Lek xpʼejlajet xakʼopoj

SVENTA oyuk smelolal li kʼusi chavale, tsots me skʼoplal ti jamaluk ta aʼiele. Manchuk mi toj kʼupil sba xchiʼuk tsots tajek skʼoplal li kʼusi chavale, muʼyuk chaʼibeik smelolal skotol mi mu kʼunuk ta aʼiele.

Mu me xkʼot ta yoʼontonik mi mu xaʼibeik smelolal li kʼusi chavale. Manchuk mi lek tsots chkʼopoj li jun krixchanoe, muʼyuk kʼusi tstij koʼontontik ta spasel mi mu lekuk xpʼejlajet chkʼopoje. Xkoʼolaj kʼuchaʼal yakal chkʼopoj ta yan kʼop ti mu xkaʼibetik smelolale (Jer. 5:15). Xi tsvules ta joltik li Vivliae: «¿Buchʼu van chchapan sba sventa paskʼop mi muʼyuk smelolal chichʼ jupanel li okʼese? Jaʼ jechoxuk ek, ¿buchʼu van chaʼibe smelolal li kʼusi yakal chavalik mi muʼyuk bu kʼun ta aʼiel li kʼusi chavalike? Ta melel, ta ikʼ noʼox chakʼopojik ti jechuke» (1 Kor. 14:8, 9).

¿Kʼu yuʼun ti vokol ta aʼibel smelolal bakʼintik li kʼusi chkaltike? Xuʼ van jaʼ ta skoj ti muʼyuk lek ta jachʼ li ketike. Mi toj tsinajtik tajek li xchʼuxuvil ketike xchiʼuk mi muʼyuk lek ta jbakʼestik li yanal ketike, muʼyuk lek xpʼejlajet chlokʼ li kʼusi chkaltike.

Mu me xkaʼibetik lek smelolal xtok mi toj anil chijkʼopoje. Xkoʼolaj kʼuchaʼal oy kʼusi ta jtijtik ta gravadora ti mas anil chal batele. Manchuk mi xkaʼitik li jujupʼel kʼop chale, mu masuk ta jtabetik sbalil.

Oy bakʼintik xtoke, mu xaʼibeik smelolal ta skoj ti xmaklajet chijkʼopoje. Akʼo mi jech, xuʼ onoʼox xlekub batel kʼu yelan chijkʼopoj mi ta jpastik li kʼusi chichʼ alel li ta xchanobil liʼe.

Pe bakʼintike, mu xaʼibeik smelolal ta skoj ti mu lekuk xpʼejlajet chkaltik li jujupʼel kʼope, jaʼ xkaltik, ti koʼol noʼox ta jkʼeltik o chkaptatik batel li vokaletik xchiʼuk li konsonanteetike xchiʼuk ti muʼyuk chijpaj ta skʼelel ti bu skʼan chijpaje. Oy jlom xtoke muʼyuk tsʼakal chalik li silavaetike o ti kʼu yelan skʼan alele. Kʼalal nitil chichʼ alel jaypʼeluk kʼope, mu xaʼibeik smelolal skotol li buchʼutik chchikintaike, vaʼun jecheʼ xa noʼox tsnopbeik batel skʼoplal stukik kʼusi skʼan xal li kʼusitik to chichʼ alel batele. Jaʼ yuʼun mi oy buchʼu mu lekuk xpʼejlajet chkʼopoje, mu lekuk chbat li kʼusi chakʼ ta chanele.

Kʼusi xuʼ jpastik sventa lek xpʼejlajet li kʼusi chkaltike. Jtose jaʼ ti jnaʼtikuk kʼu yelan cholbil li kʼusi kʼopal chijkʼopoje. Ta jeltos kʼopetike chʼakbil ta silava li jujupʼel kʼope. Oy jelajtik kʼu yelan chichʼ alel jujun o jmoj chichʼ alel skotol. Li ta jeltos kʼopetik taje tskʼelik batel li jujun silavae; akʼo mi jech, mu koʼoluk stsatsal tskʼelik jujun silava. Mi oy ta avoʼonton ti xlekub batel ti xpʼejlajet li kʼusi chavale, kʼunkʼun xakʼel xchiʼuk kʼelo batel skotol li silavaetike. Ta slikebale xuʼ van muʼyuk lek ta aʼiel ta skoj ti jujun silava chakʼele; pe mu xachibaj, mi la achanilan batele, kʼunkʼun jech chlokʼ avuʼun ti kʼu onoʼox yelan chakʼopoje. Sventa lekuk xcholet chbat ta alel avuʼune, skʼan xapas ta jmoj li jpʼelantik kʼope, pe mi chjel smelolale chavaʼie, mu jechuk xapas.

Ta skoj ti maʼuk onoʼox jech chakʼopoj o ti maʼuk onoʼox jech ti kʼu yelan chakʼel ta skoj ti jaʼ to chachanilane, kʼelo me aba sventa mu jechuk xa xapas-o batel.

Mi toj kʼun li yechʼomal avee, toyo lek li ajole. Kʼalal chakʼel li Vivliae, toyol xatsak sventa mu persauk xatoy asat kʼalal chakʼel li buchʼutik te oyike. Mi jech chapase, mas lek xcholet chbat ta alel avuʼun.

Li kʼusi yan xuʼ skoltaote jaʼ ti junuk noʼox avoʼontone. Mi toj tsinajtik li xchʼuxuviltak jsatike xchiʼuk li kʼusitik ta jbekʼtaltik ti jaʼ chkoltavan sventa xkichʼtik-o ikʼe, mu xa lekuk chijkʼopoj. Yuʼun mi jeche, mu xa koʼoluk lek ch-abtejik li jnopbentike, li kʼusitik oy ta yut jbekʼtaltik ti jaʼ chijkʼopoj-o yuʼune xchiʼuk ti kʼu yelan chkichʼtik ikʼe.

Mu me toj tsiniluk xkakʼtik li xchʼuxuviltak ketike sventa xkaʼitik ta anil li kʼusi tskʼan chalbutik li jchinabtike. Jaʼ jech li yanal ketik eke, skʼan me lek jbakʼestik sventa xlokʼ lek li kʼusi chkaltik ti te chlik talel ta jnukʼtike. Mi toj teʼtsinan o mi toj tsinil li sbakil ketike xchiʼuk li yanal ketike, muʼyuk lek ta jachʼ li ketike xchiʼuk ta stanal ketik chlokʼ talel li kʼusi chkaltike, vaʼun muʼyuk lek ta aʼiel, toj kʼun xchiʼuk mu xkaʼitik li kʼusi chichʼ alele. Ti jech ta jchanilantike mu me toj xbat ta mas ti yan xa kʼu yelan chijkʼopoje, skʼan oyuk noʼox spʼisol sventa lekuk xpʼejlajet ti kʼu yelan chijkʼopoje.

Sventa xuʼ xavakʼ venta mi xpʼejlajet chakʼopoje, skʼan tsots xavapta. Vaʼun te chavakʼ venta kʼu yelan ch-abtej li kʼusitik ta jbekʼtaltik ti jaʼ chijkʼopoj-o yuʼune. ¿Mi chajachʼ lek ave sventa lek xlokʼ li kʼusi chavale? Teuk me ta ajol ti kʼalal chijkʼopojutike, maʼuk noʼox mas ta jtunestik li kokʼtike. Yuʼun te tsakal skʼoplal xtok li jnukʼtike, li sbakil ketike, li yanal ketike, li xchʼuxuviltak jsatike xchiʼuk li xchʼuxuviltak jnukʼtike. ¿Mi chabakʼes asat kʼalal chakʼopoje? Mi muʼyuke, xuʼ van mu toj lekuk xpʼejlajet li kʼusi chavale.

Mi oy agravadorae, paso gravar jayibuk minuto li yechʼomal avee. Jech xakʼopoj kʼuchaʼal onoʼox chakʼopoj ta cholmantale. Kʼalal chavaʼi li yechʼomal avee, te van chavakʼ venta ti mu lekuk xpʼejlajet chlokʼ ta alel avuʼun jpʼelantik kʼope. Akʼo venta ti bu muʼyuk lek xpʼejlajet chavale, ti bu kʼun chavale xchiʼuk ti bu muʼyuk chakʼel skotole, mi laje, akʼo venta ti kʼu yuʼun jech chapase. Mi laj avakʼ persa spasel li kʼusitik laj xa kalbetik skʼoplale, ta xlekub ti kʼu yelan chakʼopoje.

¿Mi xmaklajet noʼox chakʼopoj? Mi jeche, skʼan xajachʼ mas li avee xchiʼuk akʼo persa ti lekuk xpʼejlajet chakʼopoje. Baʼyel ichʼo lek ikʼ xchiʼuk kʼunkʼun xakʼopoj. Oy krixchanoetik ti xmaklajet noʼox chkʼopojike mas xa lek xpʼejlajet chkʼopojik ti jech spasojik taje. Mi toj j-echʼ noʼox xkaʼitik li s kʼalal chakʼopoje, mu xanapʼan ta stanal ave li avokʼe. Mu me xachibaj mi mu masuk chlekub avuʼun chavaʼie. Vuleso me ta ajol li Moisese xuʼ van xmaklajet noʼox chkʼopoj kʼalal tʼujat yuʼun Jeova sventa xbat yalbe kʼusitik tsots skʼoplal li Faraon xchiʼuk li j-israeletike (Éx. 4:10-12). Mi oy ta avoʼonton chatun ta stojolal Diose, tstunesot li Dios eke xchiʼuk chakʼbot sbendision li ta cholmantale.