¿Kʼu yuʼun muʼyuk tspasik Kʼin Kuxel li stestigotak Jeovae?
Jecheʼ loʼiletik xchiʼuk kʼusitik melel
Jecheʼ loʼil: Li stestigotak Jeovae muʼyuk tspasik li Kʼin Kuxele yuʼun muʼyuk xchʼunojik Cristo.
Li kʼusi melele: Jchʼamojkutik kʼuchaʼal Jkoltavanej kuʼunkutik li Jesucristoe xchiʼuk chkakʼkutik persa stsʼakliel batel
(1 Pedro 2:21; Lucas 2:11).
Jecheʼ loʼil: Li voʼoxuke muʼyuk achʼunojik ti chaʼkuxi li Jesuse.
Li kʼusi melele: Maʼuk noʼox jchʼunojkutik ti chaʼkuxi li Jesuse, yuʼun jnaʼojkutik ta melel xtok ti jaʼ te lik talel xchʼunel koʼontonkutik ta sventa ti chaʼkuxie. Yuʼun jaʼ te stsakojbe sba skʼoplal li lekil aʼyej ta jcholkutik ti toj tsots skʼoplale (1 Corintios 15:3, 4, 12-15).
Jecheʼ loʼil: Tsmakbeik yoʼonton yalab xnichʼnabik sventa mu skʼupinik li kʼinetike.
Li kʼusi melele: Jkʼanoj li kalab jnichʼnabkutike xchiʼuk chkakʼkutik persa xchanubtasel xchiʼuk skoltael sventa xmuyubajikuk noʼox li ta xkuxlejalike (Tito 2:4).
¿Kʼu yuʼun muʼyuk tspasik Kʼin Kuxel li stestigotak Jeovae?
● Li kʼusitik nopem xaʼiik spasel ta sventa Kʼin Kuxel li ta junantik lumetike muʼyuk lokʼemik ta Vivlia.
● Li Jesuse laj yal komel ti jvules ta joltik li slajele, pe muʼyuk laj yal komel ta sventa li xchaʼkuxesele. Li stestigounkutik Jeovae ta jvules ta jolkutik jujun jabil ti kʼusi ora chame jech kʼuchaʼal ta xal li kalendario sventa judioetik ta skʼakʼalil Vivliae (Lucas 22:19, 20).
● Li kʼusitik nopem xaʼiik spasel ta sventa li Kʼin Kuxele —jutuk mu skotoluk te likem talel ta jun voʼneal kʼin ti bu chmulivajik tajek tee— jnaʼojkutik ti muʼyuk lek chil li Diose.
Jaʼ noʼox stuk tskʼan ichʼel ta mukʼ
, yuʼun mi la jpastik li kʼusitik nopem xaʼiik spasel li relijionetik ti toj chopolike muʼyuk lek ta xil (Éxodo 20:5; 1 Reyes 18:21).
Ti muʼyuk ta jpaskutik li Kʼin Kuxele, yuʼun jnaʼojkutik lek ti jech chal li Vivliae. Li Vivliae tstij koʼontonkutik yoʼ «tucʼuc snopobil
» kuʼunkutik xchiʼuk ti oyuk jpʼijilkutik sventa mu jpaskutik li kʼusitik nopem xaʼiik spasel li yantike (Proverbios 3:21; Mateo 15:3, Scʼop Dios ta Chamula). Melel onoʼox ti ta sjunul koʼontonkutik chkalbekutik smelolal kʼusi jchʼunojkutik li buchʼutik tsjakʼbunkutike, pe chkichʼkutik ta mukʼ li kʼusi tsnopik ta jujuntale (1 Pedro 3:15, 16).