Programa sventa xatojob ta yetʼesel mantal xchiʼuk sventa xakʼot ta jchanubtasvanej
LI PROGRAMA taje tskolta skotol li buchʼu stsakoj xa sbiik ta chanob vune, sventa xtojobik mas kʼuxi xuʼ xkʼopojik xchiʼuk ti xkʼotik ta lekil jchanubtasvanej ta sventa li Skʼop Diose.
Li buchʼu sbainoj li Chanob vun sventa Kabteltik yuʼun Diose jaʼ chakʼbe sparte li buchʼu stsakoj xa sbiike. Li oxib pajina chtale te oy slistail ti kʼutik yelan ta etʼesel mantale. Li numeroetik ti te oy ta xokone jaʼ li xchanobiltak ti te oy li ta pajinaetik xtale. Te chalbe lek skʼoplal kʼusi skʼan xapas sventa jechuk spas avuʼun li ta apartee xchiʼuk kʼalal chachanubtasvane. Jech xtok, te tstojobtasot sventa spas avuʼun.
Li jujutos kolore chakʼ ta ilel kʼusitik parteal smakoj 1) kʼalal chichʼ kʼelel o aptael vun ta yeloval tsobajele, 2) kʼalal ch-echʼ skʼelobil cholmantale xchiʼuk 3) kʼalal ch-echʼ mantal sventa tsobobbaile. Li buchʼu sbainoj li chanob vune chalbot kʼusi xchanobil mas chavakʼ ta avoʼonton spasel kʼalal chavetʼes jujun velta li aparte. Chatabe me sbalil mi chapas li kʼusi chal ta slajeb jujun xchanobil ti bu chal «Paso liʼe». Li buchʼu sbainoj li chanob vune chalbot kʼusi yan skʼan xapas mi pas xaʼox avuʼun lek li xchanobil laj yalbot xapase.
Mi chavetʼes junuk skʼelobil cholmantale, skʼan xavakʼ ta ilel jtosuk ti kʼutik yelan ta cholel mantale. Li ta pajina 82 oy jun slistail ti kʼutik yelan xuʼ xachol mantale, pe xuʼ to xatunes yan. Xuʼ van xalbot kʼu yelan chavetʼes aparte li buchʼu sbainoj chanob vune, taje jaʼ sventa xachan batel mas. Bakʼintike xtoke chalbot ti te xatʼuj atuke.
Xuʼ mas anil chachʼi ta mantal mi chakʼel li livro liʼe xchiʼuk mi chapas li kʼusi chal ta slajeb jujun xchanobil ti bu chal «Paso liʼe», manchuk mi muʼyuk yakal chachapan junuk aparte. Xuʼ van xachan junuk xchanobil jujun xemana.
Mu ventauk ti kʼu xa sjalil jtsakoj jbitik li ta chanob vune xchiʼuk ti kʼu xa sjalil kocheltik ta cholmantale, yuʼun oy to onoʼox kʼusi skʼan xijtojob spasel. Jaʼ yuʼun ta jkʼankutik ti xatabe lek sbalil li kʼusitik chakʼ ta chanel li Chanob vun sventa Kabteltik yuʼun Diose.