʼun kol-o li ta ibal sba kʼaʼemal chamele (Marcos 1:40-42). Xchiʼuk kʼalal «laj yicʼbeic tal ta stojol Jesús jun umaʼ vinic xchiʼuc macal xchiquin[e]», laj yakʼ ta ilel ti «xuʼ yuʼun tsjambe xchiquin li coque[tike] xchiʼuc tsjambe ye li umaʼe[tike]» (Marcos 7:31-37).

Li Ajvalil tʼujbil yuʼun Diose tstsal yuʼun xtok li lajelale. Li Vivliae chalbe skʼoplal oxvoʼ krixchanoetik ti chaʼkuxesatik yuʼun Jesuse: jun skerem meʼon ants, ti kʼajomal jun ti yole, jun uni tseb ti lajcheb jabil yichʼoje xchiʼuk li jun yamigo ti lek skʼanoj ti Lázaro sbie (Lucas 7:11-15; 8:41-55; Juan 11:38-44).

Li Jesuse laj yalbe jtakbol Juan kʼusi tstaik ta jelavel li buchʼutik chventainatik yuʼun li Ajvalilal yuʼun Diose: «Qʼuelo avilic, liʼi jaʼ xa snaic xchiʼuc cristianoetic li Diose. Te ta xchiʼin o ta naclej. Jaʼ xa steclumal chcʼot o, jech ec li stuquique jaʼ Dios yuʼunic o. Li Diose ta scusbe loqʼuel scotol yaʼlel satic, jech muʼyuc xa bochʼo chcham, muʼyuc xa bochʼo chat yoʼnton, muʼyuc xa bochʼo ch-ocʼ, muʼyuc xa bochʼo cʼusi cʼux chaʼay. Yuʼun ilaj xa scʼoplal scotol ti jech toʼox oy ta baʼyuque» (Apocalipsis 1:1; 21:3, 4). Ta melel, jnoptik noʼox avaʼi jun Balumil ti chʼabal xa vokolile, ti chʼabal xa kʼusi kʼux ipe xchiʼuk ti chʼabal xa lajelale, toj kʼupil xa noʼox sba. Mi kʼot skʼakʼalil taje, li kʼusi ta jkʼantik ta orasione jaʼ to chkʼot ta pasel un: chkʼot ta pasel li kʼusi tskʼan yoʼonton Dios liʼ ta Balumile jech kʼuchaʼal te ta vinajele.

¿Bakʼin chtal? Li Jesuse laj yal ti jaʼo chlik ajvalilajuk kʼalal mi kʼot yorail o skʼakʼalil ti bu xi la sbiiltase: liʼ xa oyune. ¿Bakʼin chlik taje? Laj yal jun albil kʼop ti chakʼ jnaʼtik bakʼin ta xlike, yuʼun bikʼitik xa laj yalbe skʼoplal: ta sjunul balumil ta xlik mukʼtik vokoliletik —jech kʼuchaʼal pas kʼopetik, viʼnal, nikeletik xchiʼuk chameletik— xchiʼuk ch-epaj li milbaile (Mateo 24:3, 7-12; Lucas 21:10, 11). Li kʼusitik taje xchiʼuk li kʼusitik to yantik chkʼotanuk ta pasel laj yal Jesuse mas te lik talel li ta sjabilal 1914, ti jaʼo lik li Baʼyel Mukʼta Pas Kʼop ta spʼejel Balumile. ¿Kʼusi skʼan xal taje? Jaʼ skʼan xal ti jaʼ xa Ajvalil ta vinajel li Jesuse. Jaʼ yuʼun, toj jutuk xa skʼan xtal li Ajvalilale xchiʼuk ti xkʼot ta pasel li kʼusi tskʼan yoʼonton Dios liʼ ta Balumile.a

Vaʼun chaʼa, ¿kʼusi van ta jtatik ta jujun tal mi lik ajvalilajuk ta balumil li Ajvalilal yuʼun Diose? Jaʼ te chvinaj ti kʼuyelan ta jchʼuntik ta jujuntal li kʼusi laj yal Jesuse.

[Tsʼib ta yok vun]