Li Chanob vun sventa Kabteltik yuʼun Dios ta sjabilal 2015 tskoltautik yoʼ xlekub ti kʼu yelan chijchanubtasvane

¹ Xi la stsʼiba li Davide: «Mucʼul Dios, jaʼ acʼo locʼuc ta que, jaʼ acʼo jnopilan ta coʼnton li cʼusi lec chavile, voʼot li mucʼta ton cʼotemot cuʼune, voʼot li jpojvanejot cuʼune» (Sal. 19:14). Li voʼotik eke ta jkʼantik akʼo lek xil Jeova li jkʼopojeltike xchiʼuk vinajuk ti ep sbalil chkiltik ti chkaltik Skʼop Dios ta tsobobbail xchiʼuk ta cholmantale. Li Jeovae tstunes Chanob vun sventa Kabteltik yuʼun Dios o yan kʼusitik sventa mas lek xijtojob ta cholmantal. Li chanob vun taje ch-echʼ jujun xemana ta sjunul balumil ta mas ta 111,000 tsobobbailetik. Skoltaoj buchʼuuk noʼox krixchanoal yoʼ lek chapalik sventa xakʼik ta chʼunel li lekil aʼyeje xchiʼuk sventa oyuk lek smelolal xchiʼuk tsotsuk yoʼontonik xalik batel (Hech. 19:8; Col. 4:6).

² Li kʼusitik chichʼ chanel li ta Chanob vun sventa Kabteltik yuʼun Dios ta sjabilal 2015, chlokʼ ta foyeto ¿Buchʼutik tspasik li kʼusi tskʼan yoʼonton Jeova avie?, Chikintao kʼusi chal Dios sventa chakuxi sbatel osil, Li Vivliae, ¿kʼusitik chalbe skʼoplal? xchiʼuk Slikeb loʼil ta sventa li Skʼop Diose. Yan ti kʼusi chjel li jabil liʼe, jaʼ ti laj yichʼ bikʼtajesel ti kʼu sjalil ch-echʼ li kʼusi mas tsotsik skʼoplal ta skʼelel Vivliae xchiʼuk li ta mantal 1. Jkʼeltik batel li kʼusitik jel taje xchiʼuk ti kʼu yelan chichʼ jelubtasel li parteetik ta chanob vune.

³ Li kʼusi mas tsotsik skʼoplal ta skʼelel Vivliae. Liʼe jaʼ oy ta sba jun ermano, chib noʼox minuto oy yuʼun sventa chalbe skʼoplal jtos noʼox kʼusi ti chkʼot ta oʼontonal xchiʼuk ti jtunele. Jaʼ te tslokʼes li ta kapituloetik ti chichʼ chanel li xemana taje. Skʼan me xchapan sba lek sventa tsots skʼoplal kʼusi x-echʼ yal ta tsobobbail li ta chib minuto taje. Ta tsʼakal une, jech chichʼ pasel kʼuchaʼal nopemutik xa onoʼoxe; li buchʼutik te ta tsobobbaile oy vakib minuto yuʼunik sventa xalik li kʼusitik lek laj yilik li ta kapituloetik chichʼ chanel li xemana taje, pe 30 segundo noʼox me xuʼ xjalijik ta jujuntal, jaʼ lek mi mu stae. Sventa oy kʼusi lek x-al kuʼuntik ti vaʼ sjalile, skʼan jchapan jbatik xchiʼuk kakʼ ta koʼontontik ti kʼu sjalil akʼbilutike. Toj lek mi jech la jnopes jbatike, yuʼun jaʼ chkoltavan sventa oyuk to lek yorail yuʼunik jayvoʼuk sventa xalik li kʼusi lek la xchapanik tale.

⁴ Mantal numero 1. Jaʼ xa noʼox oxib minuto o mu sta ti kʼu sjalil chʼakbil sventa li skʼelel Vivliae, li avie mas xa jutuk versikuloetik chichʼ kʼelel. Li buchʼu jech tsta sparte taje, skʼan me ep ta velta tsots xchanilan xchiʼuk tskʼel mi lek xkʼel yuʼun xchiʼuk mi xpʼejlajet chkʼopoj yoʼ kʼun xichʼ aʼibel smelolal li kʼusi chichʼ kʼelele. Jkotoltik skʼan xkakʼtik persa ti xijtojob skʼelel vune, yuʼun jaʼ yichʼobil ta mukʼ kuʼuntik li Jeovae. Kʼalal chkiltik ti lek snaʼik skʼelel vun li epal kʼoxetik ta jtsobobbailtike, ta melel xijmuyubaj yuʼun. Jaʼ yuʼun lek staik-o kʼupil kʼoptael li totil meʼiletik ti ta slekil yoʼontonik tskolta yalab xnichʼnabik sventa lek xtojobik ta skʼelel vune.

⁵ Mantal numero 2. Jaʼ oy ta sba jun ermana, tsjelubtas kʼuchaʼal jun skʼelobil ti voʼob minuto skʼan xjalije. Li ermanae jaʼ noʼox skʼan xalbe smelolal li mantal staoje. Kʼalal ch-echʼ jun mantal ti chlokʼ ta foyeto Slikeb loʼil ta sventa li Skʼop Diose skʼan jechuk xakʼ ta ilel ti kʼu yelan chkʼot ta pasel ti bu chichʼ cholel mantale xchiʼuk ti kʼusi mas jtunele. Mi chlokʼ ta foyeto ¿Buchʼutik tspasik li kʼusi tskʼan yoʼonton Jeova avie?, Chikintao kʼusi chal Dios sventa chakuxi sbatel osil o Li Vivliae, ¿kʼusitik chalbe skʼoplal? jaʼ noʼox skʼan xalbe smelolal li mantal staoje xchiʼuk akʼo stʼuj li tekstoetik ti sta-oe. Xuʼ stunes yan tekstoetik ti jtunelik sventa li mantal ch-echʼ yalike. Li buchʼu sbainoj chanob vune jaʼ ta stʼuj buchʼu chkoltavan ta sjelubtasel.

⁶ Mantal numero 3. Liʼe jaʼ oy ta sba jun ermano o jun ermana ti voʼob minuto skʼan xjalije. Mi jaʼ laj yichʼ akʼbel jun ermanae, jech tspas kʼuchaʼal laj yichʼ alel ta sventa li mantal numero 2. Pe mi jaʼ la sta jun ermanoe xchiʼuk ch-albat ti te tslokʼes ta foyeto ¿Buchʼutik tspasik li kʼusi tskʼan yoʼonton Jeova avie?, Chikintao kʼusi chal Dios sventa chakuxi sbatel osil o Li Vivliae, ¿kʼusitik chalbe skʼoplal? ch-echʼ yal kʼuchaʼal jun mantal sventa li buchʼutik te tsobolik ta salone. Li jchanune jaʼ noʼox skʼan xalbe smelolal li mantal staoje xchiʼuk akʼo stʼuj li tekstoetik ti sta-oe.

⁷ Jtos kʼusi achʼ ti kʼu yelan chichʼ jelubtasel li mantal numero 3. Kʼalal ch-echʼ jun mantal ti chlokʼ ta foyeto Slikeb loʼil ta sventa li Skʼop Diose, ti jaʼ tsjelubtas jun ermanoe, maʼuk ch-echʼ yal kʼuchaʼal jun mantal, skʼan jechuk xakʼ ta ilel (tspas jun demostración) ti kʼu yelan chkʼot ta pasel ti bu chichʼ cholel mantale o jaʼ ti kʼu yelan chetʼes li Yichʼel ta Mukʼ Jeova ta yutsʼ yalale. Li buchʼu sbainoj chanob vune xuʼtik xal buchʼu chkoltavan xchiʼuk ti kʼu yelan tsjelubtasike (marco de circunstancias). Li buchʼu chkoltavane jaʼuk me yutsʼ yalal li buchʼu chetʼes mantale o junuk ermano ta tsobobbail. Mi oy to yan tekstoetik ti jaʼ chalbe skʼoplal li mantale, xuʼ xichʼ kʼelel. Bateltike jaʼ jun mol ta tsobobbail ti buchʼu tsjelubtase, kʼalal jech taje xuʼ stʼuj stuk ti buchʼu chkoltaate xchiʼuk ti kʼu yelan tskʼan tsjelubtase. Ta melel tspat tajek koʼontontik skʼelel ta tsobobbail kʼu yelan chakʼ ta ilel jun mol xchiʼuk yutsʼ yalal o xchiʼuk yan ermano ti kʼu yelan xuʼ lek xijchanubtasvane.

⁸ Tojobtasel. Kʼalal mi laj li jujun mantale, li buchʼu oy ta sba chanob vune oy chib minuto yuʼun sventa chal jtosuk ti kʼusitik lek pas yuʼun li jchanune xchiʼuk sventa chal tojobtasel ti skʼan slokʼes ta livro Benefíciese. Kʼalal chal buchʼu tsjelubtas yan parte li buchʼu sbainoj chanob vune, muʼyuk kak chal bu jtosukal yakal ch-abtej li jchanune. Pe mi tsuts li spartee, tskʼupil kʼopta xchiʼuk chal bu yakal ch-abtej. Jech xtok, chal kʼu yuʼun lek pas yuʼun, o moʼoje, ta slekil yoʼonton akʼo yalbe kʼu yuʼun te-o ch-abtej.

⁹ Li jchanunetike xuʼ staik ta pajina 79 kʼalal ta 81 ta slivroik Benefíciese li slistail kʼuxi xuʼ xlekub jkʼopojeltike. Kʼalal mi laj xaʼox koʼontontik ta tsobajele, li buchʼu sbainoj chanob vune tstsakbe ta slivro kʼusi fechail pas yuʼun li bu toʼox ch-abteje xchiʼuk tsjakʼbe mi la spas li ejercicio xi sbie. Jech xtok xuʼ jaʼo, o ta mas jelavel, tskʼupil kʼopta xchiʼuk chalbe yan mantaletik ti xuʼ xkoltaate. Li jchanunetike tsots skʼoplal ti epuk sbalil chilik sventa chchʼiik-o ta mantal li kʼusi ch-albatik yuʼun buchʼu sbainoj chanob vune (1 Tim. 4:15).

¹⁰ Mi mas xa jelav ti kʼu sjalil akʼbil li jun jchanune, li buchʼu sbainoj chanob vun o junuk yajkoltaobbae lek noʼox smelolal chakʼbe junuk senyail ti jelav xae: xuʼ van sbakʼes junuk timbre o skʼojilan junuk lapis ti bu xuʼ chile. Kʼalal mi jech xaʼox kʼot ta xchikin li jun jchanune, jaʼ xa noʼox akʼo stsutses li jpʼel kʼop yakal chale, vaʼun akʼo yaluk tal li ta plataformae (kʼelo livro Benefíciese, ta pajina 282, parafo 4).

¹¹ Skotol li buchʼutik spas xa yuʼunik li kʼusitik chichʼ kʼanele ta xichʼik tijbel yoʼontonik ti akʼo stsak sbiik li ta Chanob vun sventa Kabteltik yuʼun Diose (kʼelo livro Benefíciese, ta pajina 282, parafo 6). ¿Kʼusi sbalil staojbeik yajtuneltak Dios li chanob vun taje? Chapanbilik sventa xvinaj ti lek xchʼunojik, ti chichʼik ta mukʼ xchiʼuk chkʼanvanik kʼalal chakʼik ta ojtikinel o chchanubtasvanik ta sventa li kʼusitik lek chichʼ talel li Ajvalilal yuʼun Diose. Ta melel, li Jeovae xmuyubaj tajek kuʼuntik kʼalal jaʼ ta jmuyubtatik-o ta sventa li chanubtasel chkichʼtik ta slumale (Sal. 148:12, 13; Is. 50:4).