Ti kʼuxi ta tsʼibael jlikuk kartae

LI KARTAE skoltaoj epal miyon krixchanoetik ta xkuxlejalik xchiʼuk ta stalelalik. Li Chʼul Tsʼibetik ta Mateo kʼalal ta Apokalipsis jutuk mu skotoluk jaʼ kartaetik toʼox. Li avi eke ta jtunestik karta sventa jtsatsubtasbetik yoʼonton li buchʼutik achʼik toe, sventa jkʼopon kamigotik, sventa jpatbetik yoʼonton li ermanoetik ti oy kʼusi tsots sbainojike, sventa jtsatsubtasbetik yoʼonton li buchʼutik oy svokolike xchiʼuk chichʼ tsʼibael kartaetik sventa lekuk xichʼ pasel li abtelaletik ta tsobobbaile (1 Tes. 1:1-7; 5:27; 2 Ped. 3:1, 2).

Jech xtok, jtunel tajek kuʼuntik sventa cholmantal li kartaetike. Ta jlom jteklumetike, li krixchanoetike nakalik ta apartamentoetik ti lek tajek chabibilike o ta naetik ti mu buchʼuuk noʼox stakʼ x-oche. Jlom xtoke jutuk mu skotoluk velta chʼabal te oy ta snaik, jaʼ yuʼun muʼyuk te ta jtatik kʼalal ta jcholtik mantal ta jujupʼej nae. Li yantike solel toj nom nakalik.

Xuʼ van mu stakʼ xijlokʼ ta jnatik ta skoj ti ip noʼox chkaʼi jbatike, ti tsots chakʼ voʼe o mi albilutik yuʼun j-abteletik ti oy noʼox spajeb yorail stakʼ xijlokʼ ti bu nakalutike. ¿Mi spas avuʼun jlikuk karta sventa jech chacholbe-o mantal junuk avutsʼ avalal o li buchʼu laj avalbe mantal ta buyuk noʼoxe? ¿Mi la sjel sna li buchʼu chavakʼbe toʼox estudioe? Mi la xchʼam jlikuk akartae, xuʼ van chtun tajek yuʼun sventa oyuk-o ta yoʼonton li mantale. Jech xtok, xuʼ van xatakbe batel vunetik ti lokʼesbil ta Vivlia li buchʼutik jaʼ to nupunike, ti jaʼ to laj yil yalab xnichʼnabike o li buchʼutik jaʼ to cham yutsʼ yalalike.

Jcholtik mantal ta karta

Mi mu xavojtikin li buchʼu chatakbe batel kartae, li kʼusi baʼyel skʼan xapase jaʼ ti xavalbe abie. Xuʼ van xavalbe skʼoplal ti yakal chapas jun abtelal ti jech chichʼ pasel ta spʼejel Balumile xchiʼuk ti chlokʼ ta avoʼonton ti jech chapas eke. Mi sta-o chavile, albo ti stestigoot Jeovae xchiʼuk albo ti kʼu yuʼun chatsʼibabe batel kartae ti muʼyuk chbat akʼopon stuke. Ti kʼu yelan chatsʼiba li kartae jaʼuk jech xatsʼiba batel jech kʼuchaʼal ti te xa akʼelojbe sat yaʼeluke; akʼo mi jech, tsako ta venta li mantal liʼe: «Pʼijanik me kʼuchaʼal chon, pe manxouk me xavakʼ abaik kʼuchaʼal palomaetik», jaʼ yuʼun pʼijan me mi chavalbe batel abi, bu likemot xchiʼuk yan kʼusitike (Mat. 10:16).

Tsʼibao li kʼusi oy ox ta avoʼonton chavalbe ti lajuk ata ta vulaʼanele, xuʼ van xatunes li slikeb loʼiletik chal ta livro Razonamiento o li ta Kabteltik sventa Dios sventa xalikes li aloʼile. Xuʼ oy kʼusi xajakʼbe sventa xatijbe yoʼonton ti akʼo snopbe smelolale. Jlom jcholmantaletike ta xalbeik ti ta moton chijchanubtasvan ta Vivliae, vaʼun chalbeik jlom stituloal ti yichʼoj tal li vunetik ti ta jtunestik sventa chijchanubtasvane. Li skʼelobil talem ta pajina 73 li ta jlivrotike xuʼ skoltaot ta spasel jlikuk karta, pe lek onoʼox ti xajel li kʼusitik chatsʼiba batele, yuʼun mi mu xajel li kʼusi chatsʼiba batele, xuʼ van jtos noʼox aʼyej chaʼi li yajval nae.

Oy buchʼutik mu skʼan skʼelik jlikuk karta ta skoj ti toj ep kʼusi yichʼoj tsʼibaele xchiʼuk mi mu xojtikinik li buchʼu la stak tale, jaʼ yuʼun mas lek ti mi jutuk noʼox yichʼoje. Yoʼ mu xlub ta skʼelele o yaptaele, jaʼ lek ti jutuk noʼox xatsʼibae. Sta-o me mi chavakʼbe batel li svunal takʼel ta ikʼel (invitación) sventa chbat ta tsobajele xchiʼuk xuʼ to xavakʼbe batel jlikuk tratado, foyeto o li revista ¡Despertad! o Li Jkʼel osil ta toyole, albo ti xuʼ jech nopajtik xichʼ li revistaetik taje. Jech xtok xuʼ xajakʼbe batel mi xuʼ xavulaʼan ta sna sventa xavalbe mas skʼoplal li kʼusi chavalbe ta akartae.

Xuʼ xi xatsʼiba li akartae

Kʼelo avil li karta te oy ta pajina 73. Akʼo venta li kʼusitik liʼe: 1) Lek xcholet tsʼibabil xchiʼuk muʼyuk toj tsobol li letraetike. 2) Akʼo mi xchʼay li sovreale, li buchʼu chichʼe xuʼ to xil ta karta li sbi xchiʼuk bu nakal li buchʼu la stak batele. 3) Kʼun xchiʼuk chal noʼox ta baʼyel parafo li kʼusi tskʼan chal li buchʼu la stsʼibae. 4) Ta jujun parafo chal li kʼusitik tsotsik skʼoplale. 5) Ta skoj li kʼusi tskʼan chakʼ ta chanele, ti kʼu yelan tsʼibabile maʼuk ti solel xojtikin xa yilel li buchʼu tstsʼibabee, oy noʼox smelolal.

Li kartaetik mas tsotsik skʼoplal jech kʼuchaʼal tstak batel ta Betel li sekretario ta tsobobbaile, skʼan tsʼibael batel sbi li tsobobbaile, li sbi xchiʼuk sdireksion li sekretarioe xchiʼuk skʼan tsʼibabel li sfechaile. Jech xtok chichʼ tsʼibael batel sdireksion li krixchanoe o li organisasione, vaʼun xuʼ xkalbetik ta sbi li buchʼu ta jtakbetik batel li kartae. Ta junantik kʼopetike xi tstsuts yuʼunik li skartaike: «Atentamente» o «Chabanukoxuk», vaʼun chakʼ sfirma li buchʼu la stsʼibae.

Skotol li karta chatsʼibae kʼelo mi lek tsʼibabil, mi lek xcholet xchiʼuk mi lek akʼbil li puntoetike, skʼan me xakʼel xtok ti lekuk ta kʼelele. Skotol li kʼusitik taje jaʼ sventa lekuk skʼoplal li kartae xchiʼuk li aʼyeje.

Mu me xchʼay xavaʼi xatsʼiba batel adireksion li ta sovree. Mi muʼyuk lek chavaʼi ti xavakʼbe batel adireksion li buchʼu chacholbe mantal ta karta ta skoj ti mu xavojtikine, jakʼbo moletik ta tsobobbail mi xuʼ xavakʼbe batel li sdireksional Salon sventa Tsobobbaile. Pe mu me xatunes li sdireksional Betele, yuʼun xuʼ snopik ti jaʼ la stak batele, jech xtok mi muʼyuk avakʼoj batel adireksion xchiʼuk mi jaʼ noʼox avakʼoj batel li jvuntike, xuʼ snopik xtok ti jaʼ la stak batel li Betele.

Lekuk me ta aʼiel li kʼusi chatsʼiba batele

Kʼalal mi laj xaʼox atsʼiba li akartae, kʼelo yan velta xchiʼuk aʼio mi lek. ¿Mi lek ta aʼiel? ¿Mi xvinaj ti cha-ichʼvan ta mukʼe? ¿Mi xvinaj ti chakʼanvan xchiʼuk ti oy slekil avoʼonton ta stojolal li krixchanoetike? (Gal. 5:22, 23.) Mi muʼyuk lek o mi chopol ta aʼiele, jelo li kʼusi atsʼibaoj xae.

Li kartaetike xuʼ xkʼot ti bu mu xakʼot li voʼote, jaʼ yuʼun toj jtunel sventa li cholmantale. Ta skoj ti voʼot la atsʼiba xchiʼuk ti jaʼ anopben li kartae, skʼan xanopbe lek skʼoplal li kʼusi la atsʼibae, ti kʼu yelane xchiʼuk mi lek ta aʼiel. Xuʼ van jaʼ xa tajek chtun yuʼun sventa stsatsub-o yoʼonton, xtijbat yoʼonton xchiʼuk xlik xanavuk li ta sbelel kuxlejale.