Tojobtasel sventa li buchʼu sbainoj chanob vune

SKOTOL li tsobobbailetike tstʼujik jun mol sventa sbain li Chanob vun sventa Kabteltik yuʼun Diose. Mi voʼot laj avichʼ tʼujele, lek me kʼusi chkʼot ta pasel li ta chanob vun ta atsobobbail mi xamuyubaj noʼox chapas xchiʼuk mi oy ta avoʼonton ti akʼo xlekub batel kʼu yelan chetʼes sparteike.

Li kʼusi baʼyel oy ta abae jaʼ ti jujun xemana chajelubtas li chanob vune. Teuk me ta ajol ti te oyik yan krixchanoetik ti maʼuk noʼox te oyik li buchʼutik tsjelubtas sparteike. Jaʼ yuʼun kʼalal chajelubtase, tijbo yoʼonton skotolik xchiʼuk vulesbo ta sjolik jtoschaʼtosuk kʼusi stu li kʼusitik ch-echʼ ta chanob vun ti te chal ta pajina 5 kʼalal ta 8 li ta livro liʼe.

Oyuk ta avoʼonton skotol li buchʼutik stsakoj sbiik li ta chanob vune, manchuk mi skʼelel vun staojik, mi chakʼik ta ilel skʼelobiltak cholmantal o mi tsjelubtasik mantal. Koltao sventa xaʼibeik smelolal ti maʼuk noʼox jech kʼuchaʼal jun tareae, yuʼun jaʼ chkoltaatik sventa xtojobikuk ta spasbel li yabtel Jeovae. Mi laj yakʼ ta yoʼontonike, jaʼ chkoltaatik sventa xtojobik-o batel, pe skʼan onoʼox oyuk ta avoʼonton ta melel li buchʼutik staoj sparteike, skʼan xavakʼbe yil kʼusi sbalil tstabeik li kʼusi chavalbe ta jujutos xchanobile xchiʼuk albo lek smelolal kʼuxi xuʼ spas yuʼunik. Sventa spas avuʼune, skʼan xatsʼetan lek achikin ti kʼu yelan ch-echʼ yalike, mi jech chapase, jaʼ tskoltaot sventa xanaʼ kʼuxi chatojobtas yoʼ stabeik sbalil.

Teuk me ta ajol ti skʼan ta yorail noʼox xlik xchiʼuk stsuts li chanob vune. Akʼo ta ilel atuk ti mu x-echʼ yorail avuʼun kʼalal chavalbe mantal li buchʼu la sjelubtas spartee. Mi oy bu echʼ yorail yuʼun junuk li buchʼu tsjelubtas spartee, xuʼ xavakʼbe jtosuk senyail o xuʼ jaʼ xakʼbe senyail li buchʼu tskoltaote, vaʼun mi laj yaʼi li buchʼu tsjelubtas spartee, jaʼ xa noʼox tstsutses li kʼusi yakal chale xchiʼuk te xa noʼox chikta. Yan mi echʼ yorail li ta yan partee, jutuk xa noʼox me kʼusi xaval xchiʼuk jaʼ to xachiʼin ta loʼil li ermano mi tsuts xaʼox li tsobajele.

Voʼot me chajelubtas li chanob vun mi labat ta tsobajele. Pe mi oy bu muʼyuk xabat ta tsobajele, xuʼ sjelubtas yan mol ti tʼujbil xa onoʼox yuʼun li moletik ta tsobobbaile. Mi persa chavile, xuʼ skoltaot junuk jtunel ti tʼujbil xa onoʼox yuʼun li moletik sventa skoltaot xchapanel li programae, ti akʼo snojes li vunetike xchiʼuk ti akʼo yakʼanbe li buchʼutik staoj sparteike o akʼo saʼ buchʼu xuʼ sjelubtas mi muʼyuk chkʼotik li buchʼutik staoj sparteike.

Akʼo stsak sbiik li ta chanob vune. Tijbo yoʼonton skotol jcholmantaletik ti akʼo stsak sbiik li ta chanob vune. Xuʼ me stsak sbiik ek li buchʼutik maʼuk to jcholmantaletik ti chkʼotilanik ta tsobajele, jaʼ noʼox venta mi xchʼunojik li chanubtasel ta Vivliae xchiʼuk mi yakʼoj xa ta xkuxlejalik li beiltaseletike. Albo ti xamuyubaj yuʼun mi oy buchʼu laj yalbot ti tskʼan tstsak yaʼi sbie. Ta skoj ti voʼot oy ta aba li chanob vune, skʼan me xavalbe yaʼi kʼusi skʼan spas sventa stsak sbi ta chanob vun mi maʼuk to jcholmantale, xuʼ xchiʼinat yuʼun li buchʼu ch-akʼbat s-estudioe o stot smeʼ ti jaʼik stestigo Jeova mi la achiʼin ta loʼile. Li kʼusi skʼan spas li buchʼutik oy ta yoʼonton tstsak sbiik ta chanob vune jaʼ jech chkʼanbatik jech kʼuchaʼal li jcholmantaletik ti muʼyuk to yichʼojik voʼe, li mantaletike te chichʼ tael ta Kabteltik sventa Dios yuʼun disiembre ta 2006, pajina 3 xchiʼuk 4. Akʼo me venta mi te tsakajtik sbiik skotol li buchʼutik stsakoj sbiik ta chanob vune.

Slistail ti kʼutik yelan skʼan xetʼesik mantale. Li buchʼutik stsakoj sbiik ta chanob vune te tsta slistaik ta pajina 79 kʼalal ta 81 li ta livro liʼe. Jech kʼuchaʼal te chvinaj li jujutos kolore, kʼalal jaʼ noʼox chichʼ kʼelel li vune, jaʼ sta-o li xchanobil 1 kʼalal ta 17. Yan li skʼelobiltak sventa cholmantale, jaʼ noʼox mu sta-o xichʼ tunesel li xchanobil 7, 52 xchiʼuk 53. Ta sventa li yetʼesel mantale, jaʼ noʼox mu sta-o xichʼ tunesel li xchanobil 7, 18 xchiʼuk 30.

Mi oy kʼusi kʼanbat ti akʼo spas jtosuk li buchʼu tsjelubtas spartee, tsʼibabo ta lapis li slivro ti bu chal «Sfechail chlik apas» ti te oy ta xokon li xchanobil bu skʼan x-abteje. Mi laj xaʼox yetʼes spartee, jakʼbo kʼalal stuk oye, mi la spas li bu chal «Paso liʼe» ti te oy ta slajeb li xchanobile. Mi laj xaʼox spase, akʼbo smarkail ti bu chal «Pas xa avuʼun» xie. Yan mi muʼyuk to bu lek pasem yuʼun jech kʼuchaʼal chal li xchanobile, mu xavakʼbe sfechail li bu chal «Sfechail tstsuts avuʼun» xie. Jaʼ to xuʼ xavakʼbe sfechail mi pas xaʼox yuʼune xchiʼuk ti xuʼ xa xchan batel li yan xchanobile. Jech xtok, kʼalal tsjelubtas jujukoj li spartee, xuʼ xichʼ akʼbel sfechail ta slivro li ta pajina 82 ti bu chal «Sfechailtak» xie. Xuʼ stunes yan velta li slistail ti kʼutik yelan skʼan etʼesel mantale. Jech tok, xuʼ stunes chib velta li kʼusitik te talem ta pajina 82 ta sventa ti kʼu yelan skʼan cholel mantale. Skʼan me te yichʼoj slivroik li buchʼutik oy sparteik li ta chanob vune.

Jtos noʼox xchanobil xavakʼbe xchan. Jaʼ onoʼox lek mi xcholet chchan batele. Mi oy buchʼu lek tajek xtojob ta jtosuk xchanobile, albo ti akʼo xchan batel stuke xchiʼuk ti akʼo spas batel li kʼusi te chale. Vaʼun koltao ti bu sta-o chavile yoʼ xkʼot ta lekil j-etʼesej mantal xchiʼuk ti xkʼot ta lekil jchanubtasvaneje.

Akʼo mi voʼne xa onoʼox stsakoj sbiik ta chanob vun li junantik ermanoetike, chtun onoʼox yuʼunik mi chchanik batel xchiʼuk mi tspasik batel li kʼusitik te chal ta skotol li xchanobile. Li yantik xtoke skʼan to mas xtojobik ta junuk xchanobil, jaʼ yuʼun xuʼ xatʼuj jtosuk xchanobil ti bu mas chtun yuʼunike, mu persauk ti xcholet chchan batel li jujun xchanobile.

Kʼalal chatojobtasvane. Kʼalal chatojobtasvane, jaʼuk jech xapas jech kʼuchaʼal li skʼelobiltak xchiʼuk li beiltaseletik chal ta Vivliae. Akʼo me yakʼik venta avuʼun ti ta slekil avoʼonton chatojobtas li buchʼutik stsakoj sbiik ta chanob vune xchiʼuk ti jaʼ chatunes li beiltaseletik ta Vivliae.

Teuk me ta ajol ti jaʼ ‹achiʼil ta abtel› li ermanoetike (2 Kor. 1:24). Jech kʼuchaʼal li ermanoetike, li voʼot eke skʼan onoʼox xavakʼ batel persa spasel sventa lekuk xajelubtas mantal xchiʼuk lekuk xachanubtasvan. Chano li livro liʼe, paso batel li kʼusitik te chale sventa xakʼik venta ti xuʼ jech spasik ek li yantike.

Akʼo ta avoʼonton skoltael li buchʼutik stsakoj sbiik ta chanob vune sventa xtojobikuk ta yaptael vun, ta yetʼesel lek mantal xchiʼuk ti xkʼotik ta lekil jchanubtasvanejetike. Pe sventa spas avuʼune, skʼan xavakʼ persa ti xaʼibeik smelolal kʼusi smakojbe skʼoplal jujutos li xchanobile, ti kʼu yuʼun tsots skʼoplale xchiʼuk ti kʼuxi ta pasele. Jaʼ tskoltaot li livro liʼe, pe bakʼintike skʼan xavalbe lek smelolal li kʼusi skʼan xale xchiʼuk ti kʼuxi ta pasele, maʼuk noʼox ti naka chakʼelbe batele.

Kʼupil kʼoptao mi oy kʼusi pas xa yuʼun li jchanune. Akʼbo yil kʼusi koltaat-o ti jech pas yuʼune o ti kʼu yuʼun tsots skʼoplal li kʼusi la spase. Yan mi skʼan to spas batel yuʼune, jamal xavalbe ti kʼu yuʼun jech skʼan spas batele xchiʼuk albo yaʼi ti kʼuxi ta pasele. Albo noʼox jtosuk ti kʼusi to skʼan xlekub batel yuʼune xchiʼuk ta slekiluk avoʼonton xavalbe.

Teuk me ta ajol ti oy ep buchʼutik vokol chaʼiik ti chkʼopojik ta yeloval krixchanoetike. Bakʼintike tsnopik ti muʼyuk bu lek pas yuʼunike, vaʼun tsnopik ti jaʼ lek ti muʼyuk xa chakʼik batel persa spasele. Jaʼ chanbo ti kʼu yelan la spas li Jesuse, yuʼun li stuke muʼyuk bu la skʼas junuk «aj ti kʼasem xa jutuke» xchiʼuk muʼyuk bu la stupʼ «junuk mecha ti chtupʼ xae» (Mat. 12:20). Kʼalal chavalbe mantal li jun jchanune, tsako me ta venta ti kʼu yelan chaʼi sbae, mi jaʼ to stsakoj sbi li ta chanob vune o mi jaʼ jun jcholmantal ti jal xa yochele. Mas me chakʼbe batel yipal spasel mi ta slekil avoʼonton chavalbe mantale xchiʼuk mi ta sjunul avoʼonton chakʼupil kʼoptae.

Parejo xatsak ta mukʼ li jchanunetike. Li ta Romanos 12:10 xi ch-albatik mantal li buchʼutik sbainojik chanob vune: «Ta sventa ti kʼu yelan chavakʼik ta ilel ti cha-ichʼvanik ta mukʼe, baʼyel me jech xapasik». Tsako ta venta li beiltasel te chal ta 1 Timoteo 5:1 xchiʼuk 2 mi oy xa sjabilal li buchʼu chavalbe mantale. Pe ti lek xkaltike, mu ventauk jayib sjabilalik. Skʼan me ta slekiluk avoʼonton xachiʼin ta loʼil sventa xaʼiik li kʼusi chavale (Prov. 25:11).

Kʼalal chavalbe mantal li jchanunetike, albo yaʼiik kʼusi sventa ti chichʼik chanubtasele. Maʼuk sventa xkʼupil kʼoptaatik yuʼun li yantike, ti naka xjelavik noʼox batel ta yan xchanobile xchiʼuk maʼuk sventa ti lek xa ch-ilatik yuʼun yantik ta skoj ti lek xtojobik ta kʼopojel xchiʼuk ti lek xtojobik ta chanubtasvaneje (Prov. 25:27). Li matanal yakʼojbutik Jeova ti xuʼ xijkʼopoje jtunestik sventa xkichʼtik-o ta mukʼ xchiʼuk sventa jkoltatik krixchanoetik yoʼ xojtikinik xchiʼuk skʼanik li Diose. Li kʼusitik ta jchantik ta chanob vune jaʼ sventa spas lek kuʼuntik li kabteltik ta cholmantal jech kʼuchaʼal chal ta Mateo 24:14 xchiʼuk 28:19 xchiʼuk 20. Li viniketik ti yichʼojik xa voʼe, xuʼ skolta sbaik ta xchabiel «xchij Dios» mi pasem xa yuʼunik li kʼusi chkʼanbatik ta Vivliae, pe maʼuk noʼox taje, xuʼ sjelubtasik mantal xtok xchiʼuk xuʼ xchanubtasvanik (1 Ped. 5:2, 3).

Albo ti akʼo skʼelik noʼox li xchanobil ti bu yakal ch-abtejik kʼalal mi laj yichʼ li sparteike. Li kʼusi la xchanik kʼalal la xchapan sbaik ta sventa li sparteike, albo ti akʼo jech spasik kʼalal chloʼilajik jujun kʼakʼale, kʼalal chakʼ sloʼilik ta tsobajele xchiʼuk kʼalal chbatik ta cholmantale.

Programa sventa li buchʼutik oy sparteike. Skʼan xa noʼox me xapas junuk aprograma kʼalal skʼan toʼox oxib chanik xemana xetʼes li sparteike. Akʼbo ta jujuntal li svunal sparteik mi xuʼ avuʼune.

Li parteetik ti jaʼ sventa chichʼik chanubtasel li ermanoetike, jaʼ me mas lek ti jaʼ akʼo sjelubtasik li moletik ti mas lek xtojobike. Jech xtok, xuʼ sjelubtas li jtuneletik ti lek xtojobik ta chanubtasvaneje.

Sventa xanaʼ mi chavakʼbe junuk ermano o ermana jtosuk li partee, jaʼ xa tsak ta venta li programa chichʼ akʼel jujun jabil ta sventa li chanob vune. Mi jaʼ ep li ermanaetik ti jaʼ jutuk li ermanoetike, xuʼ me sjelubtasik mantal li ermanoetike, maʼuk noʼox ch-echʼ skʼelik li vune.

Tsako ta venta ta jujuntal li ermanoetik kʼalal chapas li aprogramae. ¿Mi persa van tsjelubtas sparte junuk mol o jtunel mi staoj yan sparte li ta Tsobajel sventa Tunelale o mi tsjelubtas li Mantal sventa skotol krixchanoetik li ta xemana taje? ¿Mi persa van tsjelubtas sparte junuk ermana mi koʼol skʼakʼalil staoj xchiʼuk junuk yol ti persa skʼan skolta ta skoj ti kʼox toe? Kʼelo lek mi sta-o sjelubtas jun olol, jvaʼlej kerem o li buchʼu muʼyuk to yichʼoj voʼ li kʼusi chalbe skʼoplale. Jech xtok, kʼelo mi jaʼ sta-o ta sventa li xchanobil bu yakal ch-abtej li jun jchanune.

Li ermanaetike xuʼ onoʼox stʼuj stukik ti jeltos kʼutik yelan ta jcholtik mantale, jaʼ noʼox venta mi tstsakik ta venta li mantal te chal ta pajina 78 xchiʼuk 82 li ta livro liʼe. Manchuk mi jun noʼox yajkoltaobba ch-akʼbat, xuʼ to me saʼ yan buchʼu chkoltaat. Mi tskʼan tstʼuj stuk buchʼu chkoltaat ta skoj ti jaʼ sta-o li sparte chetʼese, xuʼ me jaʼ akʼo xjelav xchiʼuk.

Bikʼtal salaetik. Mi oy mas ta 50 li buchʼutik stsakoj sbiik ta chanob vune, xuʼ van xakʼel mi xuʼ x-echʼ sjelubtas sparteik ta yan salaetik. Mi chtun chavil li ta atsobobbaile, xuʼ te ch-echʼ li parte numero 1, 2 xchiʼuk 3 o jaʼ noʼox li 2 xchiʼuk 3.

Ta jujun salae skʼan ti oyuk jtojobtasvaneje: junuk mol o mi moʼoje, junuk jtunel ti lek chaneme. Li jtojobtasvanejetike jaʼ chichʼik vaʼanel yuʼun li moletike. Skʼan jmoj xa-abtejik xchiʼuk li yan jtojobtasvanejetike sventa xavakʼ venta mi mas xa xtojobik batel li buchʼutik staoj sparteike, mu ventauk bu jotukal tsjelubtas sparteik li ta yan veltae.

Chanun sventa mas xtojobik ta skʼelel vun. Mi sta-o chil moletik ta tsobobbail ti persa skʼanik koltael jayvoʼuk ermanoetik sventa xtojobik mas ta skʼelel vun li ta kʼusi kʼopal chkʼopojik li ta tsobobbaile, xuʼ xichʼ akʼel chanubtasel ti jaʼ stsʼak chkʼot li Chanob vun sventa Kabteltik yuʼun Diose. Taje te chichʼik chanubtasel ta skʼelel xchiʼuk stsʼibael vun o ti kʼuxi mas xlekub batel yuʼunik li skʼelel vune.

Taje mu persauk jmoj te xichʼ chanel li ta chanob vune, yuʼun xuʼ skʼan chʼakbel lek yorail sventa xichʼik lek koltael. Jaʼ chakʼ venta moletik li kʼusitik chtune xchiʼuk ti bakʼin chichʼ akʼel li chanune. Xuʼ xichʼik chanubtasel ta jujuntal o ta skotolik.

Skʼan me xtojobuk lek li buchʼu chchanubtasvane, jaʼuk jun ermano ti xtojob lek yaptael vune xchiʼuk ti snabe lek sgramatikail li jkʼoptike. Li moletike xuʼ xalbeik junuk ermana yoʼ xakʼ li chanun ti mi muʼyuk junuk ermanoe, jaʼ noʼox venta mi xtojob leke xchiʼuk mi lek stalelale, jech xtok skʼan smak sjol li ermanae (1 Kor. 11:3-10; 1 Tim. 2:11, 12).

Li foyeto Akʼbo yipal ta skʼelel xchiʼuk ta stsʼibael vun ti jelubtasbil ta ep ta chop kʼope, jaʼ chtun sventa xchanik skʼelel xchiʼuk stsʼibael vun. Xuʼ oy kʼusi stakʼ tunesel xtok ta sventa li chanune, jaʼ chichʼ tsakel ta venta kʼu yelan xbatik li jchanunetike. Vaʼun mi xchanik xaʼox leke, xuʼ me xichʼik albel ti xuʼ xa stsak sbiik li ta Chanob vun sventa Kabteltik yuʼun Diose.

Ta skoj ti voʼot abainoj li chanob vune, xuʼ me ep kʼusi xchan avuʼun li buchʼutik te oyik ta tsobobbaile. Jaʼ yuʼun chapano aba lek, jech xtok jaʼuk jun mukʼ ta matanal xavil ti jaʼ yakʼojbot Dios jech kʼuchaʼal chal ta Romanos 12:6 kʼalal ta 8 xchiʼuk akʼo ta avoʼonton spasel li kʼupil sba abtelale.