15 Xchanobil

Jkoltatik li jchiʼiltaktik ta spasel li kʼusi tskʼan ti Diose

¿Kʼu yuʼun skʼan cha val li kʼusi yakal cha chane? (1)

¿Buchʼutik xuʼ cha vakʼbe yojtikin li lekil aʼyejetike? (2)

¿Kʼusi xuʼ chkʼot ta pasel kʼalal chil yantik li atalelale? (2)

¿Bakʼin xuʼ cha chol mantal xchiʼuk atsobobbaile? (3)

1. Ep xa kʼusitik lek achanoj ta Vivlia. Li ojtikinelal liʼe, xuʼ cha skoltaot ta xchʼiesel avelanil kʼuchaʼal stsʼaklom Kristo (Efesios 4:22-24). Xchiʼuk xtok, li ojtikinelale, toj tsots skʼoplal sventa cha ta akuxlejal sbatel osil (Juan 17:3). Pe li achiʼiltake skʼan xaʼi ek li lekil aʼyej sventa xuʼ xkol. Skʼan xcholik mantal skotol li melel stsʼaklomtak Kristoe. Jaʼ smantal Dios (Romanos 10:10; 1 Corintios 9:16; 1 Timoteo 4:16).

2. Xuʼ chlik avalbe li kʼusitik lek yakal cha chan li krixchanoetik ti nopol oy ta atojolale. Albo yaʼi avutsʼ avalaltak, avamikotak, achiʼiltak ta abtel xchiʼuk ta chanob vun. Paso ta slekil avoʼonton xchiʼuk oyuk smalael avuʼun (2 Timoteo 2:24, 25). Vuleso ta ajol ti krixchanoetike, jaʼ tskʼelbeik li stalelal jun krixchanoe, maʼuk noʼox li kʼusi ta xale. Jaʼ yuʼun, li alekil talelale xuʼ skoltaot sventa xaʼiik yantik li aʼyej cha vale (Mateo 5:16; 1 Pedro 3:1, 2, 16).

3. Ta sjalile, xuʼ van cha pas skotol li kʼusitik skʼan pasel, sventa chlokʼ achol mantal xchiʼuk li stsobobbail xrextikotak Jeova bu cha tsob abae. Liʼe jaʼ jtos tsots skʼoplal sventa cha chʼi-o batel ta mantal (Mateo 24:14). ¡Jaʼ jun muyubajel ti oyuk ta avoʼonton cha kolta yan krixchano sventa tspas sba ta yaj tunel Jeova, xchiʼuk ti tsta xkuxlejal sbatel osile! (1 Tesalonicenses 2:19, 20.)