11 Xchanobil

Chʼunolaletik xchiʼuk kʼusitik nopem ta pasel ti mu slekubtasbe yoʼonton ti Diose

¿Kʼusi jtosukal chʼunolaletik xchiʼuk kʼusitik nopem ta pasel ti chopolike? (1)

¿Mi stakʼ van xchʼunik li stsʼaklomtak Kristo ti jaʼ jun Trinidad ti Diose? (2)

¿Kʼu yuʼun muʼyuk ta spasbeik skʼinal sVokʼel Kristo mi jaʼuk skʼinal Chʼul Xemana (o Kʼin Kuxel) mi jaʼuk skʼinal lokʼel jabil li melel stsʼaklomtak Kristoe? (3, 4)

Li animaetike, ¿mi xuʼ van xilbajinik li buchʼutik kuxulike? (5)

¿Mi cham ta jun krus ti Jesuse? (6) ¿Kʼu yepal sbalil ti ta jlekubtasbetik yoʼonton ti Diose? (7)

1. Mu chopoluk skotol li chʼunolaletik xchiʼuk kʼusitik nopem ta pasele. Pe Diose muʼyuk lek chil ti bu lokʼemik tal ta jecheʼ relijione xchiʼuk ti mi tskontrain li kʼusitik ta xchanubtas li Vivliae (Mateo 15:6).

2. Trinidad. ¿Mi jaʼ Jeova jun Trinidad, jaʼ xkaltik, oxvoʼik ta jun noʼox Diose? Maʼuk. Jeova, li Totile, jaʼ «noʼox Dios[...] ta melel[...]» (Juan 17:3, Ch; Marcos 12:29). Jesuse jaʼ Sbaʼyel Nichʼon, pasbil ta mantal yuʼun Dios (1 Corintios 11:3). Li Totile jaʼ bankilal, li Nichʼonile moʼoj (Juan 14:28). Li chʼul espiritue maʼuk jun dios; jaʼ li yip ch-abtej yuʼun Diose (Génesis 1:2; Hechos 2:18).

3. Skʼinal sVokʼel Kristo xchiʼuk Chʼul Xemana (o Kʼin Kuxel). Muʼyuk ivokʼ ta 25 yuʼun disiembre ti Jesuse, yuʼun te van ayan ta 1 yuʼun oktuvre, jaʼ-o kʼalal li jchabiej chijetik ta xchabi xchijik ta pana ta akʼubaltike (Lucas 2:8-12). Jesus muʼyuk la jyalbe li stsʼaklomtak ti akʼo spasbat skʼinal svokʼele. Li kʼusi la jyalbe ti akʼo spasike, jaʼ ti snaʼobil ti chame (Lucas 22:19, 20). Li skʼinal sVokʼel Kristo xchiʼuk li kʼusitik lokʼemik tal ta stojolale, lokʼemik tal ta jecheʼ relijionetik ta voʼne onoʼox. Xuʼ jech xkaltik ek ta sventa li Chʼul Xemanae. Li baʼyel stsʼaklomtak Kristoe, muʼyuk la spasbeik skʼinal sVokʼel Kristo mi jaʼuk li Chʼul Xemanae, li kʼakʼal liʼe, li melel stsʼaklomtak Kristoe muʼyuk ta spasik ek.

4. Skʼinal lokʼel jabil. Li Vivliae chkʼopoj ta chib noʼox skʼinal lokʼel jabil ti la spasik krixchanoetik, jaʼik toʼox krixchanoetik ti muʼyuk la smuyubtaik ti Jeovae (Génesis 40:20-22; Marcos 6:21, 22, 24-27). Li baʼyel stsʼaklomtak Kristoe muʼyuk la spasik skʼinal lokʼel jabil. Li kʼusitik nopem ta pasel taje, lokʼemik tal ta jecheʼ relijionetik ta voʼne onoʼox. Li melel stsʼaklomtak Kristo tanae chakʼbe sba smotonik xchiʼuk lek ch-echʼ yuʼunik jlikeluk buuk noʼox ora ta jabil.

5. Xiʼtael animaetik. Mu kʼusi xuʼ spasik mi jaʼuk kʼusi xuʼ xaʼiik li animaetike. Mu xuʼ jkoltatik mi jaʼuk xuʼ xilbajinutik (Salmo 146:4; Eclesiastés 9:5, 10). Li chʼulelale ta xcham; muʼyuk kuxul ta xkom kʼalal ta xcham li bekʼtalile (Ezequiel 18:4). Pe oy bateltik li toj chopol anjeletik sbiinojik pukujetik, tskuy sbaik ti jaʼik espirituetik yuʼun li animaetike. Skotol kʼusitik nopem ta pasel, ti jaʼ xiʼtael xchiʼuk smuyubtael li animaetike, taje mu xtun (Isaías 8:19).

6. Krus. Jesus muʼyuk cham ta jun krus, moʼoj, jaʼ ta jtel teʼ. Li «krus» ta griego kʼop ti ta sjelubtasik epal Vivliaetike, jaʼ tskʼan chal jtel teʼ. Li kruse lokʼem tal ta jecheʼ relijionetik ta voʼne onoʼox. Li baʼyel stsʼaklomtak Kristoe muʼyuk la stunesik mi jaʼuk la smuyubtaik li kruse. Vaʼun chaʼa, ¿mi lek van xa naʼ ti ta jtunestik krus li ta muyubtaelal chkakʼtike? (Deuteronomio 7:26; 1 Corintios 10:14).

7. Xuʼ van toj tsots ta iktael junantik li chʼunolaletik xchiʼuk li kʼusitik nopem ta pasele. Xuʼ van oy avutsʼ avalaltak xchiʼuk avamikotak ti chalulanbot ti mu xa jel li kʼusitik achʼunoje. Pe jaʼ toj tsots skʼoplal ta jlekubtasbetik yoʼonton ti Diose, maʼuk li jchiʼiltaktike (Proverbios 29:25; Mateo 10:36, 37).

[Lokʼol ta pajina 22]

Maʼuk jun Trinidad ti Diose

[Lokʼol ta pajina 23]

Li skʼinal sVokʼel Kristo xchiʼuk li Chʼul Xemanae lokʼemik tal ta jecheʼ relijionetik ta voʼne onoʼox

[Lokʼol ta pajina 23]

Muʼyuk srasonal ta jxiʼtatik xchiʼuk ta jmuyubtatik li animaetike