XCHANOBIL 21
¿Kʼuxi yakal chichʼ cholel li lekil aʼyejetike?
Li Jeovae jutuk xa skʼan stunes li Ajvalil svaʼanoj sventa slajesbe skʼoplal skotol li jvokoltike. ¡Taje jaʼ jun lekil aʼyej! ¿Mi mu lekuk van ti xkalbetik li yan krixchanoetike? Li Jesuse oy ta yoʼonton ti xalik batel yajtsʼaklomtak ta spʼejel balumil li aʼyej taje (Mateo 28:19, 20). ¿Kʼusi spasojik li stestigotak Jeova sventa xchʼunik li kʼusi laj yal Jesuse?
1. ¿Kʼuxi yakal chkʼot ta pasel li kʼusi chal Mateo 24:14?
Xi xa onoʼox yaloj li Jesuse: «Li lekil aʼyejetik ta sventa li Ajvalilale ta xichʼ cholel ta spʼejel balumil» (Mateo 24:14). Li stestigounkutik Jeovae ta jkʼupinkutik tajek spasel li abtelal taje. Li lekil aʼyejetike yakal ta jcholkutik ta spʼejel balumil mas ta jmil jeltos kʼopetik. Ta skoj ti toj ep li abtelale, skʼan xkakʼ kipalkutik xchiʼuk ti jnaʼkutik kʼuxi xuʼ jpaskutike. Jaʼ yuʼun, mu spas kuʼunkutik ta jtukutik mi muʼyuk tskoltaunkutik li Jeovae.
2. ¿Kʼusi ta jpaskutik sventa jcholbekutik mantal skotol li krixchanoetike?
Ta buyuk noʼox ta jcholkutik mantal. Jech kʼuchaʼal la spasik li yajtsʼaklomtak Kristo ta voʼnee, chibatkutik «ta jujupʼej na» (Echos 5:42). Ti jech ta jpaskutike jaʼ sventa jcholbekutik mantal ta smiyonal noʼox krixchanoetik jujun jabil. Ta skoj ti ep ta velta muʼyuk te ta jtakutik ta sna li krixchanoetike, ta jcholkutik mantal xtok ta buyuk noʼox. Ta onoʼox xkakʼkutik persa yalbel yantik ta sventa li Jeovae xchiʼuk li kʼusi oy ta yoʼontone.
3. ¿Buchʼutik sbainojik xcholel batel li lekil aʼyeje?
Skʼan xalik batel lekil aʼyejetik skotol li melel yajtsʼaklomtak Kristoe. Voʼonkutike toj tsots skʼoplal chkilkutik li abtelal taje. Ta jcholkutik mantal ti bu kʼalal xuʼ kuʼunkutike, yuʼun jnaʼojkutik ti xuʼ sta˗o skolelik li krixchanoetike (kʼelo 1 Timoteo 4:16). Muʼyuk chkichʼkutik tojel ta spasel li abtelal taje, yuʼun xi chal li Vivliae: «Ta moton la-akʼbatik, jaʼ jech ta moton xavakʼik ek» (Mateo 10:7, 8). Akʼo mi ep buchʼutik mu xchikintaik, jech-o ta jcholkutik mantal, yuʼun jaʼ jech ta jchʼunbekutik smantal li Jeovae xchiʼuk chmuyubaj kuʼunkutik.
JCHANTIK TO BATEL MAS
Jkʼeltik batel kʼuxi yakal ta jcholkutik mantal ta spʼejel balumil xchiʼuk ti kʼuxi tskoltaunkutik li Jeovae.
Ta jcholkutik mantal ta spʼejel balumil: (A) Costa Rica, (B) Estados Unidos, (C) Benín, (D) Tailandia, (E) Yap (Micronesia), (F) Suecia.
4. Chkakʼkutik persa xcholbel mantal skotol krixchanoetik
Li stestigounkutik Jeovae chkakʼkutik persa yalbel lekil aʼyejetik skotol krixchanoetik ti buyuk noʼox oyike. Kʼelik li VIDEOE xchiʼuk albeik skʼoplal li sjakʼobil liʼe:
Ti kʼu yelan ta jcholkutik mantale, ¿kʼusi ti mas lek laj avile?
Kʼelik Mateo 22:39 xchiʼuk Romanos 10:13-15 xchiʼuk albeik skʼoplal li sjakʼobiltak liʼe:
¿Kʼuxi xvinaj ti jkʼanojkutik krixchanoetik kʼalal ta jcholkutik mantale?
¿Kʼu yelan chil Jeova li buchʼutik chalik batel lekil aʼyejetike? (Kʼelik li versikulo 15).
5. Ta jchiʼinkutik ta abtel li Diose
Oy kʼusitik chkʼot ta pasel ti chakʼ ta ilel ti jaʼ tsbeiltas cholmantal li Jeovae. Jkʼeltik avil kʼusi kʼot ta pasel li ta Nueva Zelandae. Jun mal kʼakʼale, bat xchol mantal ta naetik jun stestigo Jeova ti Paul sbie, vaʼun la xchiʼin ta loʼil jun ants. Li vaʼ kʼakʼale, sob la skʼopon Jeova li antse. La stunesbe sbi xchiʼuk laj yalbe ti oyuk buchʼu xtal yoʼ xkoltaat ta yojtikinel li Diose. Xi chal sloʼil li Paule: «Oxib ora ta mas tsʼakale, te xa ox ta jtijbe stiʼ sna».
Kʼelik 1 Korintios 3:9 xchiʼuk albeik skʼoplal li sjakʼobil liʼe:
Li kʼusi kʼot ta pasel ta Nueva Zelandae, ¿kʼuxi chakʼ ta ilel ti jaʼ yakal tsbeiltas cholmantal li Jeovae?
Kʼelik Echos 1:8 xchiʼuk albeik skʼoplal li sjakʼobil liʼe:
¿Kʼu yuʼun skʼan xkoltavan Jeova sventa xichʼ cholel li mantale?
¿Mi chakʼan to chachan mas?
Li tsobajeletik ch˗echʼ kuʼunkutik ta xokol kʼakʼale chchanubtasunkutik sventa jcholkutik mantal. Mi oy xa ayemot junuk velta li ta jtsobajelkutik taje, ¿kʼu yelan aviloj li chanubtasel chkichʼkutike?
6. Kʼalal ta jcholkutik mantale, jech ta jchʼunbekutik smantal Dios
Li ta voʼnee, oy ox buchʼutik tskʼan tspajesik li yajtsʼaklomtak Jesus sventa mu xa xcholik mantale. Li yajtsʼaklomtak Kristo taje la spakbeik skʼoplal cholmantal sventa oyuk sderechoik «ta sventa li lekil aʼyejetike» (Filipenses 1:7). Jaʼ jech ta jpaskutik li avi eke.a
Kʼelik Echos 5:27-42 xchiʼuk albeik skʼoplal li sjakʼobil liʼe:
¿Kʼu yuʼun muʼyuk chkikta jbakutik li ta cholmantale? (Kʼelik li versikulo 29, 38 xchiʼuk 39).
JUNANTIKE XI TSJAKʼIKE: «¿Kʼu yuʼun chcholik mantal ta naetik li stestigotak Jeovae?».
¿Kʼusi van chatakʼ mi oy buchʼu jech la sjakʼbote?
¿KʼUSI LA ACHAN?
Li Jesuse laj yalbe mantal yajtsʼaklomtak sventa xcholik li lekil aʼyej ta skotol jteklumetike. Li Jeovae yakal tskolta yajtuneltak sventa spas yuʼunik li abtelal taje.
Svulesobil ta joltik
¿Kʼuxi yakal chichʼ cholel lekil aʼyejetik ta spʼejel li balumile?
¿Kʼuxi xvinaj ti jkʼanojkutik krixchanoetik kʼalal ta jcholkutik mantale?
¿Mi chakʼ van muyubajel xanaʼ li cholmantale? ¿Kʼu yuʼun ti jech chavale?
XUʼ TO XAKʼEL LIʼE
Kʼelavil kʼu yelan chcholik mantal ta mukʼta lumetik li stestigotak Jeovae.
Cholmantal ta buyuk noʼox xchiʼuk grupo ta mukʼta lumetik: Ta París (5:11)
¿Kʼusi spasojik li stestigotak Jeova sventa skoltaik li buchʼutik jatavem lokʼel ta slumalike?
Ta jkoltakutik yoʼ mu xaʼiik takitiʼil ta mantal li buchʼutik snakʼoj sbaike (5:59)
Kʼelavil kʼu yuʼun xmuyubaj tajek jun ants ti jaʼ mas tsots skʼoplal laj yil ta xkuxlejal li cholmantale.
Kʼelavil kʼusitik tsots skʼoplal kʼotem ta nopel yuʼunik ta snail chapanobbail sventa jechuk-o xichʼ cholel li lekil aʼyejetike.
a Li Diose chal ti skʼan jcholkutik mantale, jaʼ yuʼun muʼyuk ta jkʼanbekutik permiso j-abteletik sventa jcholkutik li lekil aʼyejetike.